બેંક ઓફ બરોડા છેતરપિંડી કેસઃ 4 આરોપીને સજા

અમદાવાદમાં બેંક ઓફ બરોડા સાથે રૂપિયા 3.48 કરોડના છેતરપિંડી કેસમાં સ્પેશ્યલ CBI કોર્ટે 4 આરોપીઓને ત્રણ વર્ષ કેદની સજા કરી છે. આ ઉપરાંત 50 હજારનો દંડ પણ ફટકાર્યો છે. સીબીઆઈ કોર્ટે મનોજ તંતી, પરેશ તંતી, શ્રીમતી પૂર્વા પરેશભાઈ તંતી અને મેસર્સ પીએમ માર્કેટિંગ, અમદાવાદના ભાગીદાર શ્રીમતી લીલાવતી તંતીને ઉપરોક્ત સજા ફટકારી છે.

સીબીઆઈએ 30 સપ્ટેમ્બર 2008ના રોજ બેંક ઓફ બરોડા સાથે રૂપિયા 3.48 કરોડની છેતરપિંડીનો ગુનો નોંધીને તપાસ હાથ ધરી હતી. જેમાં આરોપીઓ મનોજ બી. તંતી, પરેશ એમ. તંતી, શ્રીમતી પૂર્વા પરેશભાઈ તંતી અને શ્રીમતી લીલાવંતી સુરેશભાઈ તંતી હતા.

મેસર્સ પીએમ માર્કેટિંગ, અમદાવાદના ભાગીદાર લીલાવંતી એમ. તંતીએ બેંક ઓફ બરોડા પાસેથી રૂ. ૩ કરોડની રોકડ ક્રેડિટ સુવિધા મેળવવા માટે બનાવટી દસ્તાવેજ રજૂ કર્યા હતા. આરોપીઓએ સ્ટેટ બેંક ઓફ ઈન્ડિયા પાસેથી અગાઉ મેળવેલી કેશ ક્રેડિટ સુવિધાની હકીકત છુપાવી કેશ ક્રેડિટ સુવિધાનો લાભ લીધો હતો. બેંક ઓફ બરોડા સાથે રૂપિયા 3.48 કરોડની છેતરપિંડી કરી બેંકને નુકસાન કરી પોતાને ખોટો ફાયદો પહોંચાડ્યો હતો.

સીબીઆઈની તપાસમાં જાણવા મળ્યું કે, મેસર્સ પીએમ માર્કેટિંગના ભાગીદારોએ બનાવટી નાણાકીય દસ્તાવેજો રજૂ કરવાના આધારે બેંક ઓફ બરોડા પાસેથી રોકડ ક્રેડિટ સુવિધા મેળવી હતી. તપાસમાં એ પણ જાણવા મળ્યું છે કે, આરોપીઓએ સ્ટેટ બેંક ઓફ ઈન્ડિયાના અધિકારીઓ સાથે કાવતરામાં રહીને બેંક ઓફ બરોડા પાસેથી મેળવેલી અગાઉની રોકડ ક્રેડિટ સુવિધાની હકીકત છુપાવીને બેંક ઓફ બરોડા પાસેથી મેળવેલી કેશ ક્રેડિટ સુવિધાનો લાભ લીધો હતો.

સીબીઆઈએ તપાસ બાદ 11 ડિસેમ્બર 2009 ના રોજ આરોપીઓ સામે ચાર્જશીટ દાખલ કરી હતી. સ્પેશ્યલ સીબીઆઈ કોર્ટમાં ટ્રાયલ ચાલ્યા બાદ કોર્ટે ચારેય આરોપીઓને દોષિત ઠેરવી સજા ફટકારી છે. જેમાં મેસર્સ પીએમ માર્કેટિંગના પાર્ટનર મનોજ તંતી, પરેશ તંતી, પૂર્વા પરેશ તંતી અને લીલાવતી એમ તંતીને 3 વર્ષની કેદની સજા ફટકારી છે. જ્યારે તમામ આરોપીઓને 50 હજારનો દંડ પણ કર્યો છે.