'પેનિક એટેક આવ્યો તો ઇન્હેલર આપ્યું, છતાં મનોજીત દુષ્કર્મ કરતો રહ્યો'

 સાઉથ કોલકાતાની એક લો કોલેજની વિદ્યાર્થીની સાથે થયેલી હેવાનિયતની કહાણીએ સમગ્ર દેશને હચમચાવી દીધો છે. ત્રણ મિત્રોએ મળીને આ ગેંગરેપને અંજામ આપ્યો હતો. 25 જૂનની સાંજે 7:30 વાગ્યાથી રાતના 10:30 વાગ્યા સુધી ચાલેલા આ ઘૃણાસ્પદ કૃત્ય વિરુદ્ધ પોલીસ પાસે અઢળક પુરાવા છે. ત્યારે, આ કેસમાં પીડિતાએ એક વધુ ચોંકાવનારો ખુલાસો કર્યો છે.

પીડિતાની આપવીતી: ઇન્હેલર આપ્યા બાદ પણ હેવાનિયત ચાલુ રહી

પીડિતાએ પોલીસમાં દાખલ કરેલી ફરિયાદમાં જણાવ્યું છે કે, દુષ્કર્મ પહેલા તેને પેનિક એટેક આવ્યો હતો. અનહોનીની આશંકા થતાં જ તેને ગભરામણ થવા લાગી હતી. ત્યારે, મુખ્ય આરોપી મનોજીત મિશ્રાએ પોતાના સાથીઓને ઇન્હેલર લાવવા કહ્યું. ઇન્હેલર મળ્યા બાદ પીડિતાને થોડી રાહત મળી અને શ્વાસ લેવામાં સરળતા થઈ. થોડું સારું લાગતા તેણે ત્યાંથી ભાગવાનો પ્રયાસ કર્યો, પરંતુ કોલેજનો મુખ્ય ગેટ બંધ હતો અને ગાર્ડ પણ તેને મદદ કરી શક્યો નહીં.

પીડિતાના જણાવ્યા અનુસાર, આ તકનો લાભ ઉઠાવી ત્રણેય આરોપીઓ તેને ઢસડીને ગાર્ડ રૂમમાં લઈ ગયા, જ્યાં તેમણે આ ઘૃણાસ્પદ ગેંગરેપને અંજામ આપ્યો. પીડિતાએ પોલીસને કહ્યું, "હું તેમને વારંવાર ના પાડતી રહી, લડી અને તેમને ધક્કા પણ માર્યા કે તેઓ આવું ન કરે. હું રડતી હતી, તેમના પગે પડી કે મને જવા દો, પણ તેઓ માન્યા નહીં. તેમણે મારી સાથે બળજબરી કરી."

ગેંગરેપનો વીડિયો બનાવ્યો આરોપીઓએ

ચોંકાવનારી વાત એ છે કે, મનોજીત મિશ્રા પીડિતા સાથે રેપ કરી રહ્યો હતો, ત્યારે અન્ય બે આરોપીઓ, પ્રમિત મુખર્જી અને જૈબ અહેમદ, આ આખી ઘટનાને કેમેરામાં રેકોર્ડ કરી રહ્યા હતા.

મમતા સરકાર પર સવાલો

ગત વર્ષે કોલકાતાના આરજી કર મેડિકલ કોલેજમાં ડોક્ટરના રેપ અને મર્ડરની ઘટનાને હજુ એક વર્ષ પણ પૂરું થયું નથી, ત્યાં જ આ લો કોલેજમાં થયેલી હેવાનિયતે ફરી એકવાર રાજ્ય સરકારની મુશ્કેલીઓ વધારી દીધી છે. ખાસ કરીને લો કોલેજ ગેંગરેપના મુખ્ય આરોપી મનોજીત મિશ્રાનું TMC (તૃણમૂલ કોંગ્રેસ) સાથે કનેક્શન સામે આવ્યા બાદ મમતા સરકાર સવાલોના ઘેરામાં આવી ગઈ છે. આ ઘટનાએ કાયદો અને વ્યવસ્થાની સ્થિતિ પર ગંભીર સવાલો ઉભા કર્યા છે.