જાવેદ સિંધીએ ‘રાહુલ પટેલ’ બની યુવતીને ફસાવી

મહેસાણા જિલ્લાના ખેરાલુ તાલુકામાં ખોટી ઓળખ, દુષ્કર્મ અને બાદમાં થયેલી મારામારીની ગંભીર ઘટના સામે આવી છે. જાવેદ નામના યુવકે પોતાની ઓળખ રાહુલ પટેલ તરીકે આપી યુવતી સાથે સંબંધ બાંધ્યો અને બાદમાં તેને બ્લેકમેઇલ કરી ગેસ્ટ હાઉસમાં બોલાવી બળજબરી કર્યાનો આરોપ છે. ઘટનાની જાણ થતાં ટોળાએ યુવક ઉપર હુમલો કર્યો હતો. જેના કારણે યુવક અધમૂઓ થઈ ગયો હતો. આ મામલે બંને પક્ષોએ સામસામે પોલીસ ફરિયાદ નોંધાવી છે.

મળતી માહિતી મુજબ, આરોપી મોહંમદ જાવેદ નૂરમહમદ સિંધી નામના યુવકે પોતાનું નામ બદલી રાહુલ પટેલ તરીકે ઓળખ આપી ઓળખાણ વધારી હતી. મિત્રતા દરમિયાન તેણે યુવતીના ફોટા અને વીડિયો મોબાઈલમાં સંગ્રહિત કર્યા હતા. બાદમાં પોતાની અસલ ઓળખ જાહેર કરી સોશિયલ મીડિયા પર ફોટા વાયરલ કરવાની ધમકી આપી યુવતીને બ્લેકમેઇલ કરવાનું શરૂ કર્યું હતું.

યુવતીના જણાવ્યા મુજબ, ધમકીઓના દબાણ હેઠળ તેને ગેસ્ટ હાઉસમાં બોલાવવામાં આવી હતી. જ્યાં તેની મરજી વિરુદ્ધ શારીરિક શોષણ કરવામાં આવ્યું હતું. પીડિતાએ હિંમત દાખવી ખેરાલુ પોલીસ સ્ટેશનમાં ફરિયાદ નોંધાવતા પોલીસે સંબંધિત કલમો હેઠળ ગુનો નોંધી તપાસ શરૂ કરી છે.

બીજી તરફ, આરોપી યુવકના ભાઈએ ખેરાલુ પોલીસ સ્ટેશનમાં અજાણ્યા શખ્સો સામે ફરિયાદ નોંધાવી છે. જેમાં તેણે ખેરાલુ શીત કેન્દ્ર પાસે પોતાના ભાઈને કેટલાક લોકોએ પકડીને માર માર્યો હતો. વચ્ચે પડેલા તેના પિતાને પણ ઇજા પહોંચ્યાની માહિતી મળી છે. આરોપીને ગંભીર હાલતમાં હોસ્પિટલમાં દાખલ કરવામાં આવ્યો છે.

આ મામલે આરોપીના પરિવારજનોએ અજાણ્યા શખ્સો સામે મારામારી અને અપહરણ અંગે ફરિયાદ નોંધાવી છે. પોલીસે બંને ફરિયાદોના આધારે તપાસ શરૂ કરી છે અને સમગ્ર ઘટનાની સત્યતા બહાર લાવવાના પ્રયાસો કરી રહી છે.