15 વર્ષીય સગીરા સાથે દુષ્કર્મ, 4ની ધરપકડ

અમદાવાદના શાહીબાગ વિસ્તારમાં 15 વર્ષીય સગીરા સાથે દુષ્કર્મની ચોંકાવનારી ઘટના સામે આવી છે. આ ઘટના 4 મહિના અગાઉ બની હતી, પરંતુ પીડિતાના મૌન અને ડરને કારણે તે અત્યાર સુધી છૂપી રહી હતી. પીડિતા જે સોસાયટીમાં રહે છે, તે જ સોસાયટીના એક પરિચિત યુવકે તેને પોતાના ઘરે બોલાવી હતી. 

યુવકના અન્ય 3 મિત્રો પણ ત્યાં હાજર હતા

સગીરા ઘરે પહોંચી ત્યારે યુવકના અન્ય 3 મિત્રો પણ ત્યાં હાજર હતા. આ ચારેય યુવકોએ ભેગા મળીને સગીરા સાથે બળજબરીપૂર્વક દુષ્કર્મ આચર્યું હતું. ઘટના બાદ, આરોપીઓએ સગીરાને કોઈને પણ આ અંગે જાણ ન કરવાની ધમકી આપી હતી.

આ પણ વાંચો: પિતાએ દુષ્કર્મ કરતા 15 વર્ષીય સગીરા થઈ ગર્ભવતી

પરિવારની પૂછપરછ બાદ ઘટનાનો પર્દાફાશ

આ ઘટના બાદથી સગીરા માનસિક રીતે પરેશાન રહેતી હતી. તે ગુમસુમ રહેતી હતી અને નિયમિત રીતે સ્કૂલે પણ જતી ન હતી. સગીરાના વર્તનમાં આવેલા ફેરફારને જોઈને તેના પરિવારે તેની સાથે વાતચીત કરી, ત્યારે તેણે સમગ્ર દુષ્કર્મની ઘટના જણાવી હતી. આ સાંભળીને પરિવાર ચોંકી ઉઠ્યો અને તરત જ શાહીબાગ પોલીસ સ્ટેશનમાં ચારેય યુવકો વિરુદ્ધ ફરિયાદ નોંધાવી હતી. 

ચારેય આરોપીઓની ધરપકડ

પોલીસે આ મામલાની ગંભીરતાને ધ્યાનમાં લઈને તાત્કાલિક કાર્યવાહી કરી ગુનો નોંધી ચારેય આરોપીઓની ધરપકડ કરી છે. આ ગંભીર કેસની વધુ તપાસ હાલમાં SC, ST સેલ દ્વારા કરવામાં આવી રહી છે, જેથી પીડિતાને ઝડપી ન્યાય મળી શકે.