અમદાવાદમાં નકલી બ્લડ પ્લાઝમા રેકેટનો પર્દાફાશ!

અમગાવાદ SOGએ મોટું કૌભાંડ ઝડપી પાડ્યું
અમદાવાદ ગ્રામ્ય પોલીસના સ્પેશિયલ ઓપરેશન ગૃપ (SOG)એ ચાંગોદર વિસ્તારમાં ચાલતા નકલી બ્લડ પ્લાઝમા સપ્લાયના મોટા કૌભાંડનો પર્દાફાશ કર્યો છે. પ્રાથમિક તપાસમાં ખુલ્યું છે કે ફાર્મા કંપનીઓને સપ્લાય થતી અસલી પ્લાઝમા બેગની જગ્યાએ ભેળસેળયુક્ત પ્લાઝમા પહોંચાડવામાં આવતું હતું. આ મામલે પોલીસે ચાર શખ્સોને ઝડપી પાડી અંદાજે 12 લાખ રૂપિયાથી વધુનો મુદ્દામાલ કબજે કર્યો છે.

ગુપ્ત બાતમીથી ખુલ્યો સમગ્ર ખેલ
પોલીસને મળેલી બાતમી મુજબ, દિનેશભાઈ ઉમાભાઈ ચૌધરી નામનો વ્યક્તિ પ્લાઝમા યુનિટમાં ગેરરીતિ કરી રહ્યો હતો. આ બાતમીના આધારે SOGએ ટેક્નિકલ સર્વેલન્સ અને તપાસ શરૂ કરી હતી. તપાસ આગળ વધતા ગેરકાયદે નેટવર્ક સામે આવ્યું અને આરોપીઓની ભૂમિકા સ્પષ્ટ થઈ હતી.

પ્લાઝમાની અદલાબદલી કરીને કમાતાં હતા નફો
તપાસમાં સામે આવ્યું કે, મુખ્ય આરોપી દિનેશ ચૌધરી અગાઉ પ્લાઝમા કલેક્શન ક્ષેત્રમાં કાર્યરત હોવાથી તેને સમગ્ર પ્રક્રિયાનું ટેક્નિકલ જ્ઞાન હતું. કલેક્શન બાદ અસલી અને ગુણવત્તાસભર પ્લાઝમા બેગ અલગ કરી દેવામાં આવતી હતી. ત્યારબાદ તેની જગ્યાએ તૈયાર કરાયેલ ભેળસેળયુક્ત પ્લાઝમા બેગ મૂકીને કંપનીઓને સપ્લાય કરવામાં આવતી હતી.

સહ આરોપીઓની ભૂમિકા પણ સામે આવી
આ કેસમાં જિતેન્દ્ર સોલંકી અને રફીક ખલીફા પ્લાઝમા પરિવહન સાથે સંકળાયેલા હતા. તેઓ કલેક્શન માટે જતાં પહેલાં મુખ્ય આરોપીને જાણ કરતા હતા. ત્યારબાદ ગેરરીતિપૂર્વક તૈયાર કરાયેલા પ્લાઝમા બેગ સિસ્ટમમાં દાખલ કરવામાં આવતી હતી. તપાસ દરમિયાન મહારાષ્ટ્રમાંથી રેકેટના અન્ય સૂત્રધારની પણ ધરપકડ કરવામાં આવી છે.

લાખો રૂપિયાનો મુદ્દામાલ જપ્ત
પોલીસે દરોડા દરમિયાન 1,140 પ્લાઝ્મા યુનિટ, ડીપ ફ્રીઝર, કેમિકલ બોટલો, સીલિંગ મશીન, ખાલી પ્લાઝમા બેગ તેમજ એક વાહન સહિત કુલ અંદાજે 12.06 લાખ રૂપિયાનો મુદ્દામાલ જપ્ત કર્યો છે. આ તમામ વસ્તુઓનો ઉપયોગ કથિત રીતે ગેરકાયદેસર પ્રવૃત્તિમાં થતો હતો.

