આણંદ જિલ્લાના આંકલાવ પંથકમાં 6 વર્ષની બાળકીનું અપહરણ કરી બલિ ચઢાવાની ઘટનાથી અરેરાટી વ્યાપી છે. નવાખલ ગામની બાળકી ઉપર તાંત્રિક વિધિ કરી નદીમાં ફેંકી દીધી હોવાનું સામે આવ્યું છે. સંતાન પ્રાપ્તિ માટે અજય પઢિયાર નામના યુવકે બાળકીનું અપહરણ કરીને તાંત્રિક વિધિ કરી નદીમાં ફેંકી દીધી હોવાની કબૂલાત કરી છે. આંકલાવ પોલીસે આરોપી યુવકની અટકાયત કરી આંકલાવના 4 ભુવાઓને પણ ઉઠાવ્યા છે.

આંકલાવ તાલુકાના નવાખલ ગામની 6 વર્ષની તુલસી સોલંકી રવિવારે સાંજે મંદિરે રમવા જવાનું કહી ઘરેથી નીકળી હતી. પરંતુ ઘેર પરત ન ફરતાં પરિવારજનો ચિંતામાં મૂકાયા હતા. ત્યારબાદ પરિવારે પોલીસને જાણ કરી હતી. તેવામાં પોલીસે શકમંદને પકડી પૂછપરછ કરતાં તાંત્રિક વિધિ કરી હોવાનો ખુલાસો થયો હતો. કાકાના મિત્રએ ભુવાના કહેવાથી બાળકીની બલિ ચડાવી હતી અને સિંધરોટ નદીમાં ફેંકી દીધી હતી. આંકલાવ પોલીસે SRPFની મદદથી બાળકીના મૃતદેહની શોધખોળ હાથ ધરી છે.

બાળકીના પરિવારજનોએ મંદિરે અને આસપાસના વિસ્તારોમાં શોધખોળ કરી હતી. પરંતુ તે ક્યાંય મળી નહોતી. તેથી પરિવારજનોએ આંકલાવ પોલીસને જાણ કરી હતી. પોલીસે અપહરણનો ગુનો નોંધીને તપાસ શરૂ કરી હતી. પોલીસની તપાસ દરમિયાન બાળકીના કાકાના મિત્ર અજય પઢિયાર પણ શંકા ગઈ હતી. પોલીસે તેની અટકાયત કરી પૂછપરછ કરતાં અજય પઢિયાર ભાંગી પડ્યો હતો. તાંત્રિક વિધિ માટે તે ભુવા પાસે ગયો હતો. સંતાન પ્રાપ્તિ માટે ભુવાએ તાંત્રિક વિધિ માટે બાળકીની બલિ આપવા કહ્યું હતું. તેથી અજય પઢિયાર તુલસીનું બાઈક પર અપહરણ કરી ઉમેટા લઈ ગયો હતો. ત્યાં તેણે તાંત્રિક વિધિ માટે બાળકીની હત્યા કરી હતી અને ત્યારબાદ બાળકીના મૃતદેહને સિંઘરોટ નાની નદીના બ્રિજ પરથી નદીમાં ફેંકી દીધી હતી.

આરોપી અજય પઢિયારની કબૂલાત બાદ આંકલાવ પોલીસે SRPF ટીમની મદદથી તુલસીના મૃતદેહની શોધખોળ હાથ ધરી છે. બાળકી ઉપર તાંત્રિક વિધિ કરીને હત્યાના બનાવથી આંકલાવ પંથકમાં શોક સાથે લોકોમાં આક્રોશ જોવા મળી રહ્યો છે. 6 વર્ષની નિર્દોષ બાળકીની તાંત્રિક વિધિ માટે બલિ ચઢાવાની ઘટનાએ માનવતાને શરમાવી દીધી છે. આંકલાવ પોલીસે અજય પઢિયાર વિરુદ્ધ કાર્યવાહી શરૂ કરી છે અને તાંત્રિક વિધિમાં સામેલ 4 ભુવાઓને ઉઠાવી તપાસ હાથ ધરી છે.

ઉલ્લેખનીય છે કે, બાળકીની હત્યા કરનાર યુવકે 3 મહિના અગાઉ અન્ય બાળકીને લઈ જવાનો પ્રયત્ન કર્યો હતો. પરંતુ તે સમયે ગ્રામજનોએ યુવકને પકડી મેથીપાક આપ્યો હતો.

