ખંભાતના સોખડા જીઆઇડીસીની કેમિકલ કંપનીમાંથી 100 કરોડનું ડ્રગ્સ પકડાયું

ગુજરાતમાં વધુ એક ડ્રગ્સ બનાવતી ફેકટરી ઝડપાતા ખળભળાટ મચી ગયો છે. ગુજરાત એટીએસની ટીમે ગુરુવારે રાત્રે આણંદ જિલ્લાના ખંભાતમાં સોખડા જીઆઇડીસી વિસ્તારમાં આવેલી એક ફેક્ટરીમાં દરોડા પાડીને કરોડો રુપિયાનું ડ્રગ્સ જપ્ત કર્યું છે. 

મળી રહેલી માહિતી મુજબ સોખડા જીઆઇડીસીમાં આવેલી કેમિકલ બનાવતી કંપનીમાં ગુજરાત એટીએસની ટીમે 48 કલાક સુધી વોચ રાખી દરોડા પાડ્યા હતા. આ દરોડામાં 100 કરોડથી વધુનું ડ્રગ્સ મળ્યું હોવાની માહિતી મળી રહી છે. 

પોલીસે ફેક્ટરીમાં કામ કરી રહેલા 5 શખ્સોને પણ ડ્રગ્સ સાથે ઝડપી પાડ્યા છે અને તેની તપાસ ચાલી રહી છે. મળેલી માહિતી મુજબ આલ્ફાઝોરમ નામની દવાની ટેબ્લેટ ફોર્મેટમાં આ ડ્રગ્સ મળ્યું છે. મુળ અમદાવાદના ત્રણ શખ્સોએ ત્રણ મહિનાથી આ ફેક્ટરી શરુ કરી હતી. પોલીસ પકડાયેલા 5 શખ્સોને અમદાવાદ લાવીને હાલ પૂછપરછ કરી રહી છે.

ગુજરાત હવે નશીલા ડ્રગ્સના કારોબારનું હબ બની રહ્યું છે કારણ કે અલગ અલગ વિસ્તારમાં ડ્રગ્સ બનાવતી ફેક્ટરીઓ ઝડપાઇ રહી છે. જો કે પોલીસ તંત્ર એલર્ટ હોવાથી  ડ્રગ્સની ફેક્ટરીઓ પકડાઇ રહી છે પણ હજું પણ ડ્રગ્સના કાળો કારોબાર પણ બ્રેક લગાવી શકાઇ નથી. હજું પણ પોલીસ તપાસમાં આ ફેક્ટરી વિશે તોંકાવનારી માહિતી મળી શકે છે.