અમદાવાદ એરપોર્ટ: ₹30 કરોડનું હેરોઈન ઝડપાયું

ગુજરાતને નશાના માર્ગે ધકેલવાના ડ્રગ્સ માફિયાઓના પ્રયાસો પર કસ્ટમ્સ વિભાગે પાણી ફેરવી દીધું છે. 9 ફેબ્રુઆરી 2026ના રોજ અમદાવાદના સરદાર વલ્લભભાઈ પટેલ ઇન્ટરનેશનલ એરપોર્ટ અને સુરત ઇન્ટરનેશનલ એરપોર્ટ પરથી માદક દ્રવ્યોનો મોટો જથ્થો ઝડપી પાડવામાં આવ્યો છે. અમદાવાદમાં ₹30 કરોડથી વધુની કિંમતનું હેરોઈન પકડાયું છે, જ્યારે સુરતમાં બિનવારસી હાલતમાં ગાંજો મળી આવ્યો છે.

સાબુના બોક્સમાં હેરોઈનની તસ્કરી : 

અમદાવાદ કસ્ટમ્સના એર ઇન્ટેલિજન્સ યુનિટ (AIU) એ પેસેન્જર પ્રોફાઇલિંગના આધારે કુઆલાલુંપુરથી આવતી એર એશિયાની ફ્લાઈટના એક મુસાફરને અટકાવ્યો હતો. તપાસ દરમિયાન તેના સામાનમાંથી કુદરતી અને હર્બલ સાબુના કુલ 29 પેકેટ મળી આવ્યા હતા. એક્સ-રે સ્કેનિંગથી બચવા માટે તસ્કર દ્વારા આ હેરોઈનને ચાંદીના વરખ અને કાર્બન પેપરમાં લપેટીને સાબુના પેકેજિંગમાં અત્યંત હોશિયારીથી છુપાવવામાં આવ્યું હતું.

તપાસમાં કુલ 6.8 કિલો હેરોઈનનો જથ્થો મળી આવ્યો છે, જેની આંતરરાષ્ટ્રીય બજારમાં કિંમત અંદાજે ₹30 કરોડથી વધુ આંકવામાં આવી રહી છે.

₹30 હજારની લાલચમાં બની ગયો કેરિયર : 

ઝડપાયેલો પેસેન્જર મૂળ ચેન્નાઈનો રહેવાસી છે. પ્રાથમિક પૂછપરછમાં તેણે કબૂલાત કરી છે કે તેને આ જથ્થો અમદાવાદ પહોંચાડવા માટે ₹30,000 આપવામાં આવ્યા હતા. એરપોર્ટની બહાર કોઈ વ્યક્તિ આ માલ લેવા આવવાની હતી, પરંતુ પેસેન્જર પકડાઈ જતાં નેટવર્ક ખોરવાઈ ગયું હતું. હાલ પોલીસ આરોપીના મોબાઈલ ફોનના આધારે આ ડ્રગ્સ રેકેટના મૂળ સુધી પહોંચવા તપાસ કરી રહી છે.

સુરત એરપોર્ટ પરથી હાઈડ્રોપોનિક ગાંજો ઝડપાયો : 

બીજી તરફ, સુરત એરપોર્ટ પર એર ઇન્ડિયા એક્સપ્રેસની ફ્લાઈટમાં તપાસ દરમિયાન સીટ નીચે સેફ્ટી જેકેટના પાઉચમાંથી 7 પેકેટ મળી આવ્યા હતા. આ પેકેટ્સમાં હાઈડ્રોપોનિક ગાંજો હોવાનું પરીક્ષણમાં સાબિત થયું છે. આશરે 3.7 કિલોથી વધુનો આ જથ્થો બિનવારસી હાલતમાં મળી આવતા કસ્ટમ્સ વિભાગે NDPS એક્ટ હેઠળ ગુનો નોંધી વધુ તપાસ હાથ ધરી છે.

આ કાર્યવાહી દર્શાવે છે કે એરપોર્ટ પર સુરક્ષા એજન્સીઓ અત્યંત સતર્ક છે અને માદક દ્રવ્યોની હેરાફેરી અટકાવવા કટિબદ્ધ છે.