કચ્છમાં બસની રાહ જોતી યુવતીની તલવારના ઘા ઝીંકી કૃર હત્યા

કચ્છના માંડવી તાલુકાના ગોધરામાં બસની રાહ જોઇ રહેલી  નર્સની જાહેરમાં હત્યા કરી હત્યારો ફરાર થઇ જતાં સનસનાટી મચી ગઇ છે. આ યુવતી બસ સ્ટોપ પર બસની રાહ જોતી ઉભી હતી ત્યારે જ હત્યારો યુવક બાઇક પર આવ્યો હતો અને યુવતી પર તલવાર લઇને તૂટી પડ્યો હતો. એટલું જ નહીં હત્યારાએ તેનું ગળુ પણ દબાવ્યું હતું અને ફરાર થઇ ગયો હતો. 

મળેલી માહિતી મુજબ માંડવી ચાલુકાના ગોધરામાં ગોરીબેન ગરવા નામની યુવતીની વહેસી સવારે એક યુવકે હત્યા કરી હતી. ગોધરા ગામમાં પોતાના ઘેરથી આ યુવતી નોકરી કરવા માટે ઘેરથી નિકળી હતી. સવારે 6 વાગે તે દુર્ગાપુર રોડ પર બસની રાહ જોઇ રહી હતી ત્યારે બાઇક પર અજાણ્યો યુવક ધસી આવ્યો હતો અને યુવતી પર તલવાર લઇને તૂટી પડ્યો હતો. 

ઝનૂની બનેલા હત્યારાએ તલવારના ઘા ઝીંકી અને છરી મારીને યુવતીનું ગળુ દબાવ્યું હતું અને  તેની કૃર હત્યા કરી ફરાર થઇ ગયો હતો. હત્યા કર્યા બાદ હત્યારો સ્થળ પર જ તલવાર ફેંકી ફરાર થઇ ગયો હતો. ઘટનાના પગલે લોકો સ્થળ પર એકત્રિત થઇ ગયા હતા અને પોલીસને જાણ કરી હતી. પોલીસ પણ ત્યારબાદ સ્થળ પર પહોંચી હતી. 

ઘટનાના પગલે લોકોમાં ભારે આક્રોષ ફાટી નિકળ્યો હતો. આ યુવતી મુન્દ્રા તાલુકાના તુંબડી ગામમાં નર્સ તરીકે કામ કરી હતી અને તે તેની વિધવા માતા અને બે ભાઇઓ સાથે રહેતી હતી. યુવતીની સરેઆમ હત્યાના પગલે પરિવારજનો પર આભ તૂટી પડ્યું હતું. પોલીસે હત્યારાને શોધવા પરિવારની પૂછપરછ શરુ કરવાની સાથે તપાસ શરુ કરી હતી.