CBI એ 1000 કરોડનું સાયબર ફ્રોડ નેટવર્ક ઝડપાયું

કેન્દ્રીય તપાસ એજન્સી (CBI) એ દેશ અને વિદેશમાંથી સંચાલિત થતા એક વિશાળ સાયબર ફ્રોડ નેટવર્કનો પર્દાફાશ કરીને રૂ. 1000 કરોડથી વધુના કૌભાંડને ઝડપી પાડ્યું છે. CBIએ 'ઓપરેશન ચક્ર-૫' હેઠળ ૬ રાજ્યોમાં ૨૭ ઠેકાણાઓ પર દરોડા પાડીને આ ગુનાહિત નેટવર્કને તોડી પાડ્યું છે.

કૌભાંડની મોડસ ઓપરેન્ડી:

તપાસ એજન્સીએ ૪ વિદેશી નાગરિકો સહિત ૧૭ આરોપીઓ વિરુદ્ધ ચાર્જશીટ દાખલ કરી છે. આ નેટવર્ક હજારો સામાન્ય નાગરિકોને ભ્રામક લોન એપ, નકલી રોકાણ યોજના, પોન્ઝી સ્કીમ, પાર્ટટાઇમ જોબ ઓફર અને ઓનલાઈન ગેમિંગ પ્લેટફોર્મ દ્વારા છેતરીને પૈસા પડાવતું હતું.

આ ગુનેગારો લોકોને છેતરવા માટે હાઈ-ટેક ટેકનોલોજી, જેમ કે ગુગલ એડ્સ, બલ્ક SMS, સીમ-બોક્સ સિસ્ટમ અને ક્લાઉડ ઈન્ફ્રાસ્ટ્રક્ચરનો ઉપયોગ કરતા હતા.

બનાવટી કંપનીઓનું નેટવર્ક:

CBIની તપાસમાં સામે આવ્યું છે કે આ સાયબર ફ્રોડ નેટવર્ક હેઠળ 111 બનાવટી કંપનીઓ બનાવવામાં આવી હતી. આ કંપનીઓ નકલી ડાયરેક્ટર, દસ્તાવેજો અને સરનામા હેઠળ રજિસ્ટર્ડ હતી. છેતરપિંડીથી મેળવેલા નાણાંને ગુનેગારો આ બનાવટી કંપનીઓના બેંક એકાઉન્ટ અને પેમેન્ટ ગેટવે મર્ચેન્ટ એકાઉન્ટમાં ટ્રાન્સફર કરીને ડાયવર્જન કરી દેતા હતા.

તપાસમાં બહાર આવ્યું છે કે એક બેંક એકાઉન્ટમાં જ ઓછામાં ઓછા રૂ. ૧૫૨ કરોડથી વધુની રકમ જમા થઈ હતી.

CBIએ કર્ણાટક, તમિલનાડુ, કેરળ, આંધ્રપ્રદેશ, ઝારખંડ અને હરિયાણામાં કાર્યવાહી કરીને ૫૮ કંપનીઓ સામે કેસ નોંધ્યો છે. દરોડા દરમિયાન અનેક ડિજિટલ ડિવાઈસ અને નાણાંકીય રેકોર્ડ જપ્ત કરાયા છે, જેની ફોરેન્સિક તપાસમાં સમગ્ર નેટવર્ક વિદેશથી ઓપરેટ થતું હોવાનું સામે આવ્યું છે.