વડાપ્રધાન નરેન્દ્ર મોદીની વડોદરા મુલાકાત દરમિયાન બંદોબસ્તમાં ફરજ બજાવતા એક હોમગાર્ડ જવાનનું હાર્ટ એટેકથી દુઃખદ મોત નીપજ્યું છે. કિશનવાડી વિસ્તારમાં ફરજ બજાવતા હોમગાર્ડ જવાન નીતેશ જારીયા ફરજ દરમિયાન ગભરામણ અનુભવતા ઢળી પડ્યા હતા, જે બાદ તેમને સયાજી હોસ્પિટલમાં સારવાર માટે ખસેડવામાં આવ્યા હતા. જોકે, હોસ્પિટલમાં પહોંચ્યા બાદ ડોક્ટરોએ તેમને મૃત જાહેર કર્યા હતા. આ ઘટનાએ પરિવારજનો અને સાથી પોલીસકર્મીઓમાં શોકની લાગણી ફેલાવી છે.
નીતેશ જારીયા લક્ષ્મીપુરા પોલીસ સ્ટેશનમાં હોમગાર્ડ તરીકે ફરજ બજાવતા હતા. તેમના લગ્ન થયેલા હતા અને તેમને દોઢ વર્ષનો એક પુત્ર પણ છે. ઘટનાને પગલે પરિવારજનોએ સયાજી હોસ્પિટલમાં ભારે આક્રંદ કર્યો હતો. પરિવારજનોએ આક્ષેપ કર્યો કે, નીતેશને કિશનવાડીની નજીકની હોસ્પિટલમાં લઈ જવાને બદલે સયાજી હોસ્પિટલ લઈ જવામાં આવ્યા, જેના કારણે સમયસર સારવાર ન મળી અને તેમનું મોત નીપજ્યું. નીતેશના ભાઈ નિલેશ જારીયાએ જણાવ્યું, "મારા મોટાભાઈ ફરજ દરમિયાન ગભરામણ અનુભવી ઢળી પડ્યા હતા. નજીકની હોસ્પિટલમાં લઈ જવાને બદલે સયાજી હોસ્પિટલ લઈ ગયા, જેના કારણે મોડું થઈ ગયું. જો સમયસર સારવાર મળી હોત તો તેઓ બચી શક્યા હોત."
આ ઘટના ઉપરાંત, વડાપ્રધાનના કાર્યક્રમ દરમિયાન બે મહિલાઓ પણ બેભાન થઈ હોવાનું સામે આવ્યું છે. તેમને પણ સયાજી હોસ્પિટલમાં સારવાર માટે ખસેડવામાં આવી છે, જ્યાં તેમની હાલત સ્થિર હોવાનું જાણવા મળ્યું છે. ઘટનાને પગલે મોટી સંખ્યામાં હોમગાર્ડ જવાનો અને પોલીસકર્મીઓ સયાજી હોસ્પિટલ પહોંચી ગયા હતા, જેમણે નીતેશના નિધન પર શોક વ્યક્ત કર્યો.
આ ઘટનાએ સ્થાનિક વહીવટ અને હોસ્પિટલની સુવિધાઓ પર પણ સવાલો ઉભા કર્યા છે. પરિવારજનોનો આક્ષેપ છે કે, સમયસર યોગ્ય સારવાર મળી હોત તો નીતેશનો જીવ બચી શક્યો હોત. હાલ આ મામલે વધુ તપાસ ચાલી રહી છે.
પ્રધાનમંત્રીના કાર્યક્રમ દરમ્યાન અન્ય બે મહિલાઓ પણ બેભાન થઈ હોવાની પ્રાથમીક માહિતી મળી રહી છે. તેમને સમયસર સારવાર અર્થે હોસ્પિટલ ખસેડવામાં આવી છે. હાલ તેમની સ્થિતિ સામાન્ય અને સુધારા પર હોવાની માહિતી મળી છે.