ચાર આરોપીઓ પોલીસ કસ્ટડીમાં
દિનેશ ઉમાભાઈ ચૌધરી (રહે. માલોત્રા, તા. ધાનેરા, જિ. બનાસકાંઠા)
મોહન દાજીબા ગાયકવાડ (રહે. દુધાળા, તા. માલેગાંવ, જિ. વાશિમ, મહારાષ્ટ્ર)
રફીક સલામભાઈ (રહે. દાદુસર, તા. ધોળકા, જિ. અમદાવાદ)
જિતેન્દ્ર બલદેવભાઈ સોલંકી (રહે. કાદીપુર, તા. ધોળકા, જિ. અમદાવાદ)

જાહેર આરોગ્ય સાથે ચેડાં કરતો ગંભીર ગુનો
બ્લડ પ્લાઝમા જેવી જીવનરક્ષક સામગ્રીમાં ભેળસેળ કરવી અત્યંત ગંભીર બાબત માનવામાં આવે છે. પોલીસ હવે તપાસ કરી રહી છે કે આ નકલી પ્લાઝમા ક્યાં-ક્યાં પહોંચાડવામાં આવ્યું હતું અને તેમાં અન્ય વ્યક્તિઓ કે સંસ્થાઓની સંડોવણી હતી કે નહીં. આરોગ્ય સુરક્ષાને અસર કરતી આ ઘટના બાદ સંબંધિત એજન્સીઓ પણ સજાગ બની છે.

કેવી રીતે ચાલતું હતું રેકેટ?
તપાસમાં જાણવા મળ્યું કે, મુખ્ય આરોપી દિનેશ ચૌધરી અગાઉ ફાર્માસ્યુટિકલ કંપનીઓમાં બ્લડ પ્લાઝમા કલેક્શન એક્ઝિક્યુટિવ તરીકે કામ કરતો હતો. બ્લડ પ્લાઝમા સંબંધિત પોતાના ટેકનિકલ જ્ઞાનનો ઉપયોગ કરીને તે પ્લાઝ્મા યુનિટમાં ભેળસેળ કરતો હતો.

આરોપી જીતેન્દ્ર સોલંકી અને રફીક ખલીફા બ્લડ પ્લાઝમા કલેક્શન વાહનમાં સહ ડ્રાઇવર તરીકે કામ કરતા હતા. તેઓ મહારાષ્ટ્રના વિવિધ જિલ્લાઓમાંથી પ્લાઝમા કલેક્શન માટે જતા પહેલા દિનેશને જાણ કરતા હતા. ત્યારબાદ દિનેશ ઓર્ડર મુજબ ભેળસેળયુક્ત પ્લાઝમા તૈયાર કરતા હતા.

પ્લાઝમા કલેક્શન પછી, કંપનીને સીધું સપ્લાય કરવાને બદલે, વાહન આરોપીના ઘરે લઈ જવામાં આવતું હતું. ત્યાં, અસલી અને સારી ગુણવત્તાવાળા પ્લાઝમા યુનિટ અલગ રાખવામાં આવ્યા હતા અને તેમની જગ્યાએ, ભેળસેળયુક્ત પ્લાઝમા બેગ ગોઠવીને કંપનીને સપ્લાય કરવામાં આવતી હતી.

છ મહિનાથી રેકેટ ચાલતું હતું
આરોપીઓ ભેગા મળીને છ મહિનાથી નકલી પ્લાઝમાનું રેકેટ ચલાવતા હતા.ઓરિજનલ પ્લાઝમા બજારમાં 2 થી 5 હજાર રૂપિયા સુધીમાં વેચાય છે. આરોપીઓ ઓરિજનલ ચોરી કરી તેની જગ્યાએ નકલી પેક કરીને 1000 થી 3,000 સુધીમાં વેચતા હતા. અત્યાર સુધી નકલી પ્લાઝમા કેટલા દર્દીઓને ચઢાવાયા છે.આરોપીઓએ કઈ હોસ્પિટલમાં પ્લાઝમા સપ્લાય કર્યા છે તે અંગે તપાસ ચાલી રહી છે. પોલીસે 1150 યુનિટ ઓરિજિનલ પ્લાઝમા સહિત કુલ 15 લાખ રૂપિયા નો મુદ્દામાલ કબજે કર્યો છે.

કેન્સરની દવા માટે થાય છે પ્લાઝમાનો ઉપયોગ
પ્લાઝમા બ્લડના મહત્વનો ભાગ છે. પ્લાઝમાનો ઉપયોગ એન્ટી કેન્સર ડ્રગ બનાવવા માટે પણ થાય છે. પ્લાઝમાને એક વખત નીકળ્યા બાદ 18 ડીગ્રી ટેમ્પરેચરમાં રાખવું પડે છે. આરોપીઓ તેને જેમ તેમ રાખતા હતા. કોઈપણ પ્રકારની સાવચેતી વગર ઓરીજનલ પ્લાઝમાને પણ આઈસ બોક્સમાં રાખવામાં આવતું હતું. જેનાથી તે બગડી જવાની પૂરેપૂરી શક્યતા રહેલી છે.