અમદાવાદના કોટ વિસ્તારમાં આવેલા જમાલપુરમાં એક અત્યંત શરમજનક ઘટના પ્રકાશમાં આવી છે. એક ધાર્મિક સ્થળની પવિત્રતાને કલંકિત કરતા, એક નરાધમે 8 વર્ષના નિર્દોષ બાળકને પોતાની હવસનો શિકાર બનાવ્યો છે. ગાયકવાડ હવેલી પોલીસે આ મામલે સક્રિયતા દાખવી આરોપીને દબોચી લીધો છે.
લાલચ આપીને ધાબા પર લઈ ગયો :&nbsp;
ઘટનાની વિગતો મુજબ, આરોપી નૌમાન શેખ જમાલપુરની એક મસ્જિદમાં આવ્યો હતો. ત્યાં નમાજ પઢવા આવેલા બાળકોમાં એક 8 વર્ષના બાળકને તેણે નિશાન બનાવ્યો હતો. નૌમાને માસૂમને પટાવી-ફોસલાવીને વિશ્વાસમાં લીધો અને લાલચ આપી મસ્જિદના ધાબા પર લઈ ગયો હતો. ત્યાં કોઈની હાજરી ન હોવાનો ફાયદો ઉઠાવી તેણે બાળક સાથે સૃષ્ટિ વિરુદ્ધનું કૃત્ય આચર્યું હતું.
સીસીટીવી ફૂટેજ બન્યા મુખ્ય પુરાવો :&nbsp;
આ ભયાનક અનુભવ બાદ ગભરાયેલા બાળકે ઘરે જઈને પરિવારને જાણ કરી હતી. જાગૃત વાલીઓએ તુરંત પોલીસનો સંપર્ક કર્યો હતો. પોલીસે તપાસ દરમિયાન મસ્જિદના સીસીટીવી કેમેરા ચેક કરતા તેમાં આરોપી નૌમાન બાળકને ઉપર લઈ જતો અને નીચે ઉતરતો સ્પષ્ટ દેખાયો હતો. આ મજબૂત પુરાવાને આધારે પોલીસે ગણતરીના કલાકોમાં આરોપીની ધરપકડ કરી છે.
પોક્સો હેઠળ ગુનો દાખલ :&nbsp;
ગાયકવાડ હવેલી પોલીસે આરોપી વિરુદ્ધ ભારતીય ન્યાય સંહિતાની ગંભીર કલમો અને પોક્સો (POCSO) એક્ટ હેઠળ ગુનો નોંધી વધુ તપાસ હાથ ધરી છે. બાળકની તબીબી તપાસ પણ કરવામાં આવી છે. પોલીસ હવે એ દિશામાં તપાસ કરી રહી છે કે શું આ નરાધમે અગાઉ પણ કોઈ અન્ય બાળકને પોતાની હવસનો શિકાર બનાવ્યો છે કે કેમ.

અમદાવાદ ક્રાઈમ ન્યૂઝ પોક્સો કેસ

મસ્જિદના ધાબા પર 8 વર્ષના બાળક પર આચર્યું અધમ કૃત્ય, સીસીટીવી ફૂટેજને આધારે નરાધમની ધરપકડ

February 7, 2026 | 14:01 IST