સ્મોક બોમ્બ બનાવીને બેંકમાંથી લાખો રૂપિયા લૂંટ્યા

દિલ્હી પોલીસની ક્રાઇમ બ્રાન્ચે એક શિક્ષિત અને કુશળ બેન્ક લૂંટારાની ધરપકડ કરીને એક ચોંકાવનારો પર્દાફાશ કર્યો છે. પકડાયેલ આરોપી, 32 વર્ષીય દીપ શુભમ, દિલ્હી યુનિવર્સિટીમાંથી કેમિસ્ટ્રીમાં M.Phillની ડિગ્રી ધરાવે છે અને તેણે પોતાની વૈજ્ઞાનિક જાણકારીનો ઉપયોગ ગુનાહિત પ્રવૃત્તિઓમાં કર્યો હતો. બિહારના સીતામઢી જિલ્લાના ચૌરૌત ગામનો રહેવાસી દીપ શુભમ આર્થિક તંગીને કારણે ખોટા રસ્તે વળી ગયો હતો.

સ્મોક બૉમ્બ બનાવી બેન્ક ઓફ ઇન્ડિયામાં લૂંટ

લૂંટની ઘટનામાં દીપ શુભમની પદ્ધતિ ચોંકાવનારી હતી. વર્ષ 2017માં બિહારના સીતામઢીમાં આવેલી બેન્ક ઓફ ઇન્ડિયાની લૂંટ દરમિયાન તેણે બંદૂકની અણીએ ₹3.6 લાખની રોકડ લૂંટી હતી. આ લૂંટ માટે તેણે પોતાની કેમિસ્ટ્રીની જાણકારીનો ઉપયોગ કરીને જાતે જ 'સ્મોક બૉમ્બ' બનાવ્યો હતો, જેમાં ફાયર ક્રેકર, મિથાઇલ એસીટેટ અને બેન્ઝીનનો ઉપયોગ કરીને ધૂમાડો ફેલાવ્યો હતો. જોકે, તે સમયે બિહાર પોલીસે તેને દિલ્હીમાંથી ઝડપી પાડ્યો હતો અને તેને દોષિત ઠેરવ્યો હતો.

જેલમાંથી છૂટ્યા બાદ જ્વેલરી શોરૂમ લૂંટ્યા

પ્રથમ ગુનામાં સજા ભોગવીને જેલમાંથી છૂટ્યા બાદ પણ દીપ શુભમ સુધર્યો ન હતો. જેલમાંથી બહાર આવ્યા પછી તે અન્ય ગુનેગાર રિતેશ ઠાકુરના સંપર્કમાં આવ્યો હતો. બંનેએ સાથે મળીને દિલ્હીના મોડલ ટાઉન વિસ્તારમાં બે મોટા જ્વેલરી શોરૂમમાં લૂંટને અંજામ આપ્યો હતો. જેમાં સપ્ટેમ્બર 2021માં 24 કેરેટ જ્વેલરી શોપમાંથી ₹6.06 લાખ અને ઓક્ટોબર 2021માં અન્ય એક શોરૂમમાંથી ₹70,000ની લૂંટ કરી હતી. આ બંને કેસમાં પણ તે આરોપી જાહેર થયો હતો.

ટેકનિકલ સર્વેલન્સથી લૂંટારો ઝડપાયો

હેડ કોન્સ્ટેબલ અજયને 9 ઓક્ટોબર 2025ના રોજ ગુપ્ત બાતમી મળી હતી કે ફરાર આરોપી દીપ શુભમ હરિયાણાના સોહના સ્થિત હરિનગર વિસ્તારમાં છુપાયેલો છે. દિલ્હી પોલીસની ક્રાઇમ બ્રાન્ચની ટીમે તાત્કાલિક ટેકનિકલ સર્વેલન્સની મદદથી આરોપીની લોકેશન ટ્રેસ કરી અને વ્યૂહાત્મક રીતે જાળ બિછાવીને તેને સ્થળ પરથી દબોચી લીધો હતો. પોલીસ પૂછપરછમાં સામે આવ્યું કે ફરાર રહેવા દરમિયાન તે 'ગ્લોસી ગેઝ' નામની ઇન્ટિરિયર ડિઝાઇનિંગ ફર્મમાં કામ કરતો હતો. DCP હર્ષ ઇંદોરાએ જણાવ્યું કે શિક્ષિત હોવા છતાં ગુનાના રસ્તે ચાલનાર આરોપીને તેની યોગ્ય જગ્યાએ પહોંચાડી દેવાયો છે.