અંબાજીમાં 15 વર્ષની સગીરા પર ગેંગરેપ, નરાધમોએ સગીરાને અર્ધબેભાન હાલતમાં છોડી

અંબાજીમાં સગીરા પર સામુહિક દુષ્કર્મની ઘટના સામે આવી છે.સગીરા અર્ધ બેભાન થતા નરાધમો તેને છોડીને ફરાર થઈ ગયા હતા. સગીરાની માતાએ અંબાજી પોલીસ મથકે ફરિયાદ નોંધાવી છે.પોલીસે નરાધમોને ઝડપી લેવા ચક્રો ગતિમાન કર્યા છે.

પ્રાપ્ત માહિતી મુજબ અંબાજી નજીકના ગામમાં રહેતી એક સગીરા સોમવારે સાંજે 4 વાગ્યાના સુમારે ગબ્બર નજીક રહેતા મોટા બાપાના ઘરે જવા નીકળી હતી. તેણી ગબ્બર સર્કલે ઉભી હતી. ત્યારે તેણીનો ઓળખીતો દાંતા તાલુકાના ઘોડા ટાંકણીનો શખ્સ બાઇક લઇને આવ્યો હતો. જેની પાછળ અજાણ્યા બે શખ્સો પણ બેઠા હતા. તેને પુછતા સગીરાએ મોટા બાપાના ઘરે જવાનું કહેતા શખ્સે ત્યાં ઉતારી લઇશ તેમ કહી બાઇક ઉપર બેસાડી છાપરી રોડ ઉપર લઇ ગયો હતો. જ્યાં અન્ય ત્રણ શખ્સો ઉભા હતા.

દરમિયાન લાલા પરમારે ઝાડીમાં ખેંચી જઇ છ જણાંએ સગીરા પર દુષ્કર્મ ગુજાર્યુ હતુ. આથી તેણી અર્ધબેભાન થઇ ગઇ હતી.આ શખ્સો ગબ્બર નજીક ઉતારીને ફરાર થઇ ગયા હતા.આ અંગે તેણીની માતાએ ફરિયાદ નોંધાવતાં પોલીસે 6 શખ્સો સામે ગૂનો નોંધી ઝડપી લેવા તપાસ હાથ ધરી હતી.