પતિ-પત્નીના ઝઘડામાં ધીંગાણું, બેનાં મોત 13 ઘાયલ

ગાંધીનગરના દહેગામમાં મદારી દંપતી વચ્ચે છેલ્લા ઘણા વખતથી ચાલતી માથાકૂટમાં ખૂનીખેલ ખેલાયો છે. જેમાં જમાઇએ ટોળા સાથે હુમલો કરતાં બેનાં મોત થયાં છે, જ્યારે 13 લોકો ઘાયલ થતાં સારવાર અર્થે ગાંધીનગર અને અમદાવાદ સિવિલ હોસ્પિટલ ખાતે ખસેડવામાં આવ્યા છે.

આ ઘટના અંગે મળતી માહિતી મુજબ દહેગામમાં મદારી દંપતી વચ્ચે છેલ્લા ઘણા વખતથી માથાકૂટ ચાલતી હતી. જે મામલે શનિવારે સમાજનું પંચ ભેગું થયું હતું. જે બાદ ઝઘડાએ ઉગ્ર સ્વરૂપ ધારણ કરતા જમાઈએ મળતિયાઓ સાથે મળીને ઘાતકી હુમલો કરતાં સાળા તેમજ પંચના એક વ્યક્તિનું સારવાર દરમિયાન મોત નીપજ્યું છે. જ્યારે નાનાં બે બાળકો સહિત 13 જેટલા લોકોને ઈજાઓ થઈ હતી. જે પૈકી મહિલા સહિત ચારેક જણાને અમદાવાદ સિવિલ ખસેડવામાં આવ્યાં છે. જ્યારે બાકીના ગાંધીનગર સિવિલમાં સારવાર હેઠળ છે.

આ અંગે હુમલાનો ભોગ બનનાર દહેગામના મદારી નગરમાં રહેતા જાનનાથ જીજુનાથ મદારીએ જણાવ્યું કે, તેમની દીકરીનાં લગ્ન વનરાજ ઉર્ફે વનિયો કંચનનાથ મદારી સાથે થયા હતા. આ લગ્નથી તેમને બે જોડિયા બાળક છે. વનરાજને અન્ય એક મહિલા સાથે અવૈદ્ય સંબંધો હોવાથી છેલ્લા ચાર-પાંચ વર્ષથી ઝઘડો ચાલી રહ્યો છે. જે બાબતે જે તે વખતે પોલીસ કેસ કરવામાં આવ્યો હતો અને ભરણપોષણનો કેસ પણ ચાલી રહ્યો છે.

મહત્ત્વનું છે કે, વનરાજ મદારી અમદાવાદમાં બાવાનાં રૂપમાં લોકોને હીપનોટાઇઝ કરી દાગીના-રોકડ પડાવી લેતો હતો. જેના પર અગાઉ 23 જેટલા ગુના નોંધાયેલા છે. જે લક્ઝુરિયસ કારમાં મંદિરે જતો હતો. ત્યાં આવતા લોકોને રસ્તો પૂછવા અથવા તમારી ઉપર મેલી વિદ્યાનો પ્રકોપ છે એવી વાતો કરી લોકોને હિપ્નોટાઈઝ કરતો હતો. જે-તે વ્યક્તિ તેની વાતોમાં આવી જાય. ત્યારબાદ હવામાં ભસ્મ ઉડાવી સ્તબ્ધ કરી દેતો અને સોનું કે ખિસ્સામાંથી રૂપિયા કઢાવીને ફરાર થઈ જતો હતો.