'ડાયમંડ સિટી' સુરત જાણે 'ક્રાઇમ કેપિટલ' બની રહ્યું હોય તેમ હત્યાના બનાવો સામાન્ય બની ગયા છે. શહેરમાં છેલ્લા 24 કલાકમાં જ રાંદેર, લિંબાયત બાદ પુણા વિસ્તારમાં ત્રીજી હત્યાનો બનાવ સામે આવતા પોલીસની કામગીરી પર ગંભીર સવાલો ઊભા થયા છે. ગત રોજ રાંદેર વિસ્તારમાં હત્યા બાદ લીંબાયતમાં દીન દહાડે બુટલેગરની હત્યા કરવામાં આવી હતી&nbsp;
સુરતના પુણા વિસ્તારમાં ₹19 હજાર રૂપિયાની સામાન્ય લેતીદેતી જેવી નજીવી બાબતે એક મિત્રએ જ બીજા મિત્રની ઘાતકી હત્યા કરી નાખી છે.
પ્રાપ્ત માહિતી અનુસાર, મૂળ બિહારના અને પુણાના રાજીવનગરમાં રહેતા 30 વર્ષીય લાલુ મિથિલેશ યાદવ ટેમ્પો ચલાવીને પરિવારનું ગુજરાન ચલાવતા હતા. લાલુ વતનના નજીકના ગામના 20 વર્ષીય વિકી મનોજકુમાર યાદવ સાથે મિત્રતા ધરાવતો હતો.&nbsp;
રવિવારની રાત્રે બંને મિત્રો સિગારેટ પીવા માટે સાથે ગયા હતા. પરત ફરતી વખતે બંને વચ્ચે વિકીએ લાલુને આપેલા ₹19,000ની લેતીદેતી બાબતે બોલાચાલી થઈ હતી.
ટાઇલ્સના ઘા ઝીંકી દીધા&nbsp;
ઝઘડાએ ઉગ્ર સ્વરૂપ ધારણ કરતાં વિકીએ આવેશમાં આવી જઈને આવેશમાં આવી જઈને નજીકમાં પડેલી ટાઇલ્સ ઉઠાવી હતી. તેણે ટાઇલ્સના ઉપરાછાપરી ઘા લાલુ યાદવના માથાના ભાગે ઝીંકી દીધા હતા, જેના કારણે લાલુનું ઘટનાસ્થળે જ કમકમાટીભર્યું મોત નીપજ્યું હતું. હત્યા બાદ વિકી જ લાલુને લોહીલુહાણ હાલતમાં સારવાર માટે હોસ્પિટલ લઈને પહોંચ્યો હતો. જોકે, લાલુનું મોત નીપજ્યું અને પોલીસને તેના મિત્ર પર જ શંકા ગઈ હતી.
પોલીસે આરોપી મિત્રને ઝડપી પાડ્યો
હત્યાના આ ચકચારી બનાવની જાણ થતાં જ પુણા પોલીસ સ્ટેશનના અધિકારીઓ સહિત પોલીસ કાફલો તાત્કાલિક ઘટનાસ્થળે દોડી આવ્યો હતો. પોલીસે મૃતક લાલુ યાદવના મૃતદેહનો કબજો લઈ તેને પોસ્ટમોર્ટમ અર્થે સ્મીમેર હોસ્પિટલ ખાતે ખસેડ્યો હતો.
પોલીસ તપાસમાં સ્પષ્ટ થયું કે વિકી ₹19 હજાર પરત માગતો હતો, પરંતુ લાલુ આનાકાની કરી રહ્યો હતો, જેના કારણે આ ગંભીર ઝઘડો હત્યામાં પરિણમ્યો. પુણા પોલીસે હત્યાનો ગુનો નોંધીને તાત્કાલિક આરોપી વિકી મનોજકુમાર યાદવને ઝડપી પાડ્યો છે અને કાયદેસરની વધુ કાર્યવાહી હાથ ધરી છે. સુરતમાં 24 કલાકમાં થયેલી ત્રણ હત્યાઓએ શહેરીજનોમાં ભયનો માહોલ પેદા કર્યો છે.

મિત્રએ મિત્રની ટાઇલ્સના ઘા ઝીંકી કરી હત્યા

24 કલાકમાં ત્રીજો હત્યાનો બનાવ, માત્ર ₹19 હજારની લેતીદેતીમાં મિત્ર મોતને ઘાટ ઉતાર્યો..

November 18, 2025 | 17:08 IST