બીજાપુરના પત્રકારની હત્યામાં મુખ્ય સુત્રધારની ધરપકડ

બીજાપુર પત્રકાર મર્ડર કેસને લઈને મોટા સમાચાર આવ્યા છે. પોલીસે મુકેશ ચંદ્રાકરની હત્યાના મુખ્ય આરોપી સુરેશ ચંદ્રાકરની ધરપકડ કરી છે. મુખ્ય આરોપીની હૈદરાબાદથી ધરપકડ કરવામાં આવી છે. કેસની તપાસ કરી રહેલી SITએ સુરેશની ધરપકડ કરી હતી. આ પહેલા પોલીસે ત્રણ આરોપીઓની ધરપકડ કરી હતી.

છત્તીસગઢના બીજાપુર જિલ્લામાં પત્રકારની હત્યાના મુખ્ય આરોપી સુરેશ ચંદ્રકરને હૈદરાબાદથી વિશેષ તપાસ ટીમે કસ્ટડીમાં લીધો છે. પોલીસ અધિકારીઓએ જણાવ્યું કે આરોપી સુરેશ ચંદ્રાકર પત્રકાર મુકેશ ચંદ્રાકરની હત્યા બાદ ફરાર હતો. તેમણે કહ્યું કે કેસની તપાસ માટે રચાયેલી SITએ રવિવારે મોડી રાત્રે હૈદરાબાદથી સુરેશની અટકાયત કરી હતી. અધિકારીઓએ જણાવ્યું કે આ કેસમાં સુરેશ ચંદ્રાકરના ભાઈઓ રિતેશ ચંદ્રાકર અને દિનેશ ચંદ્રાકર અને સુપરવાઈઝર મહેન્દ્ર રામટેકની ધરપકડ થઈ ચૂકી છે.

બીજાપુરના પત્રકાર મુકેશ ચંદ્રાકરનો પોસ્ટમોર્ટમ રિપોર્ટ હૃદયદ્રાવક સામે આવ્યો છે. તેના શરીરનો એવો કોઈ ભાગ બચ્યો ન હતો જ્યાં આરોપીએ તેને ઈજા પહોંચાડી ન હોય. રિપોર્ટમાં મુકેશના લીવરના ચાર ટુકડા મળી આવ્યા હતા. 5 પાંસળી તૂટેલી, માથામાં 15 ફ્રેક્ચર, હૃદય ફાટેલું અને ગરદન તૂટેલી મળી આવી હતી. પોસ્ટમોર્ટમ કરનારા ડોક્ટરોએ પણ પત્રકારોને કહ્યું છે કે, તેઓએ તેમની કારકિર્દીમાં ક્યારેય આટલી ખરાબ હાલતમાં શરીર જોયું નથી. પત્રકાર મુકેશની હત્યા કરવા માટે, આરોપીઓએ પહેલા તેના પર પાછળથી હુમલો કર્યો અને જ્યારે તે પડી ગયો, ત્યાર બાદ તેઓએ તેના પર હિંસક હુમલો કર્યો, જેના કારણે તે તુરત જ મૃત્યુ પામ્યો.

પોલીસના જણાવ્યા અનુસાર, ફ્રીલાન્સ પત્રકાર મુકેશ ચંદ્રાકર (33) 1 જાન્યુઆરીના રોજ ગુમ થયા હતા અને 3 જાન્યુઆરીએ બીજાપુર શહેરના ચટ્ટનપારા કોલોનીમાં કોન્ટ્રાક્ટર સુરેશ ચંદ્રાકરની મિલકતની સેપ્ટિક ટાંકીમાંથી તેમનો મૃતદેહ મળી આવ્યો હતો. રાજ્યના નાયબ મુખ્યમંત્રી વિજય શર્માએ દાવો કર્યો હતો કે મુખ્ય આરોપી સુરેશ ચંદ્રાકરના કોંગ્રેસ સાથે સંબંધો છે. જોકે, કોંગ્રેસે દાવો કર્યો હતો કે સુરેશ ચંદ્રાકર તાજેતરમાં જ સત્તાધારી ભારતીય જનતા પાર્ટીમાં જોડાયા હતા.

બીજાપુરમાં રોડ નિર્માણ કાર્યમાં કથિત ભ્રષ્ટાચારનો પર્દાફાશ કરતા એક સમાચાર 25 ડિસેમ્બરે ટીવી પર પ્રસારિત કરવામાં આવ્યા હતા, જેને મુકેશ ચંદ્રાકરની હત્યાનું કારણ કહેવામાં આવી રહ્યું છે. આ બાંધકામ કોન્ટ્રાક્ટર સુરેશ ચંદ્રાકર સાથે સંબંધિત હતું.