વૈજ્ઞાનિકના ઘરમાં ચોરી, 9.63 લાખ રૂપિયાની ચોરી

ગાંધીનગર નજીક રાયસણ સ્થિત ઇન્સ્ટિટ્યૂટ ઑફ સિસ્મોલોજિકલ રિસર્ચ (ISR)માં પ્રોજેક્ટ વૈજ્ઞાનિક તરીકે ફરજ બજાવતા રશ્મિ સિંહ મંડલના નિવાસસ્થાનેથી લાખો રૂપિયાના સોના-ચાંદીના દાગીનાની ચોરી થઈ હોવાનો કિસ્સો સામે આવ્યો છે.

દિવાળીની રજાઓ દરમિયાન પરિવાર ગોવા ગયો હતો, તે સમયગાળામાં અંદાજે ₹ 9.63 લાખના ઘરેણાંની ચોરી થઈ હતી. પરિવાર જ્યારે 23 ઓક્ટોબરે ઘરે પાછો ફર્યો, ત્યારે મુખ્ય દરવાજાનું તાળું તૂટેલું હતું અને બેડરૂમમાં તિજોરી ખુલ્લી પડેલી હતી, જેમાંથી સોનાની ચેઇન, કાનની બુટ્ટીઓ, મંગળસૂત્ર અને ચાંદીની ચેઇન સહિત કિંમતી વસ્તુઓ ગાયબ હતી.

ચોરીમાં બાળકની સંભાળકર્તા શંકાના દાયરામાં

ચોરીની આ ઘટનામાં પરિવાર દ્વારા રાખવામાં આવેલી સંભાળકર્તા (Caretaker) રવીના યાદવની ભૂમિકા શંકાના દાયરામાં છે. રશ્મિ મંડલે 'સ્ટાફ બજાર' નામની એજન્સી મારફતે છેલ્લા બે મહિનાથી રાજસ્થાનની રવીનાની તેના ત્રણ વર્ષના પુત્રની દેખભાળ માટે નિમણૂક કરી હતી.

જ્યારે પરિવાર 17 ઓક્ટોબરે ગોવા ગયો ત્યારે રવીનાને પણ રજા આપવામાં આવી હતી. ફરિયાદમાં ઉલ્લેખ છે કે રવીનાએ અગાઉ પગારની તારીખ પહેલા તેના એક પુરુષ મિત્ર માટે પૈસાની માંગણી પણ કરી હતી. સોસાયટીના સુરક્ષાકર્મીઓએ પણ જણાવ્યું હતું કે રવીનાની અવરજવર નિયમિત હતી.

ફરાર સંભાળકર્તાએ ધમકીભર્યો મેસેજ મોકલ્યો

ચોરીની ઘટના બાદ રશ્મિ મંડલે રવીનાનો સંપર્ક કરવાનો પ્રયાસ કર્યો હતો. રવીનાએ પોતે રાજસ્થાનમાં હોવાનું કહી ફોન કાપી નાખ્યો હતો. ત્યાર બાદ તેણે મેસેજ કરીને ધમકી આપી હતી કે જો તેના વિરુદ્ધ ફરિયાદ કરવામાં આવશે, તો તે બદનક્ષીનો કેસ દાખલ કરશે.

આ ઘટના બાદ રશ્મિ મંડલે ઇન્ફોસિટી પોલીસ સ્ટેશનમાં બિનવારસ ચોરી અંગે ફરિયાદ નોંધાવી છે. પોલીસે ગુનો નોંધીને કેરટેકર રવીના યાદવની શોધખોળ અને ચોરીની તપાસ શરૂ કરી દીધી છે.