કોઠંબા પોલીસ સ્ટેશનમાં PI-કોન્સ્ટેબલ વચ્ચે ઈલુ-ઈલુ

મહિસાગર જિલ્લામાં પોલીસ વિભાગમાં ચકચાર મચી છે. કારણ કે કોઠંબા પોલીસ સ્ટેશનમાં ફરજ બજાવતા પોલીસ ઇન્સ્પેક્ટર (PI) અને મહિલા કોન્સ્ટેબલ વચ્ચેના કથિત લગ્નેત્તર સંબંધો સામે આવ્યા છે. આ ઘટના બહાર આવતા જિલ્લા પોલીસ વડા સફિન હસને તરત જ બંનેને ફરજ મોકૂફ કર્યા છે.

પ્રાપ્ત માહિતી મુજબ, પ્રાથમિક તપાસમાં PI અને મહિલા કોન્સ્ટેબલ વચ્ચે અંગત સંબંધ હોવાનો પુરાવો સામે આવ્યો હતો. સાથે સાથે બંનેએ ફરજ દરમિયાન ગંભીર બેદરકારી દાખવવાનો પણ આરોપ છે.

આ મામલે મહિસાગર SP સફિન હસને ખાતાકીય તપાસના આદેશ આપ્યા છે. હુકમમાં ઉલ્લેખ છે કે જો બંને અધિકારીઓ ફરજ પર ચાલુ રહેશે તો પુરાવા સાથે છેડછાડ થવાની શક્યતા છે. તેથી, નિષ્પક્ષ તપાસ માટે તેમને તાત્કાલિક ફરજમાંથી હટાવાયા છે.

આ કાર્યવાહી બાદ સમગ્ર પોલીસ વિભાગમાં ચર્ચાનો માહોલ છે. સૂત્રોના જણાવ્યા મુજબ, જો તપાસમાં બંને કસૂરવાર સાબિત થશે તો ફરજિયાત નિવૃત્તિ અથવા નોકરીમાંથી બરતરફી જેવી કડક કાર્યવાહી થઈ શકે છે.

મહિસાગર જિલ્લામાં બનેલી આ ઘટનાએ પોલીસ વિભાગની છબી પર સવાલો ઉભા કર્યા છે અને વહીવટી સ્તરે ચિંતાનો વિષય બન્યો છે.