ગુજરાતમાં મેઘ મહેર: છેલ્લા 24 કલાકમાં 87 તાલુકામાં વરસાદ, કપરાડામાં સૌથી વધુ 4 ઈંચ

ગુજરાતમાં મેઘરાજાની મહેર ચાલુ છે. છેલ્લા 24 કલાક દરમિયાન રાજ્યના 87 તાલુકાઓમાં વરસાદ નોંધાયો છે. સૌથી વધુ વરસાદ વલસાડ જિલ્લાના કપરાડા તાલુકામાં નોંધાયો છે જ્યાં સવા ચાર ઈંચ જેટલો વરસાદ પડ્યો હતો. ભારે વરસાદના કારણે કેટલીક જગ્યાએ પાણી ભરાઈ ગયાનું પણ જાણવા મળ્યું છે.

હવામાન વિભાગે 4થી 7 જુલાઈ વચ્ચે ભારે વરસાદની આગાહી કરી છે. રાજ્યમાં હાલમાં અપર એર સાયક્લોનિક સર્જન, ટ્રફ લાઈન અને લો પ્રેશર સિસ્ટમ સક્રિય છે જે જુલાઈમાં સરેરાશ કરતાં વધુ વરસાદ લાવશે એવું અનુમાન છે. અમદાવાદમાં જુલાઈમાં સામાન્ય રીતે 12 ઈંચથી વધુ વરસાદ રહે તેવી શક્યતા છે.

અન્ય વિસ્તારોની વાત કરીએ તો, તાપી જિલ્લાના ડોલવણમાં 2.5 ઈંચ, ડાંગના સુબિરમાં 1.75 ઈંચ, ઉમરગામમાં 1.5 ઈંચ, ધરમપુરમાં 1.25 ઈંચ, વાપી અને ખેરગામ-કુકરમુંડામાં 1 ઈંચ જેટલો વરસાદ થયો છે. પારડી અને વિજયનગરમાં પણ પોણો ઈંચ જેટલો વરસાદ નોંધાયો છે.

હવામાન વિભાગે 6 જિલ્લામાં ઓરેન્જ એલર્ટ અને 12 જિલ્લામાં યલો એલર્ટ જાહેર કર્યું છે. બનાસકાંઠા, અરવલ્લી, મહિસાગર, દાહોદ, નવસારી, વલસાડ, દમણ અને દાદરા-નગર હવેલી ઓરેન્જ એલર્ટ છે.

અમરેલી, ભાવનગર, ભરૂચ, સુરત, તાપી, ડાંગ, છોટાઉદેપુર, વડોદરા, પંચમહાલ અને મહેસાણા યલો એલર્ટ ધરાવે છે. ભારે વરસાદને ધ્યાનમાં રાખી 32 NDRF અને SDRFની ટીમો સ્ટેન્ડબાય પર રાખવામાં આવી છે. 4 જુલાઈ પછી મધ્ય, ઉત્તર અને દક્ષિણ ગુજરાતમાં ભારેથી અતિભારે વરસાદની શક્યતા છે.