એલોવેરા પાવડરના નામે ડ્રગ્સ નિકાસ કૌભાંડ પકડાયું

ગુજરાત એન્ટી ટેરરિસ્ટ સ્ક્વોડ(ATS)એ પ્રતિબંધિત સાયકોટ્રોપિક ડ્રગ્સ 'એટોમિડેટ'ને હર્બલ અને ફાર્માસ્યુટિકલ પ્રોડક્ટ્સના નામે દક્ષિણ-પૂર્વ એશિયાના દેશોમાં ગેરકાયદે નિકાસ કરતા આંતરરાષ્ટ્રીય રેકેટનો પર્દાફાશ કર્યો છે. સુરતના ત્રણ વેપારીઓ મુંબઈ એરપોર્ટના એર કાર્ગો મારફતે મલેશિયા, થાઈલેન્ડ અને સિંગાપોરમાં નશીલા પદાર્થોનો જથ્થો મોકલતા હતા. ATSએ નિકુંજ ગઢિયા નામના વેપારીની ધરપકડ કરીને વધુ તપાસ હાથ ધરી છે.

ATSના DySPને મળેલી સચોટ બાતમીના આધારે સમગ્ર ઓપરેશન હાથ ધરાયું હતું. તપાસમાં બહાર આવ્યું કે, આરોપીઓ ડ્રગ્સના કન્સાઈનમેન્ટ પર 'એલોવેરા પાવડર', 'ગિનોપોલ-24 પાવડર' અને અન્ય હર્બલ પાવડરના ખોટા લેબલ લગાવી કસ્ટમ્સની નજરથી બચતા હતા. આ માટે તેઓ નકલી શિપિંગ અને કસ્ટમ્સ દસ્તાવેજો પણ તૈયાર કરતા હતા.

નશીલી દવાના આંતરરાષ્ટ્રીય ષડયંત્રમાં સુરતની કંપની બાયોસાયન્સના માલિક નિકુંજભાઈ હરેશભાઈ ગઢિયા, રુદ્ર એન્ટરપ્રાઈઝના સંચાલક ચેતનભાઈ કનુભાઈ વાવડિયા અને જાની ફાર્માના માલિક.ભૌતિક દામજીભાઈ પદમણીના નામ ખૂલ્યા છે.

ગુજરાત ATSના અધિકારીઓની પૂછપરછમાં આરોપીઓએ મલેશિયાના ડ્રગ્સ કાર્ટેલ સાથે સંકળાયેલા 'ચુઆ ઝી ઝુઆન' નામના શખ્સ સાથેના સંબંધોની કબૂલાત કરી છે. ગુજરાત ATSએ ભારતીય ન્યાય સંહિતાની વિવિધ કલમો હેઠળ ગુનો નોંધી નિકુંજ ગઢિયાની ધરપકડ કરી છે. જ્યારે અન્ય આરોપીઓની શોધખોળ હાથ ધરી છે.

કેવી રીતે સમગ્ર ષડયંત્રનો થયો પર્દાફાશ?

ATSએ મુંબઈ કસ્ટમ્સ કમિશનરેટ અને કુરિયર કંપની ફેડેક્સનો સંપર્ક કરી શંકાસ્પદ કન્સાઈનમેન્ટ અટકાવ્યા હતા. રામન સ્પેક્ટ્રોસ્કોપી ટેસ્ટ દ્વારા ખાતરી કરવામાં આવી હતી કે, જપ્ત કરાયેલો પદાર્થ ખરેખર પ્રતિબંધિત 'એટોમિડેટ' પાવડર જ છે. મલેશિયા અને સિંગાપોર જેવા દેશોમાં આ ડ્રગ્સ પર  પ્રતિબંધ છે.

પોલીસ તપાસમાં બહાર આવ્યું છે કે, નિકુંજ ગઢિયાએ આશરે 50 કિલો એટોમિડેટ પાવડર હર્બલ પાવડરના નામે મલેશિયા મોકલ્યું હતું. ચેતન વાવડિયાએ 50 કિલો પાવડર 'ગિનોપોલ-24'ના નામે મલેશિયા અને થાઈલેન્ડ એક્સપોર્ટ કર્યું હતું. જ્યારે ભૌતિક પદમણીએ 25 કિલો ડ્રગ્સ એલોવેરા પાવડર તરીકે મોકલ્યું હતું. આંતરરાષ્ટ્રીય બજારમાં આ ડ્રગ્સની કિંમત પ્રતિ કિલો 4,000થી 5,000 ડોલર (આશરે 3.30 થી 4.10 લાખ રૂપિયા) હોવાનું મનાય છે.