સુરતમાં નિવૃત્ત ઇજનેરનો 72 કલાકનો ડિજિટલ રેસ્ક્યૂ

સુરત: 72 કલાકની ‘ડિજિટલ અરેસ્ટ’માંથી નિવૃત્ત એન્જિનિયરનો રેસ્ક્યુ : 

સુરત મનપાના નિવૃત્ત એક્ઝિક્યુટિવ એન્જિનિયર અમિત દેસાઈને સાયબર માફિયાઓએ 72 કલાક સુધી પોતાના જ ઘરમાં વિડિયો કોલ પર બંધક બનાવી રાખ્યા હતા, જેને ડિજિટલ અરેસ્ટ કહેવાય છે. સુરત સાયબર ક્રાઇમ પોલીસે સમયસર હસ્તક્ષેપ કરીને તેમની જીવનભરની કમાણીના 46 લાખ રૂપિયા બચાવી લીધા છે. આરોપીઓએ નકલી વર્ચ્યુઅલ કોર્ટ રૂમ ઊભો કરીને વૃદ્ધને એટલા ડરાવી દીધા હતા કે તેઓ પોતાની મિલકત વેચીને પૈસા ટ્રાન્સફર કરવા તૈયાર થઈ ગયા હતા.

મની લોન્ડરિંગના નામે ઠગાઈની શરૂઆત : 

વર્ષ 2022 માં નિવૃત્ત થયેલા અમિત દેસાઈને એક અજાણ્યા લોકલ નંબર પરથી ફોન આવ્યો હતો. ફોન કરનારે પોતાની ઓળખ પોલીસ અને સીબીઆઈ અધિકારી તરીકે આપી અને કહ્યું કે તેમના આધાર કાર્ડ અને બેન્ક એકાઉન્ટનો ઉપયોગ મની લોન્ડરિંગ અને કુખ્યાત આરોપી નરેશ ગોયલ સામેના 45 કરોડના ફ્રોડમાં થયો છે.

બોગસ દસ્તાવેજો અને વર્ચ્યુઅલ કોર્ટનો ડર : 

આરોપીઓએ વૃદ્ધને ડરાવવા માટે એસબીઆઈ અને સીબીઆઈના લેટરપેડ પર લખેલા નકલી દસ્તાવેજો અને વોરંટ મોકલ્યા હતા. આટલું જ નહીં, સોમવાર બપોરથી શરૂ થયેલું આ નાટક સતત 72 કલાક ચાલ્યું. આ દરમિયાન તેમને વિડિયો કોલ ચાલુ રાખીને જ રહેવાની ફરજ પાડવામાં આવી હતી. ડર વધારવા માટે વર્ચ્યુઅલ કોર્ટ રૂમનું વાતાવરણ ઊભું કરાયું, જ્યાં જજ, વકીલો, બેંક મેનેજર અને સીબીઆઈ અધિકારીઓ હાજર હોવાનું દર્શાવાયું. નકલી કોર્ટમાં એક અન્ય આરોપીને 90 દિવસની જેલની સજા ફટકારવાનું દૃશ્ય બતાવીને અમિત દેસાઈને સહકાર આપવા માટે દબાણ કરવામાં આવ્યું.

શંકા જતાં પોલીસે ભાંડો ફોડ્યો : 

બુધવારે જ્યારે સાયબર માફિયાઓએ અમિત દેસાઈ પર તેમની તમામ પ્રોપર્ટી અને બેંક બેલેન્સ ખાલી કરીને 46 લાખ રૂપિયા આરબીઆઈના નામે આપેલા એકાઉન્ટમાં જમા કરાવવાનું દબાણ કર્યું, ત્યારે તેમને શંકા ગઈ. તેમણે હિંમત કરીને પોતાના ભાઈને જાણ કરી અને તેમના ભાઈએ તુરંત જ સુરત સાયબર સેલનો સંપર્ક કર્યો.ડીસીપી બિશાખા જૈનની સૂચનાથી પોલીસની ટીમ તાત્કાલિક અમિત દેસાઈના ઘરે પહોંચી. પોલીસ દરવાજામાં પ્રવેશી ત્યારે તેઓ સાયબર માફિયા સાથે વીડિયો કોલ પર હતા. સાયબર સેલના અધિકારીએ સમયસૂચકતા વાપરીને મોબાઈલ આંચકી લીધો અને કેમેરો પોતાની તરફ ફેરવતા જ સાયબર માફિયાનો ભાંડો ફૂટી ગયો.

પીડિતની આપવીતી અને પોલીસની ચેતવણી : 

અમિત દેસાઈએ જણાવ્યું કે તેઓ બેટરી પૂરી ન થાય તે માટે ફોન ચાર્જિંગમાં રાખીને જ બેસી રહેતા હતા. તેમને એક જ દિવસમાં મિલકત વેચીને પૈસા ટ્રાન્સફર કરવાનું કહેવાયું, જેનાથી તેમને શંકા ગઈ.

સાયબર સેલના ડીસીપી બિશાખા જૈને જણાવ્યું કે આ ઓપરેશન મોટે ભાગે વિદેશથી, ખાસ કરીને સાઉથ-ઈસ્ટ એશિયાના દેશોમાંથી ઓપરેટ થતા હોય છે. પોલીસે નંબર ટ્રેસિંગ શરૂ કર્યું છે. સુરત પોલીસની આ ત્વરિત કાર્યવાહીએ નાગરિકની જીવનભરની મૂડી બચાવી લીધી છે.