અમદાવાદ ક્રાઈમ બ્રાન્ચના PSI પર છરી વડે હુમલો

ભાટ ગામ પાસે ડ્રગ્સના આરોપીને પકડવા ગયેલી અમદાવાદ ક્રાઈમ બ્રાન્ચની ટીમ ઉપર હુમલો થયો હતો. શુક્રવારે મોડી રાત્રે બનેલી ઘટનામાં એક પીએસઆઈ ઈજાગ્રસ્ત થયા છે. એમડી ડ્રગ્સની રેડ કરવા ગયા ત્યારે આરોપી અને પોલીસની કારનો અકસ્માત થયો હતો. આરોપીએ PSI પર છરી વડે હુમલો કર્યો હતો. પોલીસે 300 ગ્રામ ડ્રગ્સ સાથે આરોપીની ધરપકડ કરી છે. જ્યારે ઇજાગ્રસ્ત પીએસઆઈને સારવાર માટે હોસ્પિટલમાં ખસેડાયા છે.

અમદાવાદના ભાટ ગામ વિસ્તારમાં એમડી ડ્રગ્સ લઈને એક યુવક કારમાં પસાર થવાનો તેવી ક્રાઈમ બ્રાંચને બાતમી મળી હતી. બાતમીના આધારે ક્રાઈમ બ્રાન્ચની ટીમે વોચ ગોઠવી હતી. વોચ દરમિયાન બાતમીવાળી કાર આવતાં તેને રોકવાની કોશિષ કરી હતી. જો કે, યુવક નહી ઉભો નહી રહેતા પોલીસે તેને પકડવા પીછો કર્યો હતો. આ સમયે યુવકની કાર અને ક્રાઈમ બ્રાંચની કારનો અકસ્માત થયો હતો.

બંને વાહનોનો અકસ્માત થતાં યુવક કારમાંથી નીચે ઉતર્યો હતો અને ક્રાઈમ બ્રાંચની ટીમ પર હુમલો કર્યો હતો. યુવકે તેની પાસે રહેલી છરી કાઢી PSI પર હુમલો કર્યો હતો. PSIને ઈજા થતાં અન્ય પોલીસ કર્મચારીઓએ યુવકને ઝડપી લીધો હતો.

ત્યારબાદ ક્રાઈમ બ્રાંચે આરોપી યુવકની ધરપકડ કરી કારની તપાસ કરી હતી. જેમાંથી રૂપિયા 25 લાખથી વધુનું એમડી ડ્રગ્સ મળી આવ્યુ હતું. આ ડ્રગ્સ જપ્ત કરીને 10 ઈજાગ્રસ્ત પીએસઆઈને સારવાર માટે હોસ્પિટલમાં ખસેડવામાં આવ્યા હતા.

જો કે, ક્રાઈમ બ્રાન્ચે ઈજાગ્રસ્ત પીએસઆઈનું નામ સત્તાવાર રીતે જાહેર કર્યુ નથી. આ મામલે શનિવારે બપોરે રાખવામાં આવેલી પત્રકાર પરિષદ પણ અગમ્ય કારણોસર રદ કરવામાં આવી હતી. 

10 દિવસમાં પોલીસ ઉપર હુમલાનો બીજો બનાવ

અમદાવાદના મેમ્કો વિસ્તારમાં એક અસામાજીક તત્વએ મેઘાણીનગર પોલીસ સ્ટેશનના સર્વેલન્સ સ્ક્વોડમાં ફરજ બજાવતા પોલીસ કોન્સ્ટેબલ પર દંડાથી હુમલો કર્યો હતો. કોન્સ્ટેબલ અને અસામાજીક તત્વને એક દિવસ પહેલા ગાર્ડનમાં બેસવા મામલે બોલાચાલી થઈ હતી. જેની અદાવત રાખીને શખ્સે પોલીસ કર્મચારી પર હુમલો કર્યો હતો. શહેરકોટડા પોલીસ ગુનો નોંધી આરોપીની ધરપકડ કરી હતી.  

ચાણસ્મા તાલુકાના ઝીલીયામાં પણ પોલીસને ભગાડી હતી

પાટણ જિલ્લાના ચાણસ્મા તાલુકાના ઝીલીયા ગામે રામાધણી ફાર્મ હાઉસ પર વામૈયાના યુવકોએ હથિયારો સાથે હુમલો કર્યો હતો. હુમલો કર્યો તે પહેલાંથી ફાર્મ હાઉસના ગેટ ઉપર ઉભેલા પોલીસના જવાનો સામનો કરવાના બદલે ભાગી ગયા હતા. હુમલાખોરોએ ફાર્મ હાઉસના ગેટ અને દીવાલ પર તોડફોડ કરીને જાનથી મારી નાખવાની ધમકી આપી હતી. ટોળાના કારણે પોલીસે 112 જનરક્ષક ગાડીઓ લઈને ભાગવું પડ્યું હતું. જેના કારણે સમગ્ર રાજ્યમાં મામલો ભારે ચર્ચાસ્પદ બન્યો હતો.