32મા માળે ક્રેન સાથે લટકતો મળ્યો યુવક!

Ahmedabad News: અમદાવાદના વ્યસ્ત એસજી હાઇવે વિસ્તારમાં આજે વહેલી સવારે એક અત્યંત કમકમાટીભરી અને દર્દનાક ઘટના સામે આવી છે. નિરમા યુનિવર્સિટી અને છારોડી તળાવની સામે આવેલી ‘ટ્રેમોન્ટ એડલીપ’ નામના નિર્માણાધીન 32 માળના બિલ્ડિંગમાં એક યુવકે 300 ફૂટની ઊંચાઈએ આવેલી ક્રેન સાથે ગળેફાંસો ખાઈને પોતાનું જીવન ટૂંકાવ્યું છે. મોડી રાત્રે બનેલી આ ચોંકાવનારી ઘટનાને પગલે સમગ્ર વિસ્તારમાં ભારે ચકચાર મચી ગઈ છે.   સવારે લોકોએ જોયું ભયાનક દ્રશ્ય પ્રાથમિક અનુમાન મુજબ યુવકે મોડી રાત્રે જ આ દર્દનાક પગલું ભરી લીધું હતું. આજે સવારે અંદાજે 8:00 વાગ્યાના સુમારે જ્યારે સાઇટ પર કામ કરતા અન્ય શ્રમિકો અને આસપાસના રહીશો પહોંચ્યા, ત્યારે 32 માળની ઊંચાઈએ ક્રેનમાં લટકતો મૃતદેહ જોઈને લોકો સ્તબ્ધ થઈ ગયા હતા. 300 ફૂટની ઊંચાઈએ હવામાં લટકતી હાલતમાં મૃતદેહ જોઈને સ્થળ પર હાજર લોકોમાં અફરાતફરી અને સન્નાટો વ્યાપી ગયો હતો. આ ઘટનાને પગલે ઘટનાસ્થળે લોકોના ટોળાં ભેગાં થઈ ગયાં હતાં.   મૃતકની ઓળખ અને ક્રેન ઓપરેટર તરીકેનું કામ ઘટનાની જાણ થતાં જ પોલીસ અને ફાયર વિભાગની ટીમ તાત્કાલિક સ્થળ પર પહોંચી ગઈ હતી. તપાસ દરમિયાન મૃતકની ઓળખ 22 વર્ષીય પ્રીતમસિંહ તરીકે થઈ છે, જે મૂળ ઝારખંડનો વતની હતો. પ્રીતમસિંહ છેલ્લા કેટલાય સમયથી આ નિર્માણાધીન સાઇટ પર ક્રેન ચલાવવાનું કામ કરતો હતો. તે જે ક્રેન ઓપરેટ કરતો હતો, તે જ ક્રેન પર જઈને તેણે મોડી રાત્રે ગળેફાંસો ખાઈ લીધો હોવાનું સામે આવ્યું છે.   ફાયર વિભાગનું જટિલ રેસ્ક્યૂ ઓપરેશન ઘટનાની ગંભીરતાને ધ્યાનમાં રાખીને ફાયર બ્રિગેડની ટીમે તાત્કાલિક ધોરણે રેસ્ક્યૂ ઓપરેશન શરૂ કર્યું હતું. 300 ફૂટ જેટલી અતિશય ઊંચાઈ હોવા છતાં, ફાયર ફાઇટરોએ ખૂબ જ કાળજીપૂર્વક કામગીરી કરીને ક્રેન પરથી મૃતદેહને સુરક્ષિત રીતે નીચે ઉતાર્યો હતો. ત્યારબાદ એમ્બ્યુલન્સ મારફતે મૃતદેહનો કબજો મેળવીને સોલા પોલીસે તેને પોસ્ટમોર્ટમ અર્થે હોસ્પિટલ મોકલી આપવાની તજવીજ હાથ ધરી હતી.   આપઘાત પાછળ કૌટુંબિક કારણોની શક્યતા સોલા પોલીસ સ્ટેશનના પીઆઇ કે.એન. ભૂકણે જણાવ્યા અનુસાર, 32 માળ ઊંચી ક્રેન પર બોડી લટકતી હોવાનો મેસેજ મળતા જ પોલીસ કાફલો સ્થળ પર પહોંચી ગયો હતો. પ્રોજેક્ટ એન્જિનિયર દર્શલ જોશીએ ઉમેર્યું હતું કે વહેલી સવારે સાઇટ પરના એક મજૂરે ફોન કરીને આ અંગે જાણ કરી હતી. મૃતકના ભાઈ સાથે વાતચીત કરતા પ્રાથમિક માહિતી મળી છે કે કેટલાક અંગત અથવા આંતરિક પારિવારિક પ્રોબ્લેમ હોવાના કારણે તેણે આ આત્મઘાતી પગલું ભર્યું હોઈ શકે છે. હાલમાં સોલા પોલીસે આ મામલે અકસ્માતે મોતનો ગુનો નોંધી સાઇટ પરના અન્ય શ્રમિકો, કોન્ટ્રાક્ટર અને પરિવારજનોની પૂછપરછ શરૂ કરી છે.