Delhi:ડબલ મર્ડર કેસ, ઠપકો આપવા બદલ નોકરે કરી હત્યા 

દિલ્હીના લાજપત નગર વિસ્તારમાં કંપાવી નાખે તેવી ઘટના પ્રકાશમાં આવી છે. એક મહિલા અને તેના સગીર પુત્રની ક્રૂરતાથી હત્યા કરવામાં આવી હતી. બુધવારે સવારે બંનેના મૃતદેહ મળી આવ્યા હતા. ડબલ મર્ડરની આ ઘટના મંગળવારે મોડી રાત્રે બની હોવાનું માનવામાં આવે છે. મૃતકોની ઓળખ 42 વર્ષીય રુચિકા અને તેના 14 વર્ષીય પુત્ર ક્રિશ તરીકે થઈ છે. ઘરનો મુખ્ય દરવાજો બહારથી બંધ હતો.

આ ઘટનાની જાણ મૃતક મહિલાના પતિ દ્વારા કરવામાં આવી હતી, જે રાત્રે ઘરે પહોંચ્યો હતો. તેણે ઘરનો દરવાજો બહારથી બંધ જોયો. ઘણી વાર ખટખટાવ્યા પછી પણ કોઈ જવાબ ન મળતાં તેણે પોલીસને જાણ કરી. પોલીસ ઘટનાસ્થળે પહોંચી અને દરવાજો તોડયા બાદ અંદરનું દ્રશ્ય જોઈને બધા દંગ રહી ગયા.

પોલીસ અધિકારીના કહવા મુજબ, રુચિકાનો મૃતદેહ બેડરૂમમાં મળી આવ્યો અને પુત્ર ક્રિશનો મૃતદેહ બાથરૂમની અંદર લોહીથી લથપથ મળી આવ્યો હતો. બંનેની હત્યા તીક્ષ્ણ હથિયારથી કરવામાં આવી હતી. ઘટનાસ્થળ પરથી એવું લાગે છે કે બંનેની હત્યા આયોજનબદ્ધ રીતે કરવામાં આવી હતી. પોલીસને શંકા હતી કે ઘરનો નોકર આ ગુનામાં સામેલ હોઈ શકે છે જે ઘટના પછી ભાગી ગયો હતો.

માહિતી મળ્યા બાદ, ફોરેન્સિક ટીમ ઘટનાસ્થળે પહોંચીને તપાસ શરૂ કરી અને આસપાસના CCTV ફૂટેજ સ્કેન કર્યા. પોલીસે હત્યાનો ગુનો નોંધીને તપાસ શરૂ કરી અને ફરાર નોકરની શોધખોળ તેજ કરી. આ ડબલ મર્ડરથી વિસ્તારમાં સનસનાટી મચી ગઈ છે અને લોકો ચોંકી ગયા છે કે ઘરની અંદર આવો ગુનો આચરવામાં આવ્યો હતો.