કન્નૌજ જિલ્લાના જયથરા પોલીસ સ્ટેશન વિસ્તારમાં માનવતાને શરમાવે તેવી એક ઘટના સામે આવી છે. ગડિયા સુહાગપુર ગામમાં રવિવારે સાંજે પ્રેમ લગ્ન કરનાર યુવક દીપક અને યુવતી શિવાનીની નિર્મમ હત્યા કરવામાં આવી છે. આ ઘટનાને પગલે સમગ્ર પંથકમાં ભારે રોષ અને અરેરાટી ફેલાઈ ગઈ છે.
શું છે સમગ્ર મામલો?
મળતી વિગતો અનુસાર, દીપક અને શિવાનીએ લગભગ એક મહિના પહેલા પ્રયાગરાજના એક મંદિરમાં પરિવારની મરજી વિરુદ્ધ લગ્ન કર્યા હતા. આ લગ્નથી યુવતીના પરિવારજનો ભારે રોષે ભરાયા હતા. અગાઉ પોલીસ સ્ટેશનમાં બંને પક્ષો વચ્ચે સમાધાન પણ થયું હતું, તેમ છતાં પરિવારે મનમાં વેર રાખ્યું હોવાનું ચર્ચાઈ રહ્યું છે.
સમાધાન બાદ બની ઘટના :
સમાધાન મુજબ શિવાની થોડો સમય તેની બહેનના ઘરે રહી હતી અને ત્રણ દિવસ પહેલા જ ગામમાં પરત ફરી હતી. રવિવારે જ્યારે દીપક તેની પત્ની શિવાનીને મળવા તેના ઘરે પહોંચ્યો, ત્યારે શિવાનીના પરિવારજનોએ બંને પર હુમલો કરી દીધો હતો. પ્રાથમિક તપાસ મુજબ, ઘરની છત પર જ બંનેના ગળા કાપીને તેમને મોતને ઘાટ ઉતારી દેવામાં આવ્યા હતા.
પોલીસની કાર્યવાહી અને તપાસ :
ઘટનાની જાણ થતા જ સીઓ નીતિશ ગર્ગ અને પોલીસ ઇન્ચાર્જ રિતેશ ઠાકુર કાફલા સાથે ઘટનાસ્થળે દોડી ગયા હતા. એસએસપી શ્યામ નારાયણ સિંહે પણ ઘટનાસ્થળની મુલાકાત લઈને તપાસના આદેશ આપ્યા છે. પોલીસે બંને મૃતદેહોને પોસ્ટમોર્ટમ માટે મોકલી આપ્યા છે અને ફોરેન્સિક ટીમે પુરાવા એકત્ર કરવાની કામગીરી શરૂ કરી છે. હાલ ગામમાં તંગદિલીભર્યા માહોલને જોતા ચુસ્ત પોલીસ બંદોબસ્ત ગોઠવી દેવામાં આવ્યો છે.

એટા ઓનર કિલિંગ હત્યા

ગડિયા સુહાગપુરમાં લગ્નથી નારાજ પરિવારે દીપક અને શિવાનીની ઘાતકી હત્યા કરી, ગામમાં તણાવ

January 12, 2026 | 16:02 IST