નિકોલમાં 9 વર્ષની બાળકી સાથે વૃદ્ધના અડપલાં

અમદાવાદ શહેરના નિકોલ વિસ્તારમાં એક અત્યંત હૃદયદ્રાવક અને શરમજનક કિસ્સો પ્રકાશમાં આવ્યો છે. દાદા સમાન ઉંમર ધરાવતા એક 65 વર્ષીય વૃદ્ધે નવ વર્ષની માસૂમ બાળકીની છેડતી કરી હોવાની વિગતો સામે આવી છે. વિશ્વાસના સંબંધોને કલંકિત કરતી આ ઘટનામાં નિકોલ પોલીસે તાત્કાલિક કાર્યવાહી કરીને આરોપી વૃદ્ધને જેલના સળિયા પાછળ ધકેલી દીધો છે.

વિશ્વાસનો ગેરલાભ: પરિચિત વૃદ્ધે જ આચર્યું પાપ

આ કમકમાટીભરી ઘટનાની વિગતો મુજબ, ભોગ બનનાર બાળકીની માતા નિકોલ વિસ્તારમાં આવેલી એક દુકાનમાં નોકરી કરે છે. આરોપી વૃદ્ધ પણ આ જ દુકાનમાં સહકર્મચારી તરીકે કામ કરતો હતો. એક જ સ્થળે નોકરી કરતા હોવાને કારણે બાળકીના પરિવારને આ વૃદ્ધ પર પૂરો ભરોસો હતો

ઘટનાના દિવસે બાળકીની માતા દુકાન માલિક સાથે કોઈ કામ અર્થે બહાર ગઈ હતી. આ સમયે બાળકી દુકાનમાં એકલી હતી. માસૂમ બાળકીને એકલી જોઈને આરોપી વૃદ્ધની દાનત બગડી હતી અને તેણે બાળકી સાથે શારીરિક અડપલાં કરવાનું શરૂ કર્યું હતું

સીસીટીવીમાં નરાધમની પોલ ખુલી : 

આ ઘટનાની જાણ ત્યારે થઈ જ્યારે દુકાનદારે પોતાના મોબાઈલ ફોન પર લાઈવ સીસીટીવી ફૂટેજ ચેક કર્યા. કેમેરામાં વૃદ્ધ બાળકી સાથે ગેરવર્તણૂક કરી રહ્યો હોવાનું સ્પષ્ટ દેખાયું હતું. દુકાનદારે વિલંબ કર્યા વગર ત્યાં હાજર અન્ય લોકોને જાણ કરી હતી, જે બાદ લોકોએ દોડી જઈને બાળકીને વૃદ્ધના પંજામાંથી છોડાવી હતી.

નિકોલ પોલીસની કડક કાર્યવાહી : 

પોતાની દીકરી સાથે થયેલા અન્યાય બાદ માતાએ હિંમત દાખવીને તાત્કાલિક નિકોલ પોલીસ સ્ટેશનમાં ફરિયાદ નોંધાવી હતી. પોલીસે મામલાની ગંભીરતાને ધ્યાનમાં રાખીને આરોપી સામે પોક્સો (POCSO) એક્ટ હેઠળ ગુનો દાખલ કર્યો છે.

ત્વરિત ધરપકડ: ફરિયાદ મળ્યાના ગણતરીના કલાકોમાં જ પોલીસે 65 વર્ષીય આરોપીની ધરપકડ કરી લીધી છે.

સીસીટીવી પુરાવા: પોલીસે દુકાનના સીસીટીવી ફૂટેજને પુરાવા તરીકે કબજે લીધા છે, જે કોર્ટમાં આરોપીને સજા અપાવવા માટે મુખ્ય આધાર બનશે.

સમાજ માટે લાલબત્તી સમાન કિસ્સો : 

આ ઘટના ફરી એકવાર વાલીઓને ચેતવણી આપી રહી છે કે બાળકોને પરિચિત વ્યક્તિઓ પાસે એકલા મૂકવા પણ જોખમી સાબિત થઈ શકે છે. ટેકનોલોજીના ઉપયોગથી દુકાનદારે સમયસર આ કૃત્ય અટકાવ્યું, જેના કારણે મોટી હોનારત ટળી હતી. હાલ પોલીસ આ કેસમાં વધુ ઊંડાણપૂર્વક તપાસ કરી રહી છે કે આરોપીએ અગાઉ પણ આવી કોઈ હરકત કરી હતી કે કેમ