શા માટે ભગવાન જગન્નાથ આખી રાત મંદિર બહાર રહે છે? રૂઠેલી પત્નીની કથા પાછળ રહેલું કારણ

જગતના નાથ ભગવાન જગન્નાથજીની 147મી રથયાત્રા અષાઢી બીજના દિવસે ભવ્ય રીતે યથાવત ક્રમમાં સંપન્ન થઈ રહી છે. રથયાત્રામાં પહેલા રથમાં ભાઈ બલભદ્ર, પછી બહેન સુભદ્રા અને અંતે ભગવાન જગન્નાથનો રથ હોય છે. રથયાત્રા અંતે જ્યારે ત્રણે રથો નિજ મંદિર પહોંચે છે ત્યારે પ્રાંગણમાં તેમને ગોઠવી દેવામાં આવે છે.

આ પછી મહંત શ્રી દિલિપદાસજી દ્વારા ભગવાન જગન્નાથજીની નજર ઉતારવામાં આવે છે. તેમનું માનવું છે કે, ભગવાન નગરચર્યાએ જાય ત્યારે લોકોની મીઠી નજર લાગતી હોય છે, જેને દૂર કરવા ભગવાનની આરતી અને નજર ઉતારવાની વિધિ કરવામાં આવે છે. તે છતાં ભગવાનને તરત મંદિર પ્રવેશ આપવામાં આવતો નથી. તેઓ આખી રાત ભાઈ બલભદ્ર અને બહેન સુભદ્રા સાથે રથમાં બિરાજમાન રહી મંદિર બહાર રોકાય છે.

આ પ્રથાના પાછળનું ધાર્મિક કારણ છે - માન્યતા પ્રમાણે, ભગવાન જગન્નાથની પત્ની લક્ષ્મીજી રથયાત્રા દરમિયાન તેમની પર નારાજ હોય છે, જેના કારણે ભગવાનને રાત્રે બહાર રોકાવું પડે છે. બીજા દિવસે સવારે શુભ મુહૂર્તમાં મંગળા આરતી બાદ ભગવાનને મંદિર પ્રવેશ અપાય છે. આ દિવસે મોટી સંખ્યામાં ભાવિકો વહેલી સવારથી ભગવાનના દર્શન માટે પહોંચી જાય છે, કારણ કે આ પળ વર્ષમાં માત્ર એક જ વખત મળે છે - જ્યારે ભગવાન રથમાં બિરાજમાન હોય અને મંદિર બહાર હોય.