અમદાવાદ : સાબરમતીમાં પોલીસ પર હુમલો, વાન તોડી

અમદાવાદના સાબરમતી વિસ્તારમાં કાયદો અને વ્યવસ્થાની જાળવણી માટે ગયેલી પોલીસ ટીમ પર હુમલાની ચોંકાવનારી ઘટના બની છે. સાબરમતી રેલવે કોલોની પાસે ન્યુસન્સ ફેલાવી રહેલા એક શખસને અટકાવવા ગયેલી PCR વાન પર લાકડાના ફટકા વડે હુમલો કરવામાં આવ્યો હતો. પોલીસે સરકારી મિલકતને નુકસાન પહોંચાડવા બદલ ગુનો નોંધી આરોપીની અટકાયત કરી છે.

જાહેર ન્યુસન્સની ફરિયાદ બાદ પોલીસની કાર્યવાહી : 

ઘટનાની વિગત મુજબ, ૨૭મી ડિસેમ્બરના રોજ રાત્રે સાબરમતી રેલવે કોલોનીમાં ધર્મેશ્વર મહાદેવ મંદિર પાસે એક શખસ હાથમાં લાકડું રાખી લોકોને ધમકાવી રહ્યો હોવાની ફરિયાદ પોલીસ કંટ્રોલ રૂમને મળી હતી. આ ફરિયાદના આધારે સાબરમતી PCR-૨૨ની ટીમ તપાસ માટે ઘટનાસ્થળે પહોંચી હતી. ત્યાં ૨૫ વર્ષીય દિલીપ મહેશભાઈ રાજપુત લાકડું લઈને ભયનો માહોલ ફેલાવી રહ્યો હતો.

પોલીસ વાનના કાચ તોડ્યા અને કરી ગાળાગાળી : 

જ્યારે પોલીસ કર્મચારીઓએ આરોપીને લાકડું નીચે મૂકવા અને પૂછપરછમાં સહકાર આપવા સમજાવ્યો, ત્યારે તે ઉશ્કેરાઈ ગયો હતો. આરોપીએ પોલીસ સાથે રકઝક કરી બિભત્સ ગાળો આપી હતી અને હાથમાં રહેલા લાકડા વડે સરકારી PCR વાન પર આડેધડ ફટકા માર્યા હતા. આ હુમલાને કારણે પોલીસ વાનના આગળ અને પાછળના કાચ ફૂટી ગયા હતા. પ્રાથમિક અંદાજ મુજબ આરોપીએ સરકારી મિલકતને અંદાજે ૧૫ હજાર રૂપિયાનું નુકસાન કર્યું છે.

આરોપી વિરુદ્ધ કાયદેસરની કાર્યવાહી : 

ફરજ પરના પોલીસ કર્મચારીઓએ તાત્કાલિક કાર્યવાહી કરી આરોપી દિલીપ રાજપુતને કાબૂમાં લીધો હતો. પોલીસ કોન્સ્ટેબલ અશ્વીનકુમારે આ મામલે ફરિયાદ નોંધાવી છે. સરકારી ફરજમાં રૂકાવટ લાવવી, પોલીસ પર હુમલો કરવો અને જાહેર સંપત્તિને નુકસાન પહોંચાડવાની કલમો હેઠળ ગુનો નોંધી પોલીસે વધુ તપાસ શરૂ કરી છે.