AHMEDABAD : પ્લેન ક્રેશ બાદ AISATSમાં પાર્ટી...

અમદાવાદમાં થયેલા વિમાન દુર્ઘટનામાં 275 લોકોએ જીવ ગુમાવ્યા બાદ AISATSના કાર્યાલયમાં યોજાયેલી પાર્ટીનો વીડિયો સામે આવ્યા બાદ મોટો વિવાદ ઉભો થયો છે. આ પાર્ટી એવા સમયે થઈ હતી જ્યારે એર ઇન્ડિયા અને ટાટા ગ્રુપ ગુજરાત પ્લેન અકસ્માતનો શોક મનાવી રહ્યા હતા. આવી સ્થિતિમાં, આ ઘટનાને અસંવેદનશીલ અને અમાનવીય ગણાવવામાં આવી હતી.

આ વીડિયો વાયરલ થતાં જ, ટાટા ગ્રુપ અને AISATS એ આકરી પ્રતિક્રિયા આપી અને ચાર વરિષ્ઠ અધિકારીઓને બહારનો રસ્તો બતાવી દીધો છે. જેમાં કંપનીના COO (ચીફ ઓપરેટિંગ ઓફિસર) અને બે વરિષ્ઠ ઉપપ્રમુખોનો સમાવેશ થાય છે.

એર ઇન્ડિયા SATS એરપોર્ટ સર્વિસીસ પ્રા. લિ. (AISATS) એક સંયુક્ત સાહસ છે, જેનો કરાર ટાટા ગ્રુપ અને SATS લિ. (સિંગાપોર એરપોર્ટ ટર્મિનલ સર્વિસીસ) વચ્ચે છે. તે ભારતમાં એરલાઇન્સને ગ્રાઉન્ડ હેન્ડલિંગ, કેટરિંગ અને અન્ય મુસાફરો સંબંધિત સેવાઓ પૂરી પાડે છે. AI 171 વિમાન દુર્ઘટનાના થોડા દિવસો પછી AISATSના કાર્યાલયમાં યોજાયેલી આ પાર્ટી કર્મચારીઓની સંવેદનશીલતા પર સવાલો ઉભા કરે છે. ખાસ કરીને જ્યારે સમગ્ર ઉદ્યોગ શોકમાં હોય અને કંપનીએ પોતે જ અસરગ્રસ્ત પરિવારો પ્રત્યે સંવેદના વ્યક્ત કરવી જોઈએ ત્યારે આ વધુ ગંભીર બની જાય છે.

AISATS દ્વારા જારી કરાયેલા સત્તાવાર નિવેદનમાં કહેવામાં આવ્યું છે કે AISATSમાં અમે AI 171 ના દુ:ખદ નુકસાનથી પ્રભાવિત પરિવારો સાથે એકતામાં ઉભા છીએ અને તાજેતરના આંતરિક વિડિઓમાં દર્શાવવામાં આવેલા નિર્ણયમાં ભૂલ બદલ ખૂબ જ દુઃખ વ્યક્ત કરીએ છીએ. આ વર્તન અમારા મૂલ્યો સાથે સુસંગત નથી અને જવાબદારો સામે કડક શિસ્તબદ્ધ કાર્યવાહી કરવામાં આવી છે. તમને જણાવી દઈએ કે અમદાવાદ એર ઇન્ડિયા ક્રેશમાં કુલ 275 લોકોના મોત થયા હતા. આ અકસ્માતમાં ફક્ત 1 વ્યક્તિ બચી ગયો હતો. આ પછી, એર ઇન્ડિયાએ દરેક મૃતક વ્યક્તિને 1 કરોડ રૂપિયા આપવાની જાહેરાત કરી હતી.

આ પણ વાંચો---

Ahmedabad : પ્લેન ક્રેશનું રહસ્ય હવે હાથવેંતમાં