પુત્રવધુ અને વેવાઇના ત્રાસથી કંટાળી રાજકોટના વયસ્ક વ્યક્તિએ કર્યો આપઘાત

બુધવારે બપોરે 55 વર્ષીય વ્યક્તિને ગંભીર સ્થિતિમાં રાજકોટની સરકારી હોસ્પિટલમાં દાખલ કરાયા હતા. મોડી સાંજે સારવાર દરમિયાન મૃત્યુ પામ્યા છે. મૃતક જેન્તિભાઇ કારેણાએ ઝેર ઘોળી આપઘાત કરી લીધો છે, તે તેમના પાછળ સ્યુસાઇડ નોટ મૂકી ગયાં છે, જેમાં તેમણે તેમના મૃત્યુ માટે પુત્રવધુ ભૂમિકા અને વેવાઇ પરબતભાઇને જવાબદાર ઠેરવ્યા છે.
જેન્તીભાઇ કારેણાએ સ્યુસાઇડ નોટમાં લખ્યું છે, "આથી હું કારેણા જેન્તીભાઇ કાનજીભાઇ લખું છું કે  મારા મોત માટે જવાબદાર વ્યક્તિ ભૂમીકા અને તેના પપ્પા પરબતભાઇ ખાસ જવાબદાર છે. તે મારા દિકરાની વહુ છે, તેને મારા દિકરાનું ઘર ચલાવવું નથી. અને એના ભાઈ સટ્ટાબજાર રૂપિયા હારી જતા, મારી અડધી જમીન તેના નામે કરી આપવા પ્રેશર કરે છે. તેથી કંટાળીને હું આ પગલું ભરુ છું. માટે મારા દીકરાને તેનાથી બચાવી લેજો., મારા દિકરા દિકરીઓ નું ખાસ ધ્યાન રાખજો. હિતને કોઇ દુઃખી ન કરતા, હિત મને મારા પ્રાણથી વધારે વ્હાલો છે અને સંદિપ તું કોઈ દિવસ હિંમત હારતો નહી. તારી મમ્મી અને હિતોનું ધ્યાન રાખજો. આ પહેલા પણ સંદિપ ભૂમિકાથી ત્રાસી ઘર છોડી જતો રહ્યો હતો., દિવ્યા અને શારદા તમે બંને સુખી રહેજો અને ભાઈ હિંમત આપજો... લી. જેન્તિલાલ કાનજી કારેણા... ગામ રાણા ખીરસરા"
રાજકોટ તાલુકા પોલીસે અકસ્માતે મોતની ફરિયાદ નોંધી તપાસ હાથ ધરી છે. પોલીસ સ્યુસાઇડ નોટના આધારે નિવેદન નોંધી જરૂર લાગે  તો કલમનો ઉમેરો કરી જે તે વ્યક્તિઓ સામે કાર્યવાહી કરશે.