વડોદરા શહેરના સરદાર એસ્ટેટ વિસ્તારમાં આજે એક હચમચાવી દે તેવી ઘટના બની હતી. એક પેટ્રોલ પંપ પરથી ઈંધણ ભરાવીને બહાર નીકળી રહેલા બાઈક ચાલકની મોટરસાયકલમાં અચાનક ભીષણ આગ ફાટી નીકળી હતી. સદનસીબે આ ઘટનામાં કોઈ જાનહાનિ થઈ નથી, પરંતુ આગની તીવ્રતા જોઈને આસપાસના લોકોમાં ભારે ગભરાટ ફેલાઈ ગયો હતો.
કેવી રીતે બની ઘટના ?
પ્રાપ્ત વિગતો અનુસાર, એક બાઈક ચાલક સરદાર એસ્ટેટ પાસે આવેલા પેટ્રોલ પંપ પર પોતાની મોટરસાયકલમાં પેટ્રોલ ભરાવવા માટે આવ્યો હતો. તેણે બાઈકની પેટ્રોલ ટાંકી ફૂલ કરાવી હતી. જેવો તે પેટ્રોલ પંપની બહાર નીકળ્યો અને મુખ્ય માર્ગ તરફ વળ્યો, કે તરત જ તેની મોટરસાયકલમાં અચાનક સ્પાર્ક થયો અને આગ ભભૂકી ઉઠી હતી. જોતજોતામાં આગ આખી બાઈકમાં પ્રસરી ગઈ હતી અને મોટરસાયકલ અગનગોળામાં ફેરવાઈ ગઈ હતી.
ફાયર બ્રિગેડની ત્વરિત કામગીરી :&nbsp;
આગ લાગતા જ આસપાસના લોકો અને પેટ્રોલ પંપના સ્ટાફમાં દોડધામ મચી ગઈ હતી. તાત્કાલિક ધોરણે પાણીગેટ ફાયર સ્ટેશનને જાણ કરવામાં આવી હતી. બનાવની ગંભીરતાને સમજીને ફાયર બ્રિગેડના જવાનો કાફલા સાથે ઘટનાસ્થળે પહોંચી ગયા હતા. જવાનોએ પાણીનો મારો ચલાવીને ગણતરીની મિનિટોમાં આગ પર કાબૂ મેળવી લીધો હતો. જોકે, ત્યાં સુધીમાં આખી બાઈક બળીને ખાખ થઈ ગઈ હતી.
મોટી દુર્ઘટના ટળી :&nbsp;
આ ઘટનામાં સૌથી રાહતની વાત એ રહી કે આગ પેટ્રોલ પંપની હદની થોડી બહાર લાગી હતી. જો આ આગ પંપની અંદર લાગી હોત અથવા તો બાઈકની ટાંકી ફાટી હોત, તો વડોદરાના આ વ્યસ્ત વિસ્તારમાં મોટી હોનારત સર્જાઈ શકી હોત. ચાલક સમયસર બાઈક પરથી ઉતરી જવામાં સફળ રહ્યો હોવાથી તેનો આબાદ બચાવ થયો છે. પ્રાથમિક દ્રષ્ટિએ શોર્ટ સર્કિટ અથવા પેટ્રોલ લીકેજને કારણે આ આગ લાગી હોવાનું અનુમાન છે.&nbsp;

વડોદરા બાઈકમાં આગની ઘટના

સરદાર એસ્ટેટ પાસે ટાંકી ફૂલ કરાવીને નીકળતા જ બાઈક બની ગઈ અગનગોળો; સદનસીબે મોટી જાનહાનિ ટળી

March 24, 2026 | 14:10 IST