તું મને ગમે છે..વડોદરામાં ઝોમેટો ડિલીવરી બોયે મહિલાની કરી છેડતી

વડોદરામાં ચોંકાવનારો બનાવ બન્યો છે જ્યાં ઝોમેટો દ્વારા ફુડ મંગાવનારી મહિલાનો હાથ પકડીને ડિલીવરી બોયે છેડતી કરી છે. મહિલાની ફરિયાદના આધારે લક્ષ્મીપુરા પોલીસે ફુડ ડિલીવરી બોય મહંમદ અકમલની ધરપકડ કરી છે.

વડોદરા પોલીસ પાસેથી મળેલી માહિતી મુજબ વડોદરાના ન્યુ અલકાપુરી વિસ્તારમાં રહેતી 36 વર્ષની મહિલાએ ઝોમેટોમાંથી ઓનલાઇન ફૂડ મંગાવ્યું હતું. તેમણે બપોરે આ ઓર્ડર કર્યો હતો. ત્યારબાદ મહંમદ અકમલ ફુડ લઇને મહિલાના ઘેર પહોંચ્યો હતો. 

અકમલે મહિલાના ઘરનો ડોરબેલ વગાડ્યો હતો અને ત્યારબાદ મહિલાએ જેવો દરવાજો ખોલ્યો કે તુરત જ અકમલે મહિલાને ફૂડનો ઓર્ડર આપવાનાન બદલે તેણે મહિલાનો હાથ પકડવાનો પ્રયાસ કર્યો હતો.

અકમલની હરકતથી મહિલા ડઘાઇ ગઇ હતી અને તેણે હાથ છોડાવાનો પ્રયાસ કર્યો હતો ત્યારે અકમલે કહ્યું કે તુ મને બહુ જ ગમે છે. જો કે મહિલાએ બળજબરીથી હાથ છોડાવીને દરવાજો બંધ કરી દીધો હતો. 

આ ઘટનાથી વ્યથિત થયેલી મહિલાએ તત્કાળ ઝોમેટોના ફુડ ડિલીવરી બોય મોહંમત અકમલની હરકત વિશે પોતાના પતિને વાત કરી હતી અને ત્યારબાદ તેણે લક્ષ્મીપુરા પોલીસ સ્ટેશનમાં ફરિયાદ કરી હતી. પોલીસે વાડી વિસ્તારમાં રહેતા ડિલીવરી બોય મહંમદ અકમલ મારુક અમલ સિરાઝવાલાની ધરપકડ કરી હતી.