'મારી ભૂલ થઈ, મેં પોલીસ પર હાથ ઉપાડ્યો' આરોપીએ જાહેરમાં માગી પોલીસની માફી

સુરત જિલ્લાના પલસાણાના બારસડી ગામમાં 28 જાન્યુઆરીએ એક ગંભીર ઘટના બની હતી. બારસડી ગામની એક યુવતીનો વડોદરાના એક યુવક સાથે પ્રેમસંબંધ હતો, પણ અચાનક યુવતીએ તેની સાથે વાતચીત બંધ કરી દીધી. આથી ગુસ્સે થયેલો યુવક તલવાર લઈને ગામમાં આવી ગયો અને હિંસા સર્જી દીધી. યુવકે એક પોલીસકર્મીને માથામાં તલવાર મારી ઘાયલ કરી દીધો. આખરે, પીઆઇ વી. એલ. ગાગિયાની તત્પરતા અને સૂઝબૂઝથી યુવકને કાબૂમાં લેવાયો અને પોલીસ મથકે લઇ જવાયો.

પોલીસે બીજા દિવસે આરોપી પાસે સમગ્ર ઘટનાનું રિકન્સ્ટ્રક્શન કરાવ્યું, જ્યાં આરોપીએ ખુલ્લેઆમ ગ્રામજનો અને પોલીસ સમક્ષ માફી માગી. તેણે કબૂલ્યું કે પોલીસ પર હાથ ઉપાડીને તેણે મોટી ભૂલ કરી છે અને માફી યાચી.

શું હતો સમગ્ર મામલો?

પંચમહાલ જિલ્લાના ઘોઘંબા તાલુકાના ગોણેશિયા ગામના રહેવાસી, નિમેશ મેઘવાડે, બારસડી ગામની એક યુવતી સાથે ઈન્સ્ટાગ્રામ પર મિત્રતા કરી હતી, જે પ્રેમસંબંધમાં ફેરવાઈ. જોકે, યુવતીએ સંબંધ તોડતા નિમેશે ગુસ્સે આવી 28 જાન્યુઆરીના રોજ તલવાર સાથે બારસડી ગામમાં પ્રવેશ કર્યો. તેની હરકતોને જોતા ગામલોકોમાં ભયનો માહોલ છવાઈ ગયો અને લોકોએ તુરંત પલસાણા પોલીસ મથકને જાણ કરી.

પોલીસ પર હુમલો

પલસાણા પોલીસ મથકના બીટ જમાદાર ઘટનાસ્થળે પહોંચ્યા, પણ વાતચીત દરમિયાન અચાનક યુવક ઉશ્કેરાઈ ગયો અને પોલીસકર્મીના માથામાં તલવાર મારી દીધી. ઘાયલ પોલીસકર્મીને તુરંત નજીકની હોસ્પિટલ ખસેડવામાં આવ્યા. ઘટનાને ગંભીરતાથી લેતા પીઆઇ વી. એલ. ગાગિયા એક મોટી ટીમ સાથે સ્થળ પર દોડી ગયા.

યુવકને કાબૂમાં લેવા માટે પોલીસે પ્રયત્નો કર્યા

પીઆઇ ગાગિયાએ યુવકને શાંતિથી સમજાવવાનો પ્રયાસ કર્યો, પરંતુ જ્યારે યુવક ટસનું મસ ન થયો અને પોતાની જાતને પથ્થર મારીને ઇજા પહોંચાડવાનો પ્રયાસ કર્યો, ત્યારે પોલીસએ તાત્કાલિક કાર્યવાહી કરી. ગાગિયાએ પોતાની સૂઝબૂઝથી એક હાથમાં રિવોલ્વર અને બીજામાં પથ્થર રાખી યુવકને કાબૂમાં લીધો અને તેની તલવાર છોડી, પોલીસ મથકે લઈ જવાયો.

લોકોમાં રાહતનો માહોલ

દોઢ કલાક લાંબા સમયગાળાની હંગામાખોર ઘટનાને અંતે યુવકની ધરપકડ થતા ગામલોકોએ રાહતનો શ્વાસ લીધો. ઘણા લોકોએ સમગ્ર ઘટના પોતાના મોબાઈલ કેમેરામાં કેદ કરી હતી.

પોલીસે કરાવ્યું રિકન્સ્ટ્રક્શન

પોલીસવડા હિતેશ જોયસરના જણાવ્યા અનુસાર, 24 વર્ષીય આરોપી નિમેશે યુવતી સાથે ઝઘડા બાદ તેને હેરાન કરવાના ઉદ્દેશ્યથી ગામમાં તલવાર સાથે પ્રવેશ કર્યો હતો. સમયસર પહોંચેલી પલસાણા પોલીસે પરિસ્થિતિ કાબૂમાં રાખવા મથામણ કરી, પણ યુવકે હેડ કોન્સ્ટેબલ પર હુમલો કરી દીધો. યુવક સામે હત્યાના પ્રયાસ સહિત અનેક ગંભીર કલમો હેઠળ ગુનો નોંધાયો.

આરોપીની જાહેરમાં માફી

બીજા દિવસે, પોલીસે સમગ્ર ઘટનાનું રિકન્સ્ટ્રક્શન કરાવ્યું, જ્યાં આરોપીએ ખુદ ગ્રામજનો અને પોલીસ સમક્ષ માફી માંગી. યુવકે કબૂલ્યું કે તે ગુસ્સામાં આવી નકામી હરકતો કરી બેઠો અને તેને આ માટે ખેદ છે.

આ ઘટના પોલીસ અને પ્રશાસન માટે પણ ચેતવણીરૂપ બની છે કે ભવિષ્યમાં આવી હિંસક ઘટનાઓને અટકાવવા માટે વધુ કડક વ્યવસ્થા ગોઠવવી જરૂરી છે.