Ahmedabad: બલોલ નગરમાં અસામાજિક તત્વોનો આતંક: પોલીસે કાઢ્યો વરઘોડો

અમદાવાદના બલોલ નગરમાં અસામાજિક તત્વોના આતંકે લોકોમાં ભયનું વાતાવરણ ફેલાવ્યું હતું, પરંતુ સાબરમતી પોલીસે તાત્કાલિક કાર્યવાહી કરીને છ આરોપીઓની ધરપકડ કરી અને તેમનો જાહેરમાં વરઘોડો કાઢી કાયદાનો ભાન કરાવ્યો હતો. આ ઘટનામાં આરોપીઓએ જાહેર રસ્તા પર છરી અને લાકડીઓ વડે લોકોને ડરાવી, વાહનોની લૂંટ કરી અને રોકડ સહિતની મિલકતો પર હાથ ફેરવ્યો હતો.

ઘટનાની વિગતો અનુસાર, મુકેશ ભરવાડ નામનો એક વ્યક્તિ મોપેડ લઈને બલોલનગર બ્રિજ પરથી પસાર થઈ રહ્યો હતો. આ દરમિયાન રોહિત, રાહુલ, પ્રીત, કટીંગ, દેવો, રમાકાંત અને વિશાલ સહિતના છ અસામાજિક તત્વોએ તેનું મોપેડ રોકી દીધું અને તેની સાથે માથાકૂટ કરી. આરોપીઓએ છરી અને લાકડીઓનો ઉપયોગ કરીને બ્રિજને પોતાના કબજામાં લઈ લીધો હતો. ગભરાઈ ગયેલા મુકેશે પોતાનું મોપેડ છોડીને ભાગવું પડ્યું હતું. મોપેડની ડીકીમાં રાખેલા 49,000 રૂપિયા પણ આરોપીઓએ લૂંટી લીધા.

આ ઉપરાંત, આરોપીઓએ એક કાર પર પણ હુમલો કર્યો, પરંતુ કારચાલકે પૂરપાટ ઝડપે કાર ચલાવીને પોતાનો જીવ બચાવ્યો. આ દરમિયાન, આરોપીઓએ એક બુલેટ મોટરસાયકલ પણ રોકી હતી. બુલેટ પાસે સેલ્ફી લઈ રહેલા તન્મય પરિહાર અને ક્રિષ્ના કોસ્ટી પર આરોપીઓએ ચપ્પુ અને ડંડા લઈને હુમલો કરવાનો પ્રયાસ કર્યો, જેના કારણે આ યુવાનો પણ પોતાનું બુલેટ છોડીને ભાગી ગયા.   આરોપીઓએ એકટીવા અને બુલેટ સહિતના વાહનોની લૂંટ કરી, જેની કુલ કિંમત 1.49 લાખ રૂપિયા જેટલી થાય છે. સાબરમતી પોલીસે આ ઘટનાની ગંભીરતાને ધ્યાને લઈ ઝડપી કાર્યવાહી કરી. ગુનો નોંધીને છ આરોપીઓની ધરપકડ કરવામાં આવી અને ઘટનાસ્થળે તેમનો જાહેરમાં વરઘોડો કાઢવામાં આવ્યો, જેથી અન્ય અસામાજિક તત્વોને પણ કાયદાનો ડર બેસે. પોલીસની આ ત્વરિત કાર્યવાહીથી બલોલ નગરના રહેવાસીઓએ હાશકારો અનુભવ્યો છે.   આ ઘટના બાદ સ્થાનિક લોકોમાં ચર્ચા છે કે આવા અસામાજિક તત્વો સામે કડક કાર્યવાહી થવી જોઈએ, જેથી ફરીથી આવી ઘટનાઓ ન બને. પોલીસે પણ આવી ઘટનાઓને રોકવા માટે સતર્કતા વધારી છે અને નાગરિકોને સુરક્ષાની ખાતરી આપી છે.