વડનગર બનશે યોગનગરીઃ શર્મિષ્ઠા તળાવથી શરૂ થશે આંતરરાષ્ટ્રીય યોગ મહોત્સવ

11માં આંતરરાષ્ટ્રીય યોગ દિવસની રાજ્યકક્ષાની ઉજવણી 21 જૂન 2025ને શનિવારના રોજ વડાપ્રધાન નરેન્દ્ર મોદીના માદરે વતન વડનગરમાં કરવામાં આવશે. “યોગ ફોર વન અર્થ-વન હેલ્થ” થીમ સાથે યોજાનારા 11માં આંતરરાષ્ટ્રીય યોગ દિવસની ઉજવણીમાં “સ્વસ્થ ગુજરાત-મેદસ્વીતા મુક્ત ગુજરાત” નો ધ્યેય રાખવામાં આવ્યો છે. શર્મિષ્ઠા તળાવ ખાતે યોજાનારી ઉજવણીમાં મુખ્યમંત્રી ભૂપેન્દ્ર પટેલ જોડાશે.

વડનગરના શર્મિષ્ઠા તળાવ ખાતે 21 જૂન શનિવારના રોજ સવારે 6 કલાકે રાજ્યકક્ષાના આંતરરાષ્ટ્રીય યોગ દિવસની ઉજવણી કરવામાં આવશે. ઉજવણીમાં આરોગ્ય મંત્રી ઋષિકેશ પટેલ તેમજ રમત-ગમત રાજ્ય મંત્રી હર્ષ સંઘવી અને અન્ય મહાનુભાવો જોડાશે. યુનોમાં 177 દેશોના સમર્થનથી સમગ્ર વિશ્વમાં 21 જૂનના રોજ યોગ દિવસની ઉજવણી દર વર્ષે કરવામાં આવે છે. વર્ષ 2015થી 21 જૂને સામુહિક રીતે આંતરરાષ્ટ્રીય યોગ દિવસની ઉજવણી કરવામાં આવે છે.

ગુજરાતમાં અંદાજે 1.50 કરોડ નાગરિકો આંતરરાષ્ટ્રીય યોગ દિવસમાં સહભાગી થાય તેવી શક્યતા છે.  યોગ દિવસ-2025ની ઉજવણીના કાઉન્ટડાઉન અન્વયે અત્યાર સુધી જૂનાગઢ, પોરબંદર, સુરત, વડોદરા અને અમદાવાદ ઉપરાંત જિલ્લા-તાલુકા કક્ષાએ અંદાજે 1 હજારથી વધુ વ્યક્તિઓની ક્ષમતાના 35થી વધુ કાર્યક્રમો કરવામાં આવ્યા છે.

રાજ્યના જિલ્લા મથકો, નગરો-મહાનગરોના આઇકોનિક સ્થળો પસંદ કરીને યોગ કાર્યક્રમ યોજવાનું આયોજન હાથ ધરવામાં આવ્યું છે. વડાપ્રધાનના માદરે વતન વડનગરમાં શર્મિષ્ઠા તળાવ, હાટકેશ્વર મહાદેવ મંદિર, તાના-રીરી ગાર્ડન, કીર્તિ તોરણ, પ્રેરણા સ્કૂલ, રેલ્વે સ્ટેશન, મ્યુઝિયમ, પ્રેરણા સ્ટ્રીટ, વોચ ટાવર, હાથી દેરાસર, બી.એન.શાહ હાઈસ્કૂલ સહિત 11 આઇકોનિક સ્થળો પર યોગ અને સૂર્ય નમસ્કારના કાર્યક્રમો કાઉન્ટ ડાઉન રૂપે યોજવામાં આવ્યા હતા.

11માં વિશ્વ યોગ દિવસે ગુજરાતમાં ગામડાથી લઈને મહાનગરો સુધી યોગ કાર્યક્રમ યોજાનાર છે. આ ઉપરાંત 18,226 ગ્રામ પંચાયતો અને 251 તાલુકા પંચાયતો ખાતે પણ યોગ દિવસની ઉજવણીમાં અંદાજે 10.40 લાખ લોકોને જોડવાનું આયોજન હાથ ધરાયુ છે. શાળા કોલેજોના વિદ્યાર્થીઓ સહભાગી થાય તે માટે 45 હજાર પ્રાથમિક શાળાઓ, 12,500 માધ્યમિક અને ઉચ્ચતર માધ્યમિક શાળાઓ, 2600  કોલેજ અને 3 યુનિવર્સિટી મળી 60,100 સ્થળોએ અંદાજે 5.73 લાખ લોકો યોગમય બનશે.

રાજ્યની 287 ઔદ્યોગિક તાલીમ સંસ્થા, 1477 પી.એચ.સી., 6500 વેલનેસ સેન્ટર્સ, 30 જેલ, 33 પોલીસ હેડક્વાટર્સ અને 1152 પોલીસ મથકો ખાતે યોગ દિવસ ઉજવવામાં આવશે. 100 જેટલા અમૃત સરોવર સ્થળોએ પણ સામુહિક યોગ કાર્યક્રમ યોજાશે. ગુજરાતમાં ગત વર્ષે વિશ્વ યોગ દિવસની ઉજવણીમાં 1.31 કરોડ લોકો જોડાયા હતા. 11માં આંતરરાષ્ટ્રીય યોગ દિવસની ઉજવણી અંતર્ગત વડનગરના શર્મિષ્ઠા તળાવ ખાતે ભુજંગાસન યોગ કરી નવો વર્લ્ડ રેકર્ડ પ્રસ્થાપિત કરવાનું લક્ષ્ય રાખવામાં આવ્યુ છે.