વડોદરા ભાજપ: આંતરિક ખેલમાં 'લોકસેવા' ગેરહાજર!

વડોદરા મહાનગર પાલિકામાં સત્તાધારી પક્ષના આંતરિક વિખવાદે એક સભ્યોનો ભોગ લીધો,  સ્ટેન્ડિંગ કમિટીના સભ્યનું પદ રદ થવાથી આ વાત સ્પષ્ટ થઈ છે. શિસ્તનો પર્યાય ગણાતા આ પક્ષમાં હવે શીતયુદ્ધ ચાલી રહ્યું છે. જનમાનસમાં મોટો સવાલ એ છે કે: શું નેતાઓને પ્રજાના વિકાસમાં રસ છે કે માત્ર વ્યક્તિગત વિકાસ અને વગ વધારવામાં? સભ્યપદ ગુમાવવું એ માત્ર ટેકનિકલ મુદ્દો નથી, પણ પાર્ટીની સંગઠનાત્મક સ્થિતિ પર પ્રશ્નાર્થ છે. આંતરિક મનદુઃખના કારણે શહેરના વિકાસના કામો ખોરંભે ચડે છે, જેનો ભોગ સામાન્ય નાગરિકો બને છે. નેતાઓ જ્યારે આંતરિક ખેંચતાણમાં વ્યસ્ત હોય, ત્યારે લોકહિતના નિર્ણયો પાછળ ધકેલાય છે. ભાજપે આત્મમંથન કરવું પડશે કે સત્તાનો ઉપયોગ આંતરિક વિખવાદ માટે છે કે વડોદરાના ઉત્તમ વિકાસ માટે?

વડોદરા મહાનગર પાલિકાની રાજનીતિમાં ફરી એકવાર ભાજપનો આંતરિક વિખવાદ સપાટી પર આવ્યો છે. વડોદરા કોર્પોરેશનની સૌથી મહત્વની ગણાતી સ્ટેન્ડિંગ કમિટીના સભ્ય અને વોર્ડ નં. ૭ના કોર્પોરેટર બંદિશ શાહનું સભ્યપદ રદ્દ કરવામાં આવ્યું છે. GPMC એક્ટની કલમ ૨૨ મુજબ, કોઈપણ સભ્ય સતત બે મહિના સુધી ગેરહાજર રહે તો તેનું સભ્યપદ આપોઆપ રદ્દ થાય છે. આ નિયમ હેઠળ બંદિશ શાહનું સભ્ય પદ રદ્દ થતા અનેક ગંભીર સવાલો ઊભા થયા છે, જે ભાજપની 'શિસ્તબદ્ધ' પાર્ટીની છબી પર સીધો પ્રહાર કરે છે.

પોતાના વિકાસમાં રસ, પ્રજાનું શું?
પ્રાપ્ત માહિતી અનુસાર, સસ્પેન્ડ થયેલા સભ્ય બંદિશ શાહ શહેરના જાણીતા બિલ્ડર અને ભવ્ય રિસોર્ટના માલિક છે. અહીં સવાલ એ થાય છે કે શું ભાજપ હવે માત્ર વગદાર અને પૈસાદાર લોકોને જ સભ્ય બનાવી રહ્યું છે, જેમને પોતાનો ધંધો વિકસાવવામાં વધારે રસ હોય, ન કે પ્રજાના વિકાસમાં તત્પર રહેવામાં? વડોદરા ભાજપની કાર્યશૈલી સ્પષ્ટ સંકેત આપે છે કે તેમનો રસ માત્ર પોતાના જ વિકાસમાં છે, નહીં કે સામાન્ય જનતાની સુખાકારીમાં. સ્ટેન્ડિંગ કમિટીમાં જ શહેરના તમામ કરોડો રૂપિયાના વિકાસલક્ષી નિર્ણયો લેવાય છે, છતાં સભ્યનું બે મહિના સુધી ગેરહાજર રહેવું એ દર્શાવે છે કે તેમને પ્રજાના કામમાં કેટલો રસ છે

આંતરિક જૂથવાદનો ભોગ? જુની ફરિયાદોનો ઇતિહાસ!
બંદિશ શાહની ગેરહાજરીના કારણે તેમનું સભ્ય પદ રદ્દ થવા પાછળ ભાજપનો આંતરિક જૂથવાદ જવાબદાર હોવાની ચર્ચા ટોક ઓફ ધ ટાઉન બની છે. તેઓ પૂર્વ પ્રમુખના ખાસ કહેવાતા હોવાથી, પક્ષના આંતરિક રાજકારણનો ભોગ બન્યા હોવાની શક્યતા પ્રબળ છે.

નોંધનીય છે કે, બંદિશ શાહ અગાઉ પૂર્વ પ્રમુખ ડૉ. વિજય શાહના સમયમાં ખૂબ વોકલ હતા અને તમામ મીટિંગોમાં કામ બાબતે આક્રમક રજૂઆતો કરતા હતા. એક સમયે આટલા સક્રિય વ્યક્તિએ અચાનક મીટિંગોમાં જવાનું બંધ કરવું, તે પણ પ્રશ્નાર્થ ઊભો કરે છે. ભાજપે આ અંગે સ્પષ્ટતા કરવી જોઈએ કે આ નિર્ણય ફક્ત નિયમ આધારિત છે કે પછી કોઈ જૂની ફરિયાદ અથવા આક્ષેપોને ધ્યાનમાં રાખીને તેમને સાઈડલાઈન કરવામાં આવ્યા છે? રાજકીય વર્તુળોમાં ચર્ચા છે કે તેમની સક્રિયતાના કારણે જ પક્ષમાં અગાઉ પણ તેમના વિરુદ્ધ અસંતોષની લાગણી હતી, જે હવે આ સસ્પેન્શન દ્વારા બહાર આવી છે.

કોંગ્રેસના પ્રહાર: 'ખાઇકી અને ભાગબટાઇના ઝઘડા!'
કોંગ્રેસના કોર્પોરેટર અમી રાવતે આ મુદ્દે આકરા પ્રહાર કરતા જણાવ્યું કે, "ભાજપની આંતરિક જૂથબંધીની આ ચરમસીમા છે! સ્થાયી સમિતિના સભ્ય બે-બે મહિના સુધી ગેરહાજર રહે અને તેમને બરતરફ કરવા પડે, તે સાબિત કરે છે કે પાર્ટીમાં હવે શિસ્તનું નામોનિશાન રહ્યું નથી."

તેમણે વધુમાં ઉમેર્યું કે, સ્ટેન્ડિંગ કમિટી કરોડો રૂપિયાના કામો પસાર કરતી હોય છે, પરંતુ હવે તેમાં માત્ર ખાઈકી અને ભાગબટાઈના ઝઘડા દેખાઈ રહ્યા છે. સભ્યોને પ્રજાના વિકાસના કામોમાં નહીં, પણ પોતાના આંતરિક હિતોના રક્ષણમાં જ રસ હોય તેવું સ્પષ્ટ દેખાય છે. ભાજપે આ મુદ્દે સ્વ-મંથન કરવું જરૂરી છે, નહીં તો વડોદરાની જનતાની સેવાના નામે માત્ર રાજકીય ડ્રામા જ ચાલતો રહેશે