ઉત્તર પ્રદેશ, હરિયાણા અને જમ્મુ-કશ્મીર સુધી ફેલાયેલા એક ખતરનાક આતંકી નેટવર્કનો પર્દાફાશ થતાં જ સુરક્ષા એજન્સીઓ હાઈ એલર્ટ પર આવી ગઈ છે. ફરીદાબાદથી ધરપકડ કરાયેલી અને મૂળ લખનઉની રહેવાસી મહિલા ડૉક્ટર શાહીન શાહિદએ પૂછપરછ દરમિયાન ચોંકાવનારા ખુલાસા કર્યા છે.
ડૉ. શાહીનની કબૂલાત
જમ્મુ-કશ્મીર પોલીસની કસ્ટડીમાં ડૉ. શાહીને કબૂલ્યું કે, તે પાકિસ્તાન સ્થિત આતંકી સંગઠન જૈશ-એ-મોહમ્મદ માટે કામ કરી રહી હતી. તેના જણાવ્યા અનુસાર, સંગઠનના અન્ય સભ્યો છેલ્લા 2 વર્ષથી મોટા પ્રમાણમાં વિસ્ફોટકોનો જથ્થો ભેગો કરી રહ્યા હતા, જેથી દિલ્હી, લખનઉ અને અન્ય મુખ્ય શહેરોમાં મોટા ધમાકા કરી શકાય. આ સનસનીખેજ ખુલાસાએ રાષ્ટ્રીય સુરક્ષા તંત્રને હચમચાવી દીધું છે અને આતંકી ષડયંત્રની ગંભીરતા દર્શાવી છે.
ભારતમાં મહિલાઓને ઉગ્રવાદી બનાવવાનું કામ
ડૉ. શાહીન શાહિદ, જે કાનપુરની ગણેશ શંકર વિદ્યાર્થી મેડિકલ કોલેજ (GSVM)માં ભૂતપૂર્વ આસિસ્ટન્ટ પ્રોફેસર રહી ચૂકી છે, તે જૈશ-એ-મોહમ્મદની મહિલા વિંગ 'જમાત-ઉલ-મોમિનાત'ના મુખ્ય સભ્ય હતી. આ વિંગ પાકિસ્તાનમાં જૈશના વડા મસૂદ અઝહરની બહેન સાદિયા અઝહર દ્વારા ચલાવવામાં આવે છે. શાહીનનું કામ ભારતમાં મહિલાઓને ઉગ્રવાદી બનાવીને આતંકી પ્રવૃત્તિઓમાં ભરતી કરવાનું હતું. પૂછપરછમાં તેણે સ્વીકાર્યું કે તે ફરીદાબાદ ટેરર મોડ્યુલ દ્વારા હથિયારો અને વિસ્ફોટકોની સપ્લાય સુનિશ્ચિત કરી રહી હતી.
9 નવેમ્બરે શાહીનની &nbsp;કરી ધરપકડ
પોલીસ સૂત્રોના જણાવ્યા અનુસાર, શાહીનની ધરપકડ 9 નવેમ્બરે ફરીદાબાદથી કરવામાં આવી હતી, જ્યારે તેની કારમાંથી એક AK-47 રાઈફલ, જીવતા કારતૂસ અને શંકાસ્પદ સામગ્રી મળી આવી હતી. તે ધરપકડ કરાયેલા ડૉ. મુઝમ્મિલની ગર્લફ્રેન્ડ અને મુખ્ય સહયોગી હતી. ડૉ. શાહીને ખુલાસો કર્યો કે મુઝમ્મિલ, સહારનપુરથી પકડાયેલા ડૉ. આદિલ અને દિલ્લી બ્લાસ્ટના કથિત ફિદાયીન ડૉ. ઉમર નબી મળીને અનેક ધમાકાની યોજના બનાવી રહી હતી. ડૉ. ઉમરને સૌથી કટ્ટર ગણાવવામાં આવ્યો, જે અવારનવાર 'ધમાકાની તૈયારી' વિશે ચર્ચા કરતો હતો. શાહીને એમ પણ માન્યું કે, દિલ્હીના લાલ કિલ્લા નજીક તાજેતરનો કાર બ્લાસ્ટ, જેમાં 10 લોકોના મોત થયા હતા, તે પણ આ જ મોડ્યુલ સાથે સંકળાયેલો હોઈ શકે છે.
