ઉપ કુલપતિ કૌંભાડઃ દાંતીવાડા કૃષિ યુનિવર્સિટીના ઉપ કુલપતિની ભરતી ગેરકાયદે

બનાસકાંઠા જિલ્લાના દાંતીવાડા સ્થિત કૃષિ યુનિવર્સિટીના વર્તમાન ઉપ કુલપતિનું કૌંભાડ સામે આવ્યુ છે. ઉપ કુલપતિ રવિન્દ્ર ચૌહાણની નિમણૂક ગેરકાયદે કરવામાં આવી હોવાની ચોંકાવનારી વિગતો પ્રકાશમાં આવી છે. ઉપ કુલપતિની નિમણૂક સમયે ડીગ્રી સર્ટીફિકેટ રજૂ કર્યા વગર સરકારે રવિન્દ્ર ચૌહાણની નિયુક્તિ કરવામાં આવી હતી. પ્રોફેસર તરીકે આચરેલી ગેરરીતિના કારણે ચાલી રહેલી ખાતાકીય તપાસને અવગણી ઉપ કુલપતિ તરીકે નિમણૂક આપવામાં આવી હોવાની વિગતો સામે આવી છે. 

દાંતીવાડા કૃષિ યુનિવર્સિટીના ઉપ કુલપતિ રવિન્દ્ર ચૌહાણની નિમણૂક ગેરકાયદે થઈ હોવાનો ઘટસ્ફોટ થયો છે. નિમણૂક સમયે ડીગ્રી સર્ટિફિકેટ રજૂ કર્યા વગર તત્કાલિન વિજય રૂપાણી સરકારે ચૌહાણની નિયુક્તિ કરી હોવાનું સામે આવ્યુ છે. જે તે સમયે ચૌહાણ સામે ચાલી રહેલી ખાતાકીય તપાસો તેમજ ભરતી કૌભાંડ નજર અંદાજ કરવામાં આવ્યા હતા. આસિસ્ટન્ટ પ્રોફેસરની નોકરી મેળવવા રવિન્દ્ર ચૌહાણે અનુભવના દસ્તાવેજી પુરાવા પણ બનાવટી બનાવ્યા હતા. તેઓએ વર્ષ 2013 માં રજૂ કરેલા પુરાવા અંગે તત્કાલિન વાઇસ ચાન્સેલર અશોક પટેલે તપાસ કરાવી હતી. તપાસ દરમિયાન ચૌહાણ બીજ નિગમના અનુભવ પ્રમાણપત્રના કોઈ પુરાવા રજૂ કરી શક્યા નહોતા. 1 ઓગસ્ટ 1985માં રવિન્દ્ર ચૌહાણે આસિસ્ટન્ટ પ્રોફેસર માટેની નોકરી માટે અરજી કરી ત્યારે તેમના પિતા મંગળસિંહ જે. ચૌહાણ કૃષિ યુનિવર્સિટીની એડીએમ શાખા-1 માં અધિક્ષક તરીકે ફરજ બજાવતા હતા. તે સમયે તેમના પુત્રએ અનુભવના પ્રમાણપત્રો રજૂ કર્યા ન હોવા છતાં અરજી માન્ય ગણી આસિસ્ટન્ટ પ્રોફેસરના ઇન્ટરવ્યૂમાં હાજર રાખી હોદ્દાનો દુરૂપયોગ કરી ગેરકાયદે નોકરીએ લગાવી દીધા હતા. બીજ નિગમની ક્રમાંક યાદીમાં પણ રવિન્દ્રસિંહ ચૌહાણની જાતિની વિગતમાં ‘અનુસૂચિત જાતિ’નો ઉલ્લેખ કરવામાં આવ્યો છે. જ્યારે રવિન્દ્રસિંહ મંગળસિંહ ચૌહાણ (ક્ષત્રિય-રાજપૂત) હોવાનું સામે આવ્યુ છે.

રવિન્દ્ર ચૌહાણના અનુભવ સહિતનાં પ્રમાણપત્રોમાં અનેક વિસંગતતા

રવિન્દ્ર ચૌહાણે કૃષિ યુનિવર્સિટીમાં આસિસ્ટન્ટ પ્રોફેસરની નોકરી માટે અરજીમાં અનુભવની વિગતો દર્શાવી છે. પ્રોફેસરની નોકરી માટેની અરજી સમયે રજૂ કરેલા અનુભવની વિગતો પણ સુસંગત નથી. બંને વિગતોની દર્શાવેલ તારીખમાં એક દિવસમાં બે અલગ અલગ જગ્યાએ અનુભવ માટે ફરજ બજાવી હોવાની ચોંકાવનારી વિગતો બહાર આવી છે. રવિન્દ્ર ચૌહાણે જૂનાગઢ ઘઉં સંશોધન કેન્દ્રમાં 11 જાન્યુઆરી 1984માં રોજમદાર તરીકે તેમજ તે જ દિવસે મુંબઈ હિન્દુસ્તાન લિવર લિમિટેડ કંપનીમાં 11 જાન્યુઆરી 1984માં અનુભવ મેળવવા હાજરી બતાવી છે. ચૌહાણે બે અલગ અલગ અરજીઓમાં બીજ નિગમના અનુભવના પ્રમાણપત્રની વિગતો રજૂ કરી છે. બીજ નિગમમાંથી છૂટા થયાની તારીખ એક જ હોવાના બદલે રવિન્દ્ર ચૌહાણે અરજીમાં છૂટા થયાની અલગ અલગ તારીખ દર્શાવી છે. તેઓએ બીજ નિગમ કચેરીનું અનુભવ પ્રમાણપત્ર બનાવટી ઊભું કર્યું હોવાની શંકાઓ ઉત્પન્ન થઈ છે. રવિન્દ્ર ચૌહાણની ઉપ કુલપતિ તરીકેની નિમણૂકને વિપુલ જોષી નામના જાગૃત નાગરિકે કોર્ટમાં પકડારી હતી. કોર્ટમાં કરેલી ફરિયાદના આધારે 27 જૂન 2024 માં દાંતીવાડા પોલીસે ઉપ કુલપતિ રવિન્દ્ર ચૌહાણનું નિવેદન લીધું હતુ. નિવેદનમાં તેઓએ જણાવ્યું હતુ કે, આસિસ્ટન્ટ પ્રોફેસરની નોકરી માટે બીજ નિગમમાં ફરજ બજાવી અનુભવનું સર્ટિ રજૂ કર્યુ નથી. તેથી ઉપ કુલપતિના અનુભવના દસ્તાવેજી પુરાવાની સરકાર તપાસ કરાવે તો મસમોટું કૌભાંડ બહાર આવી શકે તેમ છે.

