કચ્છમાં માનવતાને લજવતી એક ચોકાવનારી ધટના આવી સામે

કચ્છમાં પુત્રએ હવસની હદ વટાવીને માનવતાને લજવતું કૃત્યુ કર્યું હોવાની ચોંકાવનારી ઘટના સામે આવી છે. અંજાર પોલીસ સ્ટેશનથી પાંચ કિલોમીટર આવેલા ગામના 50 વર્ષીય દારૂડિયા પુત્રએ 80 વર્ષની માતા પર દુષ્કર્મ આચર્યું હતું. ઘટના બાદ વૃદ્ધ મહિલાને બ્રેઈન સ્ટ્રોક આવ્યો હતો, હાલ વૃદ્ધા સરકારી હોસ્પિટલમાં સારવાર હેઠળ છે. સમગ્ર મામલે નરાધમ પુત્ર વિરૂદ્ધમાં અંજાર પોલીસ સ્ટેશનમાં ફરિયાદ નોંધવામાં આવી છે. જ્યારે આરોપી વિરૂદ્ધમાં અગાઉ ગાંધીધામ અને અંજાર પોલીસ સ્ટેશનમાં દારૂ પીવાના ત્રણ કેસ નોંધાઈ ચૂક્યા છે. 

50 વર્ષીય નરાધમ પુત્રએ 80 વર્ષીય માતા પર દુષ્કર્મ આચર્યું
પોલીસની માહિતી મુજબ, કચ્છના અંજાર પોલીસ સ્ટેશનથી પૂર્વ દિશામાં પાંચ કિ.મી. દૂર આવેલા ગામ ખાતે ગત ગુરુવારે (27 ફેબ્રુઆરી) માનવ જાતને હચમચાવી દેનારી ઘટના સામે આવી હતી. 50 વર્ષીય પુત્રએ 80 વર્ષની માતા પર દુષ્કર્મ આચર્યું હતું. માતા-પુત્રના સંબંધીઓએ જણાવ્યું હતું કે, પુત્ર કોઈ કામધંધો કરતો નથી અને દારૂ પીવે છે. કેટલીક વખતે તો પુત્ર તેની માતા પાસે દારૂ પીવા માટે પૈસા પણ માંગતો હતો. ક્યારેક માતાને ભીખ માંગવા પણ મજબૂર કરતો હતો. આ વ્યક્તિથી આખુ ગામ ત્રસ્ત છે.

પુત્રની ક્રૂરતાભરી હરકતથી માતાને માથામાં અને ગુપ્તાંગના ભાગે ગંભીર ઈજા પહોંચી હતી. ઘટના બાદ વૃદ્ઘ મહિલાને સારવાર અર્થે હોસ્પિટલ લઈ જતી વખતે બ્રેઈન સ્ટ્રોક આવ્યો હતો. વૃદ્ધાને હાલ સરકારી હોસ્પિટલમાં દાખલ કરવામાં આવ્યા છે, જ્યાં તેમની હાલત નાજૂક હોવાનું સામે આવ્યું છે. સમગ્ર ઘટના મામલે આરોપીના નાના ભાઈના પત્નીએ અંજાર પોલીસ સ્ટેશનમાં ફરિયાદ નોંધાવી હતી.