2,900 કિલોથી વધુ IED સામગ્રી મળી
આ આતંકી મોડ્યુલ છેલ્લા 2 વર્ષથી ફરીદાબાદના દૈનિક મજૂરોના ઘરોમાં વિસ્ફોટકો છુપાવીને જમા કરી રહ્યું હતું. અત્યાર સુધીની દરોડામાં 2,900 કિલોથી વધુ IED સામગ્રી, હથિયારોનો જથ્થો અને વાંધાજનક દસ્તાવેજો મળી આવ્યા છે. શાહીને જણાવ્યું કે, દિલ્હી ઉપરાંત લખનઉ, કાનપુર, અલીગઢ અને શ્રીનગર જેવા શહેરો નિશાન પર હતા. નિશાન પર ધાર્મિક સ્થળો, બજારો અને સરકારી ઈમારતો હતા.
શાહીનનું 'વ્હાઈટ કોલર' બેકગ્રાઉન્ડ
આ નેટવર્ક જૈશ-એ-મોહમ્મદની સાથે-સાથે અંસાર ગઝવાત-ઉલ-હિંદ સાથે પણ જોડાયેલું હતું, અને તેમને પાકિસ્તાનથી ફંડિંગ અને નિર્દેશો મળી રહ્યા હતા. જમ્મુ-કશ્મીર પોલીસના જણાવ્યા મુજબ, ડૉ. શાહીનનું 'વ્હાઈટ કોલર' બેકગ્રાઉન્ડ આ મોડ્યુલને વધુ ખતરનાક બનાવતું હતું. ભણેલા-ગણેલા વ્યાવસાયિકોનો ઉપયોગ ભરતી અને લોજિસ્ટિક્સ માટે થઈ રહ્યો હતો.&rdquo; ધરપકડ કરાયેલા ઈસમોની સંખ્યા હવે 8 થઈ ગઈ છે, જેમાં શાહીનનો ભાઈ ડૉ. પરવેઝ શાહિદ અંસારી પણ સામેલ છે, જેને યુપી ATSએ ઈન્ટીગ્રલ યુનિવર્સિટીમાંથી રાજીનામું આપ્યાના એક અઠવાડિયા બાદ કસ્ટડીમાં લીધો હતો.
ફડિંગ અને સંપર્કોમાં સહયોગ
પરવેઝ પર ફંડિંગ અને સંપર્કોમાં સહયોગનો શક છે. આ ખુલાસા બાદ રાષ્ટ્રીય તપાસ એજન્સી અને યુપી ATSએ સંયુક્ત તપાસ શરૂ કરી દીધી છે. ડૉ. શાહીનના બેંક ટ્રાન્ઝેક્શન, કોલ રેકોર્ડ અને જમ્મુ-કશ્મીરની મુસાફરીની તપાસ થઈ રહી છે. સૂત્રોના જણાવ્યા અનુસાર, દિલ્હી કાર બ્લાસ્ટ અને ફરીદાબાદ મોડ્યુલ વચ્ચે સીધો સંબંધ મળ્યો છે. કશ્મીરમાં 19 ઓક્ટોબરે લાગેલા જૈશના ધમકીભર્યા પોસ્ટરોથી આ આતંકી ષડયંત્રની શરૂઆત થઈ હતી.

દિલ્લી બોમ્બ બ્લાસ્ટ

છેલ્લા 2 વર્ષથી મોટા પાયે વિસ્ફોટકો એકઠા કરવામાં આવી રહ્યાની કરી કબૂલાત

November 12, 2025 | 16:27 IST