ટેસ્લાએ 5 સપ્ટેમ્બર 2025ના રોજ ભારતમાં પોતાની પહેલી કારની ડિલિવરી શરૂ કરી. મહારાષ્ટ્રના પરિવહન મંત્રી પ્રતાપ સરનાઈકે મુંબઈના બાંદ્રા કુર્લા કોમ્પ્લેક્સમાં નવા ખુલેલા શોરૂમમાંથી ટેસ્લાની મોડેલ વાયની ડિલિવરી લીધી. આ કાર ખરીદવાનો તેમનો હેતુ નાગરિકો, ખાસ કરીને યુવા પેઢીમાં ઈલેક્ટ્રિક વાહનો અંગે જાગૃતિ ફેલાવવાનો હતો. તેમણે જણાવ્યું કે, તેઓ આ કાર પ્રતિકાત્મક રીતે તેમના પૌત્રને ભેટ આપશે.
અત્યાર સુધીમાં 600થી વધુ ઓર્ડર મળ્યા
ભારતમાં ટેસ્લાના આગમનને લઈને ઘણી ચર્ચાઓ થઈ હતી, પરંતુ વેચાણ પર તેની અસર ઓછી જોવા મળી રહી છે. જુલાઈના મધ્યમાં બુકિંગ શરૂ થયા પછી, કંપનીને અત્યાર સુધીમાં 600થી વધુ ઓર્ડર મળ્યા છે. વૈશ્વિક સ્તરે, ટેસ્લા આટલી કારો થોડા જ કલાકોમાં વેચી નાખે છે. કંપની આ વર્ષે ભારતમાં 350થી 500 કારો મોકલી શકે છે, જેની પ્રથમ ખેપ સપ્ટેમ્બરની શરૂઆતમાં શાંઘાઈથી આવી ચૂકી છે. શરૂઆતમાં, આ ડિલિવરી મુંબઈ, દિલ્હી, પુણે અને ગુરુગ્રામ સુધી જ સીમિત રહેશે.
ઈલેક્ટ્રિક વાહનોને અપનાવવામાં ઝડપ મહત્વપૂર્ણ
ડિલિવરીના સમયે, પ્રતાપ સરનાઈકે કહ્યું કે, ભલે આજે ઈલેક્ટ્રિક વાહનોનો ખર્ચ થોડો વધારે હોય, પરંતુ સાચું ઉદાહરણ પૂરું પાડવું અને ઈલેક્ટ્રિક વાહનોને અપનાવવામાં ઝડપ લાવવી વધુ મહત્વપૂર્ણ છે. તેમણે અટલ સેતુ અને સમૃદ્ધિ એક્સપ્રેસ-વે પર ટોલ મુક્તિ જેવા મહારાષ્ટ્ર સરકારના પ્રોત્સાહનોની વાત કરી. મહારાષ્ટ્ર પરિવહન વિભાગે પહેલાથી જ લગભગ 5,000 ઈલેક્ટ્રિક બસો ખરીદી છે.
ઈલેક્ટ્રિક વાહનોના બજારને વેગ
આ દરમિયાન, ટેસ્લા ભારતમાં પોતાની યોજનાઓને આગળ વધારી રહી છે. કંપની મુંબઈ અને દિલ્હીમાં ચાર્જિંગ સ્ટેશનો સ્થાપિત કરી રહી છે અને આવતા વર્ષે દક્ષિણ ભારતમાં એક નવું એક્સપિરિયન્સ સેન્ટર ખોલવાની તૈયારી કરી રહી છે. આ પગલું ભારતમાં ઈલેક્ટ્રિક વાહનોના બજારને વધુ વેગ આપશે અને ટેસ્લાની પહોંચ વધારશે.

ટેસ્લાની મોડેલ વાયની ડિલિવરી

મહારાષ્ટ્રના પરિવહન મંત્રી પ્રતાપ સરનાઈકે ટેસ્લાની મોડેલ વાયની ડિલિવરી લીધી

September 5, 2025 | 21:40 IST