રાજ્યમાં કાળા જાદુ અટકાવવા ગત વર્ષે કાયદો બનાવાયો

ગુજરાત વિધાનસભામાં 21 ઓગષ્ટ 2024ના રોજ ગુજરાત માનવ બલિદાન અને બીજી અમાનુષી, અનિષ્ટ તેમજ અઘોરી પ્રથા, કાળા જાદુ અટકાવવા અને નિર્મૂલન વિધેયક સર્વાનુમતે પસાર કરી કાયદો બનાવાયો હતો. આ કાયદાની જોગવાઇના ભંગ બદલ 6 માસથી લઇને 7 વર્ષ સુધીની કેદની સજા અને પાંચ હજારથી લઇને પચાસ હજાર સુધીના દંડની જોગવાઈ કરવામાં આવી છે. આ ઉપરાંત ગુનામાં મદદ કરનાર અથવા ગુનો કરવાનો પ્રયત્ન કરનારને ગુનો આચર્યો હોવાનું માની લઈ સજાની જોગવાઈ કરાઈ છે. આ ગુનાને પોલીસ અધિકારનો અને બિન જામીનપાત્ર રહેશે તેવી જોગવાઇ કરી છે. એટલે કે પોલીસને આ ગુના હેઠળ આરોપીને અટક કરવા માટેની સીધી સત્તા આપવામાં આવી છે.

કેવા પ્રકારની બાબતનો સમાવેશ કરાયો છે?

માનવબલિ, અઘોરી પ્રથા, કાળા જાદુ કે અન્ય અમાનવીય, અનિષ્ટ કૃત્યોનું આચરણ, પ્રોત્સાહન, પ્રચાર- પ્રસારનો સમાવેશ કરાયો છે.

ભૂત, ડાકણ કે દુષ્ટ આત્માને શરીરમાંથી બહાર કાઢવાના બહાને વ્યક્તિને દોરડા કે સાંકળથી બાંધીને, લાકડી કે ચાબુકથી માર મારીને, મરચાંનો ધુમાડો કરી અથવા વાળથી બાંધીને છત પર લટકાવી, અથવા શરીર ઉપર ગરમ પદાર્થથી ડામ આપવામાં આવે અથવા પગરખાં પલાળેલું પાણી પીવડાવી, માનવ મળમૂત્ર બળજબરીથી વ્યક્તિના મોઢામાં મૂકવાનો પણ સમાવેશ કરાયો છે.

કહેવાતા ચમત્કારોનું પ્રદર્શન કરવું અને તેના દ્વારા પૈસા કમાય તેમજ કહેવાતા ચમત્કારોના પ્રચાર અને પ્રસાર દ્વારા લોકોને છેતરવાની બાબતનો સમાવેશ કરાયો.

દિવ્ય શક્તિની કૃપા મેળવવાના હેતુથી કે કિંમતી ચીઝો, ખજાનો મેળવવા, અઘોરી કૃત્યો, કાળા જાદુના કૃત્યો કે અમાનવીય કૃત્યો કરી કોઇના જીવનને ભય કે ગંભીર ઇજા પહોંચાડવી.

અગમ્ય શક્તિનો પ્રભાવ છે કે આવી કોઈ શક્તિ છે તેવો બીજાના મનમાં ભય પેદા કરવો.

કોઈ વ્યક્તિ ડાકણ કે શૈતાનનો અવતાર છે તેની હાજરીથી ઢોરની દૂધ આપવાની ક્ષમતા ઘટે છે, તે દુર્ભાગ્ય લાવે છે કે રોગચાળો લાવે છે તેવા આક્ષેપો લગાડવા.

મંત્ર તંત્રથી ભૂત- ચુડેલને બોલાવવાની ધમકી આપી લોકોના મનમાં ભય ઉભો કરવો, કોઈ ભૂતપ્રેતના રોષથી શારીરિક ઈજાઓ કરવી.

કુતરું, સાપ કે વીંછી કરડવાના કિસ્સામાં કે અન્ય કોઈપણ માંદગીમાં વ્યક્તિને તબીબી સારવાર કરતા અટકાવવી અને દોરા, ધાગા, તંત્ર મંત્રથી સારવાર આપવી.

આંગળીઓ દ્વારા શસ્ત્રક્રિયા કરવાનો દાવો કરવો, અથવા સ્ત્રીના ગર્ભમાં રહેલા ગર્ભનું લિંગ બદલવાનો દાવો કરવો.

પોતાનામાં વિશેષ અલૌકિક શક્તિઓ હાજર છે, અને તેનો ભક્ત પાછલા જન્મમાં તેની પત્ની, પતિ અથવા પ્રેમી હતો તેવું દર્શાવી આવી વ્યક્તિ સાથે જાતીય પ્રવૃત્તિમાં જોડાવવું.

અલૌકિક શક્તિ દ્વારા માતૃત્વની ખાતરી આપી ગર્ભધારણ કરવામાં અસમર્થ હોય તેવી સ્ત્રી સાથે જાતીય સંબંધો બાંધવો.આ તમામ પ્રકારની બાબતનો ગુનાહિત કૃત્યમાં સમાવેશ કરવામાં આવ્યો છે.

September 1, 2025 | 17:13 IST