અમદાવાદ શહેર ટ્રાફિક પીઆઈ N.K.રબારી સસ્પેન્ડ

અમદાવાદ શહેરના આઈ ડિવિઝન ટ્રાફિક પોલીસ સ્ટેશનમાં ફરજ બજાવતા PI એન.કે. રબારીને સસ્પેન્ડ કરવામાં આવ્યા છે. દાસ્તાન સર્કલ પાસેના તોડકાંડ પ્રકરણમાં PI એન.કે. રબારીની ભૂમિકા સામે આવી હતી. આ કેસની તપાસ દરમિયાન તેમણે દાખવેલી બેદરકારી ભારે પડી છે, તપાસમાં બેદરકારી બદલ અમદાવાદ શહેર પોલીસ કમિશનર જી.એસ.મલિકે કાર્યવાહી કરીને સસ્પેન્ડ કરી દીધા છે.

અમદાવાદ શહેર આઈ ડિવિઝન ટ્રાફિક પોલીસના PI એન.કે.રબારી સામે ટ્રાફિક પોઇન્ટ પર બેદરકારીને લઈ કાર્યવાહી કરવામાં આવી છે. દાસ્તાન સર્કલ પાસે ત્રણ મહિના અગાઉ બે પોલીસ અને ત્રણ TRB કર્મચારીઓએ કરેલા તોડ મામલે પોલીસ કમિશનર જીએસ મલિકે કાર્યવાહી કરી છે.

17 ઓગસ્ટ 2025ના રોજ દાસ્તાન સર્કલ પાસે મુંબઈના વેપારીને રોકી ટ્રાફિક પોલીસ દ્વારા વેપારી પાસેથી ₹ 5.88 લાખ પડાવવામાં આવ્યા હતા. જે તે સમયે ટ્રાફિક પોઈન્ટ ઉપર હેડ કોન્સ્ટેબલ નાગજી શંકર, મોહન ધીરા, ટીઆરબી રાજેશ પટણી, વિશાલ પટણી અને અજય પટણીની ડ્યુટી હતી. નાગજી શંકર, રાજેશ પટણી અને વિશાલ પટણીની આ કેસમાં ધરપકડ કરવામાં આવી હતી. જ્યારે અજય પટણી હજુ સુધી ફરાર છે. હેડ કોન્સ્ટેબલ નાગજી ચૌધરી 10 વર્ષથી પોલીસ ખાતામાં ફરજ બજાવે છે. ટ્રાફિક પીઆઈને સસ્પેન્ડ કરવામાં આવતા પોલીસ બેડામાં ફફડાટ વ્યાપી ગયો છો. 

શું હતો સમગ્ર મામલો?

મુંબઈમાં મીરા-ભાયંદર રોડ પર રહેતાં વજેરામ ગુર્જર મૂળ રાજસ્થાનના વતની છે. 17 ઓગસ્ટ 2025ના રોજ વજેરામ અને તેનો કૌટુંબિક ભાઈ દિનેશ ગુર્જર કાર લઈને રાજસ્થાનથી મુંબઈ જઈ રહ્યા હતા. તે સમયે સાંજના 4 વાગ્યાની આસપાસ એસપી રિંગ રોડ પર દાસ્તાન સર્કલ પાસે પોલીસ કર્મચારીએ વજેરામની કાર રોકી હતી. ગાડીનું ચેકિંગ કરતાં શંકાસ્પદ ચીજવસ્તુ મળી નહોતી. ત્યારબાદ વજેરામ અને દિનેશને કારમાંથી ઉતારીને પોલીસ કેબિનમાં લઈ ગયા હતા.

વજેરામનો ફોન ચેક કર્યા બાદ પોલીસ કર્મચારીએ કહ્યું હતું કે, તારા મોબાઈલમાં ક્રિકેટ સટ્ટાની આઇડી છે અને તું સટ્ટો રમે છે. તારા પર કેસ કરી તને અમે જેલમાં નાખીશું. એક પોલીસ કર્મચારીએ કહ્યું કે તારે અહીંથી જવું હોય તો 20 લાખ રૂપિયા આપવા પડશે. નહીં તો તારા પર ક્રિકેટ સટ્ટાનો કેસ કરીશું. વજેરામ વિરુદ્ધ કેસ ન થાય એ માટે પોલીસ કર્મચારીને રૂપિયા આપવા માટે તૈયાર થયા હતા.

વજેરામે ઓનલાઈન રૂપિયા ટ્રાન્સફર કરવાનું કહેતાં અજાણ્યા શખ્સના યુપીઆઈ કોડ ઉપર વજેરામ અને તેના ભાઈએ 5.88 લાખ રૂપિયા ટ્રાન્સફર કર્યા હતા. 5.88 લાખનો તોડ થઈ ગયા બાદ પોલીસ કર્મચારીઓએ દિનેશ અને વજેરામને જવા દીધા હતા. મુંબઈ પહોચી ગયા બાદ ફરિયાદ કરવાનું નક્કી કર્યું.

ત્યારબાદ 19 સપ્ટેમ્બર 2025ના રોજ અમદાવાદના ઉચ્ચ પોલીસ અધિકારીને મળી હકીકત જણાવી હતી. પોલીસ અધિકારીએ વજેરામના ઓનલાઈન ટ્રાન્ઝેક્શનના પુરાવાના આધારે પોલીસ કર્મચારીઓ વિરુદ્ધ પોલીસ ફરિયાદ કરવાનો આદેશ આપ્યો હતો. જે તે સમયે નિકોલ પોલીસે ચાર અજાણ્યા પોલીસકર્મી વિરુદ્ધ ગુનો નોંધ્યો હતો.