અમદાવાદમાં 2.90 કરોડની નકલી નોટોનો પર્દાફાશ

ગુજરાતમાં નકલી ચલણી નોટોના એક મોટા રેકેટનો પર્દાફાશ થયો છે. અમદાવાદ ક્રાઈમ બ્રાન્ચે બાતમીના આધારે અમરાઈવાડી વિસ્તારમાં દરોડા પાડીને કરોડો રૂપિયાની નકલી નોટો સાથે સુરતની એક મહિલા સહિત કુલ છ શખસોની ધરપકડ કરી છે. આ ઓપરેશન દરમિયાન પોલીસને કુલ 2.90 કરોડ રૂપિયાની બનાવટી નોટો મળી આવી છે, જેની ગણતરી કરવામાં જ અધિકારીઓને અંદાજે છ કલાક જેટલો સમય લાગ્યો હતો.

સરકારી ગાડીનો સ્વાંગ રચીને ચાલતું હતું હેરફેરનું કામ : 

આરોપીઓ પોલીસની નજરથી બચવા માટે અનોખી તરકીબ અપનાવતા હતા. તેઓ 'સત્યમ યોગ ફાઉન્ડેશન' લખેલી લક્ઝરી કારનો ઉપયોગ કરતા હતા, જેના પર ભારત સરકાર અને આયુષ મંત્રાલયના નામનો દુરુપયોગ કરવામાં આવ્યો હતો. આ રીતે તેઓ સરકારી ગાડી હોવાનો ઢોંગ કરીને નકલી નોટોની હેરફેર કરતા હતા. અમદાવાદ ક્રાઈમ બ્રાન્ચે અમરાઈવાડીમાં આ શંકાસ્પદ કારને આંતરી ત્યારે તેમાંથી 2.10 કરોડની નકલી નોટોનો જથ્થો મળી આવ્યો હતો.

સુરતના ઉધનામાં નકલી નોટો છાપવાનું હબ : 

અમદાવાદમાં પકડાયેલા આરોપીઓની પૂછપરછમાં આ રેકેટના તાર સુરત સુધી લંબાયેલા હોવાનું ખુલ્યું હતું. સુરત ક્રાઈમ બ્રાન્ચ સાથે મળીને ઉધના વિસ્તારમાં દરોડા પાડવામાં આવતા ત્યાંથી નકલી નોટો છાપવાનું હાઈટેક પ્રિન્ટિંગ મશીન અને અન્ય સાધન સામગ્રી મળી આવી હતી. સુરતમાંથી વધુ 80 લાખની નકલી નોટો જપ્ત કરવામાં આવી છે. આમ, કુલ આંકડો 2.90 કરોડ પર પહોંચ્યો છે.

ચીનથી આવતું હતું હાઈ-ક્વોલિટી પેપર : 

પોલીસ તપાસમાં બહાર આવ્યું છે કે આ ટોળકી નકલી નોટો બનાવવા માટે ચીનથી ખાસ પ્રકારનું હાઈ-ક્વોલિટી પેપર મંગાવતી હતી. આ નોટો એટલી આબેહૂબ હતી કે બેંકમાં સ્કેનિંગ મશીન વગર તેને પકડવી મુશ્કેલ હતી. આ ટોળકી મુખ્યત્વે જમીનના સોદામાં અને આંગડિયા મારફતે આ નકલી નાણાં વટાવતી હતી. આરોપીઓએ અગાઉ પણ અમદાવાદમાં ત્રણથી ચાર મોટા નાણાકીય વ્યવહારો કર્યા હોવાની કબૂલાત કરી છે, જેના આધારે પોલીસ હવે તપાસનો વ્યાપ વધારી રહી છે.