વલસાડ જિલ્લાના અટગામ વિસ્તારમાં ડ્રગ્સ મેન્યુફેક્ચરિંગનું એક મોટું રેકેટ પકડાયું છે. ડિરેક્ટોરેટ ઓફ રેવન્યુ ઇન્ટેલિજન્સ (DRI)એ "ઓપરેશન વ્હાઇટ કૌલ્ડ્રન" હેઠળ મોટી કાર્યવાહી કરીને એક ગુપ્ત ડ્રગ્સ ફેક્ટરીનો પર્દાફાશ કર્યો છે. NDPS એક્ટ હેઠળ પ્રતિબંધિત&nbsp;Alprazolamનું ગેરકાયદે ઉત્પાદન કરતી આ ફેક્ટરીમાંથી DRIએ આશરે ₹22&nbsp;કરોડની કિંમતનો પ્રવાહી અને સેમી-ફિનિશ્ડ ડ્રગ્સનો જથ્થો જપ્ત કર્યો છે.
કુલ 114 કિલો જથ્થો જપ્ત
ગુપ્ત માહિતીના આધારે, DRI અધિકારીઓએ વલસાડના અટગામ વિસ્તારમાં, ગુજરાત સ્ટેટ હાઇવે (SH) 701ની નજીક આવેલા આ સ્થળ પર નજર રાખી હતી. 4 નવેમ્બર, 2025ના રોજ હાથ ધરાયેલા સંકલિત દરોડામાં, એક પૂર્ણ-કદના ગેરકાયદે મેન્યુફેક્ચરિંગ યુનિટનો પર્દાફાશ થયો હતો, જે લાયસન્સ વિના છેલ્લા એક વર્ષથી ચાલતું હતું.
આ રેડમાં કુલ 114 કિલોગ્રામના જથ્થામાં Alprazolam, આ ઉપરાંત, 431 કિલોગ્રામ જેટલો કાચો માલ જેમાં ફોસ્ફરસ અને હાયડ્રોક્લોરિક એસીડ જેવા બીજા અનેક કેમિલ્સનો જથ્થો કબજે કરવામાં આવ્યો છે. ઔદ્યોગિક રેફ્રિજરેશન યુનિટ સહિત સંપૂર્ણ ઔદ્યોગિક સ્તરનું પ્રોસેસિંગ સેટઅપની મશીનરી પણ કબજે કરી છે.&nbsp;
DRI એ આ કાર્યવાહીમાં ફેક્ટરીના બે મુખ્ય માલિકો/ફાઇનાન્સર્સ ચંદ્રકાન્ત કેછડા અને અશોક મુળજી પીઠારીયા સહિત એક વર્કર અને ડ્રગ્સ લેવા આવેલ ઇરાદાપૂર્વકના ગ્રાહકની પણ ધરપકડ કરી છે. ગ્રાહક તેલંગાણાથી ડ્રગ્સ લેવા આવ્યો હતો, જેનાથી આ રેકેટનું મલ્ટિ-સ્ટેટ કનેક્શન બહાર આવ્યું છે.
પ્રાથમિક તપાસમાં બહાર આવ્યું છે કે, આ Alprazolamનો જથ્થો તેલંગાણામાં 'ટોડી' નામના દારૂમાં ભેળવવા માટે મોકલવાનો હતો. ઉલ્લેખનીય છે કે, DRIએ ઓગસ્ટ 2025માં આંધ્રપ્રદેશના અનાકાપલ્લીમાં પણ આવું જ Alprazolam મેન્યુફેક્ચરિંગ યુનિટ ઝડપ્યું હતું, જેનો જથ્થો પણ ટોડીમાં ભેળવવા માટે તેલંગાણા મોકલાવાનો હતો.
તમામ 4 આરોપીઓને 3 દિવસના રિમાન્ડ પર લઈને DRI દ્વારા સપ્લાય ચેઇન અને વેચાણ નેટવર્ક અંગે વધુ તપાસ હાથ ધરવામાં આવી છે. આ સફળતા કેન્દ્ર સરકારના 'નશા મુક્ત ભારત અભિયાન'ને વધુ વેગ આપશે.

વલસાડમાં DRIએ ડ્રગ્સ રેકેટનો પર્દાફાશ કર્યો!

અટગામમાં ગુપ્ત રીતે ચાલતી ડ્રગ્સ મેન્યુફેક્ચરિંગ ફેક્ટરી ઝડપાઈ, 4 આરોપી રિમાન્ડ પર

November 6, 2025 | 16:49 IST