વડોદરા તકતી પલટ વિવાદ.. મુનિએ કહ્યું...રામ બચાવે ગુજરાતને...!

વડોદરા ભાજપનું નવનિર્મીત કાર્યાલયનું ઉદ્ઘાટન વિવાદનું પર્યાય બની ગયું છે. તાજેતરમાં વડોદરા ભાજપનું નવનિર્મીત કાર્યાલય નમો કમલમનું ઉદ્ધાટન કરાયું હતું જેમાં તકતીમાં માત્ર શહેર ભાજપ પ્રમુખ ડો.વિજય શાહનું નામ હોવાથી શહેર ભાજપ સંગઠનમાં વિરોધનો સૂર ઉઠ્યો હતો અને ત્યાર બાદ નવી તકતી લગાવામાં આવી હતી. હવે આ વિવાદમાં આચાર્ય સૂર્ય સાગર મહારાજે પણ ઝંપલાવ્યુ છે અને તેમણે કહ્યું છે કે વડોદરા ભાજપ સંગઠન પોતાને પક્ષથી ઉપર સમજે છે કે પક્ષની વિચારધારાથી અજ્ઞાત છે તે સમજથી પરે છે..તેમણે હતાશમાં પોતાનો બળાપો ઠાલવ્યો હતો કે રામ બચાવે ગુજરાતને...

વડોદરાના નમો કમલમ કાર્યાલયની તકતીનો વિવાદ વકરી રહ્યો છે. આ વિવાદમાં ઝંપલાવતા આચાર્ય સૂર્ય સાગર મહારાજે કહ્યું કે પંડિત શ્યામાપ્રસાદ મુખરજીએ દિલ્હીમાં જનસંઘની સ્થાપના કરી હતી. જનસંઘથી લઇને ભાજપ સુધીની સ્થાપના હિન્દુત્વને ધ્યાનમાં રાખીને થઇ હતી.પક્ષમાં કોઇ વ્યક્તિ વિશેષનું મહત્વ નથી. તો વડોદરા ભાજપના અર્ધ નિર્મીત કાર્યાલય પર જે તક્તી લગાડવામાં આવી તે જરુરી છે..? તે પણ કોઇ મૂહુર્ત વિના....? શું દિલ્હી મુખ્ય કાર્યાલયમાં કોઇ તક્તી છે...? વડોદરા ભાજપનું સંગઠન પક્ષની વિચારધારાથી અજ્ઞાત છે અથવા પોતાને જ પક્ષથી ઉપર સમજે છે. તે જ સમજથી પરે છે. દુર્ભાગ્યની વાત એ છે કે ત્યાં ઉપસ્થિત પ્રદેશ સંગઠન પણ તક્તી અનાવરણ કરે છે. શું થશે ગુજરાતનું...! શું થશે વડોદરાનું..! સમજથી પરે છે. રામ બચાવે ગુજરાતને...!

ઉલ્લેખનિય છે કે રવિવારે જ્યારે નવ નિર્મિત નમો કમલમનું ઉદ્ઘાટન કરાયું ત્યારે અનાવરણ તક્તીમાં વડોદરા શહેર ભાજપમાંથી માત્ર શહેર પ્રમુખ ડો.વિજય શાહનું જ નામ હતું જેથી શહેર ભાજપમાં વિવાદ થયો હતો. તકતીમાં કેન્દ્રીય મંત્રી સી આર પાટીલ, મુખ્યમંત્રી ભૂપેન્દ્ર પટેલ, ગૃહ મંત્રી હર્ષ સંઘવી અને ડો વિજય શાહના નામ હતા. આ તકતીમાં  પ્રદેશ મોવડી મંડળ, શહેર પ્રભારી, સાંસદ, ધારાસભ્યોનું નામ ના હોવાથી ભારે નારાજગી વ્યાપી હતી અને આખરે પ્રદેશ મોવડી મંડળના આદેશથી તકતી તાત્કાલિક ઉતારી લેવાઈ છે. આખરે વિવાદ વકરતાં તકતી જ ઉતારી લેવાનો નિર્ણય કરાયો હતો. અને નવી તકતી લગાવી દેવાઇ હતી.જેમાં તમામ આગેવાનોના નામ હતા.