ઉપ કુલપતિ બન્યા બાદ ગેરકાયદે ભરતીમાં લાખો રૂપિયા ખંખેર્યા

રવિન્દ્ર ચૌહાણે વર્ષ 2021માં ખેતીવાડી અધિકારી અને ખેતી મદદનીશની ભરતી કરી હતી. આ ભરતીમાં ગેરરીતિથી પાસ થયેલા ઉમેદવારો પાસેથી લાખો રૂપિયાનું ઉઘરાણું કરાયું હોવાની સરકાર સુધી ફરિયાદ થઈ હતી. આ મામલે ઉપ કુલપતિ સામે તકેદારી આયોગના ખાસ તપાસ અધિકારી એસ.કે.પંડ્યાએ 2023માં તપાસ પણ કરી હતી. ખેતીવાડી અધિકારી અને ખેતીવાડી મદદનીશની ભરતીમાં સેટિંગ કરી નોકરીએ લાગેલા ધ્રુવિલ પટેલે 22 લાખ આપ્યા હોવાની કબૂલાત પણ કરી છે. વર્ષ 2021ની ભરતીમાં સેટિંગ થતું હોવાનું કેટલાક યુવકોની વાતચીતની ઓડિયો ક્લિપ પણ બહાર આવી છે. આ ઓડિયો ક્લિપમાં ધ્રુવિલ પટેલ પરીક્ષા પહેલા અન્ય યુવક સાથે વાતચીત કરતો હોવાની ઓડિયો ક્લીપ વાયરલ થઈ છે. વાતચીત દરમિયાન ધ્રુવિલ પટેલ 20-22 લાખના સેટિંગની વાત કરતો હોવાનું જણાઈ રહ્યુ છે. ધ્રુવિલ પટેલ સાથે લાખો રૂપિયા આપીને નોકરી મેળવનારા દાંતીવાડા કૃષિ યુનિવર્સિટીમાં ખેતીવાડી અધિકારી તેમજ ખેતીવાડી મદદનીશ તરીકે ફરજ બજાવી રહ્યા છે. ભરતી કૌભાંડનું પ્રકરણ વધુ ખૂલ્લું પડતા યુનિવર્સિટીના સત્તાધીશોની પોલ ખુલે તેમ હતી. તેથી ધ્રુવિલ પટેલની કચ્છના કોઠારા કેન્દ્ર ખાતે બદલી કરી દીધી છે.

પિતાએ ગોટાળા કરી પુત્ર રવિન્દ્રસિંહ ચૌહાણને આસિસ્ટન્ટ પ્રોફેસર બનાવ્યો

આસિસ્ટન્ટ પ્રોફેસરની ભરતી સમયે ગુજરાત રાજ્ય બીજ નિગમની ગાંધીનગર કચેરીએ અધિકારી અને કર્મચારીઓના અગ્રતાક્રમ યાદીમાં રવિન્દ્ર ચૌહાણ એટલે કે આર.એમ.ચૌહાણનો ક્રમ નંબર -27  દર્શાવ્યો છે. આ યાદીની જાતિની કોલમમાં રવિન્દ્રસિંહ ચૌહાણનો ‘અનુસુચિત જાતિ’ તરીકે ઉલ્લેખ કરવામાં આવ્યો છે. રવિન્દ્ર ચૌહાણના પિતા મંગળસિંહ જે. ચૌહાણ જે તે સમયે કૃષિ યુનિવર્સિટીની એડીએમ શાખા-1 માં અધિક્ષક તરીકે ફરજ બજાવતા હતા. તે સમયે તેમના પુત્રએ અનુભવના પ્રમાણપત્રો રજૂ કર્યા ન હોવા છતાં અરજી માન્ય ગણી આસિસ્ટન્ટ પ્રોફેસરના ઇન્ટરવ્યૂમાં હાજર રાખી હોદ્દાનો દુરૂપયોગ કરી ગેરકાયદે નોકરીએ લગાવી દીધા હતા. આસિસ્ટન્ટ પ્રોફેસર તરીકે ગેરકાયદે લાગેલા રવિન્દ્રસિંહ ચૌહાણ વર્ષ 2020માં યુનિવર્સિટીના ઉપ કુલપતિ પણ બની ગયા છે.