રાજકોટના શાપરમાં વૃદ્ધને બંધક બનાવી કરોડોની લૂંટ

રાજકોટ જિલ્લાના શાપર-વેરાવળ વિસ્તારમાં કરોડો રૂપિયાની લૂંટની ઘટનાથી ચકચાર મચી ગઈ છે. શુક્રવારે મોડી રાત્રે અજાણ્યા બુકાનીધારીઓએ વૃદ્ધને બંધક બનાવી કરોડો રૂપિયાની રોકડ રકમ અને સોનાના દાગીનાની લૂંટ ચલાવી હતી. ઘટના બાદ પોલીસના ઉચ્ચ અધિકારીઓએ સ્થળ પર પહોંચી તપાસ શરૂ કરી છે.

શાપર-વેરાવળ વિસ્તારમાં કરોડોની લૂંટની ઘટના બનતાં ખળભળાટ મચી ગયો છે. 77 વર્ષિય જીતેન્દ્રસિંહ અજીતસિંહ જાડેજાને 19 જૂનની રાત્રે 1 વાગ્યાની આસપાસ બંધક બનાવી 2.47 કરોડ રોકડ તેમજ 2 લાખના સોનાના દાગીનાની લૂંટ કરી 5 થી 7 જેટલા બુકાનીધારી શખ્સો ફરાર થઈ ગયા છે.

ભોગ બનનાર જીતેન્દ્રસિંહ જાડેજાએ જણાવ્યું કે, દરવાજો તોડી ચાર-પાંચ જણા અંદર ઘૂસી ગયા હતા. અવાજ થયો એટલે હું જાગી ગયો. એક જણાએ મને મુક્કો મારીને પાડી દીધો પછી મોઢે ડૂચો દીધો અને પછી એ લોકોએ ઘરમાં લૂંટ ચલાવી હતી. 2 કરોડ 47 લાખ રોકડાં, 2 લાખનું સોનું, એક રાઇફલ અને એક નાનો મોબાઈલ ચોરી કરી જતા રહ્યા છે.

લૂંટની ઘટનાના પગલે સમગ્ર પંથકમાં ભયનો માહોલ છે. ફરિયાદી વિજેન્દ્રસિંહ જાડેજા ખેતી, પેટ્રોલ પંપ અને પ્લોટિંગના વ્યવસાય સાથે સંકળાયેલા છે. પ્રાથમિક તપાસમાં માહિતી મળી છે કે તેમની પાસે જમીન વેચાણની રોકડ પડી હતી. તેથી કોઈ જાણભેદુએ લૂંટને અંજામ આપ્યો હોવાનું મનાઈ રહ્યું છે.

ઘટનાની જાણ થતા રાજકોટ ગ્રામ્ય એસપી સહિતના ઉચ્ચ અધિકારીઓ ઘટનાસ્થળે દોડી ગયા છે. એલસીબી, સ્થાનિક પોલીસની જુદી જુદી ટીમો બનાવી આરોપીઓની શોધખોળ શરૂ કરાઈ છે. બનાવ સ્થળની આસપાસના સીસીટીવી ફૂટેજની તપાસ કરાઈ રહી છે.

જાડેજા પરિવાર ખેતી, પેટ્રોલ પંપ તેમજ પ્લોટિંગના વ્યવસાય સાથે સંકળાયેલો છે. લૂંટનો ભોગ બનેલા જીતેન્દ્રસિંહના પુત્ર જયવીરસિંહ જાડેજા ઉર્ફે ટીનુભા જાડેજાની માલિકીનો શાપર વેરાવળમાં પેટ્રોલ પંપ છે. શાપર-વેરાવળ પોલીસ સ્ટેશન ખાતે ફરિયાદ નોંધવાની તજવીજ શરૂ કરાઈ છે.

રાજકોટ રેન્જ આઇજી નિર્લિપ્ત રાયે જણાવ્યું કે, રાત્રિના સમયે ધાડનો બનાવ બન્યો છે. બનાવ સંદર્ભે એફએસએલ, ડોગ સ્ક્વોડ, ફિંગરપ્રિન્ટ એક્સપર્ટની મદદ લેવામાં આવી રહી છે. સીસીટીવી ફૂટેજ પણ તપાસવાની કામગીરી ચાલી રહી છે. આશરે પાંચ જેટલા શખ્સોએ ગુનાને અંજામ આપ્યો છે. વહેલી તકે આરોપીઓ ઝડપાય તે પ્રકારે પોલીસ દ્વારા કાર્યવાહી હાથ ધરવામાં આવી છે.