કોલકાતાનો મહિલા ડોક્ટરની હત્યા અને દુષ્કર્મ કેસ, આરોપી દોષીત જાહેર

કોલકાતાના આરજી કર મેડિકલ કોલેજ અને હોસ્પિટલમાં એક મહિલા ડોક્ટર સાથે થયેલા દુર્વ્યવહાર અંગે સિયાલદાહ કોર્ટે મોટો ચૂકાદો આપ્યો છે. કોર્ટે આરોપી સંજય રોયને દોષિત ઠેરવ્યો છે. સજા સોમવારે 20 જાન્યુઆરીએ સંભળાવવામાં આવશે. ગત 8- 9 ઓગસ્ટ 2024 ની રાત્રે, મહિલા ડૉક્ટર પર દુષ્કર્મ ગુજારવામાં આવ્યું હતું અને તેની હત્યા કરવામાં આવી હતી. આજે તે પીડિતાને ન્યાય મળ્યો છે. કોર્ટે હાલમાં સંજય રોયને દોષિત ઠેરવ્યો છે.

આ કેસની સુનાવણી 57 દિવસ સુધી ચાલી. 2024 માં ઓગસ્ટ મહિનામાં બનેલી ઘટનાના લગભગ 162 દિવસ પછી ચુકાદો જાહેર કરવામાં આવ્યો છે. પહેલા આ કેસની તપાસ કોલકાતા પોલીસ કરી રહી હતી. ત્યારબાદ હાઈકોર્ટના હસ્તક્ષેપ બાદ આ કેસ સીબીઆઈને સોંપવામાં આવ્યો. સીબીઆઈએ 13 ઓગસ્ટના રોજ આ કેસની તપાસ પોતાના હાથમાં લીધી અને ત્યારબાદ તપાસ શરૂ કરી.

સીબીઆઈએ 120 થી વધુ સાક્ષીઓના નિવેદનો નોંધ્યા. આ કેસમાં કેમેરા ટ્રાયલ લગભગ બે મહિના સુધી ચાલુ રહ્યો. સીબીઆઈના વકીલે સંજય રોયને ઘટનામાં દોષિત સાબિત કરવા માટે ડીએનએ નમૂનાઓ, વિસેરા વગેરે ઉપરાંત જૈવિક પુરાવા (LVA) રજૂ કર્યા. જોકે, આરોપી સંજય રોયે આજે પણ કોર્ટમાં પોતાનો ગુનો કબૂલ્યો ન હતો. તેણે બૂમ પાડી અને કહ્યું, હું દોષિત નથી.

સીબીઆઈએ દાવો કર્યો હતો કે પીડિતા પર દુષ્કર્મ અને હત્યા કરવામાં આવી રહી હતી ત્યારે તેણે પોતાને બચાવવા માટે લાંબા સમય સુધી સંઘર્ષ કર્યો હતો. આમાં તેણે સંજય રોયના શરીર પર પાંચ વખત ઘા કર્યા હતા, જે રિપોર્ટમાં સામે આવ્યું છે. એવો દાવો કરવામાં આવ્યો છે કે પીડિતાના શરીર પરના લાળ સ્વેબના નમૂના અને ડીએનએના નમૂના સંજય રોય સાથે મેળ ખાતા હતા. સીબીઆઈના વકીલે આ ઘટનાને અમાનવીયતાની હદ પાર કરતી ગણાવી છે.

તપાસ દરમિયાન, બહુ-સંસ્થાકીય તબીબી બોર્ડ દ્વારા રજૂ કરાયેલા અહેવાલમાં પણ પુષ્ટિ મળી હતી કે પીડિતાનું મૃત્યુ હાથથી ગળું દબાવવાથી થયું હતું. જ્યારે તાલીમાર્થી ડૉક્ટરે પોતાને બચાવવાનો પ્રયાસ કર્યો, ત્યારે તેમના ચશ્મા તૂટી ગયા. પીડિતા સાથેની ક્રૂરતા એટલી ગંભીર હતી કે તેની આંખો, મોં અને ગુપ્તાંગમાંથી સતત લોહી નીકળતું હતું. પીડિતાના ગળા અને હોઠ પર ઈજાના નિશાન જોવા મળ્યા.

સુપ્રીમ કોર્ટે આ ઘટનાનું સ્વતઃ સંજ્ઞાન લીધું હતું અને દેશના ડોકટરોની સુરક્ષા અંગે ચિંતા વ્યક્ત કરી હતી, ત્યારબાદ દેશભરના ડોકટરોની સુરક્ષામાં અંતર દૂર કરવા માટે એક રાષ્ટ્રીય ટાસ્ક ફોર્સની રચના કરવામાં આવી હતી.