જામનગરના વસઈમાં અમિત શાહની 10 વીઘા જમીન પચાવી પાડી

મૂળ જામનગરના અને હાલ ઈગ્લેન્ડમાં સ્થાયી થયેલા એક NRIની જમીન પચાવી પાડવાના ષડયંત્રનો પર્દાફાશ થયો છે. જામનગર નજીક વસઈ ગામના અમિત શાહની 10 વીઘા ખેતીની જમીનના બનાવટી દસ્તાવેજો તૈયાર કરીને પચાવી પાડવામાં આવી છે. સિક્કા પોલીસે જામનગર અને મુંબઈના ચાર શખ્સો સામે ગુનો નોંધીને તપાસ હાથ ધરી છે.

જામનગરની જયંત સોસાયટીમાં રહેતા અમિતભાઈ દામજીભાઈ શાહ હાલમાં યુકેમાં બિઝનેસ કરે છે. જામનગર તાલુકાના વસઈ ગામની સીમમાં તેઓની અંદાજે 10 વીઘા ખેતીની જમીન આવેલી છે. વર્ષ 2000માં તેમણે જમીન ખરીદ કરી હતી. ત્યારબાદ તેઓ યુકે જતાં રહ્યા હતા. યુકેથી સમયાંતરે ભારત આવીને તેઓ પોતાની જમીનનું નિરીક્ષણ કરતા હતા.

તાજેતરમાં તેઓના ધ્યાનમાં આવ્યું કે પોતાની જમીનના દસ્તાવેજ વેચાણ અર્થે જામનગર પંથકમાં ફરી રહ્યા છે. તેથી તેઓએ જામનગર આવીને ખરાઈ કરતાં તેમની જમીન અન્યના નામે વેચાણ થઈ હોવાનું અને ફરીથી મોટી રકમમાં વેચાણ કરવા માટેનો કારસો ચાલતો હોવાનું ધ્યાનમાં આવ્યું હતું.

ભગવાનજી હંસરાજ ગોરી, ખોટું નામ ધારણ કરનાર અમિત દામજીભાઈ શાહ, નવીન રામજી ગોરી અને યોગેશ કેશવજી શાહે 10 વીઘા ખેતીની જમીન પચાવી પાડી હતી. તેમણે જામનગરના પ્રાંત અધિકારીને  અરજી કરી સંપૂર્ણ તપાસ કરાવવાની માંગ કરી હતી. પ્રાંત અધિકારીની તપાસમાં જાણવા મળ્યું કે, આ જમીન જામનગરમાં રહેતા ભગવાનજીભાઈ હંસરાજભાઈ ગોરીના નામે ટ્રાન્સફર થઈ ગઇ છે. મુંબઈના અમિતભાઈ દામજીભાઈ શાહ નામના શખ્સે જમીનનો ખોટો દસ્તાવેજ કરી આપ્યો હતો. જામનગરના નવિનભાઈ રામજીભાઈ ગોરી અને મુંબઈના વતની યોગેશ કેશવજીભાઈ શાહે દસ્તાવેજમાં સાક્ષી તરીકે સહીઓ પણ કરી હતી.

11 ફેબ્રુઆરી 2025ના રોજ બનાવટી દસ્તાવેજો તૈયાર કરવામાં આવ્યા હતા. જામનગરની સબ રજિસ્ટ્રાર કચેરીમાં દસ્તાવેજની નોંધણી કરાવવામાં આવી હતી. તમામ હકીકતોની જાણ થતાં ખોટા દસ્તાવેજો બનાવનાર જામનગર અને મુંબઈના ચાર શખ્સો સામે અમિતભાઈ શાહે ફરિયાદ નોંધાવી છે. ફરિયાદના આધારે સિક્કા પોલીસે ચારેય શખ્સો સામે ગુનો નોંધીને તપાસ હાથ ધરી છે. પોલીસની પ્રાથમિક તપાસમાં આ જમીનનું બે થી વધુ વખત વેચાણ થયાનું ખુલવા પામ્યું છે.