સુરતના ગોડાદરામાં AAPની સભા પૂર્વે હોબાળો

સુરતનું રાજકારણ ફરી એકવાર ગરમાયું છે. ગોડાદરા વિસ્તારમાં આમ આદમી પાર્ટીની જાહેર સભા પૂર્વે જ વિવાદના મધપૂડા છંછેડાયા છે. નેતાઓના વિવાદાસ્પદ પોસ્ટરો અને હિન્દુ સંગઠનોના વિરોધને કારણે સમગ્ર વિસ્તારમાં ભારેલા અગ્નિ જેવી સ્થિતિ સર્જાઈ છે.

સુરતના પૂર્વ વિસ્તારમાં આવેલા ગોડાદરામાં આજે આમ આદમી પાર્ટી (AAP) દ્વારા એક મોટી જનસભાનું આયોજન કરવામાં આવ્યું છે. આ સભામાં પાર્ટીના પ્રદેશ પ્રમુખ ઈસુદાન ગઢવી, પૂર્વ પ્રમુખ ગોપાલ ઇટાલિયા અને ધારાસભ્ય ચૈતર વસાવા જેવા દિગ્ગજ નેતાઓ હાજર રહેવાના છે. જોકે, સભા શરૂ થાય તે પહેલા જ સભા સ્થળ અને આસપાસના રસ્તાઓ પર લાગેલા પોસ્ટરોએ વિવાદ જગાવ્યો છે.

આ પોસ્ટરોમાં આમ આદમી પાર્ટીના અગ્રણી નેતાઓને મુસ્લિમ ટોપી પહેરેલા દર્શાવવામાં આવ્યા છે. વળી, પોસ્ટરો પર “મીઠી ખાડી મુસ્લિમ સમાજ” તેવું લખાણ લખવામાં આવ્યું છે. આ લખાણ અને ફોટાને કારણે સ્થાનિક હિન્દુ સંગઠનોમાં ભારે રોષ ફેલાયો છે.

વિશ્વ હિન્દુ પરિષદનો આક્રમક વિરોધ

ગોડાદરા એ હિન્દુ બહુમતી ધરાવતો વિસ્તાર ગણાય છે. અહીં મુસ્લિમ ટોપીવાળા પોસ્ટરો દેખાતા વિશ્વ હિન્દુ પરિષદ (VHP) ના કાર્યકરો મેદાનમાં આવ્યા હતા. VHP ના કાર્યકરોએ આક્ષેપ કર્યો છે કે, જાણીજોઈને મતબેંકના રાજકારણ માટે હિન્દુ વિસ્તારમાં આવા પોસ્ટરો લગાવીને લોકોની ધાર્મિક લાગણી દુભાવવામાં આવી રહી છે.

વિરોધ પ્રદર્શન દરમિયાન ઉશ્કેરાયેલા કાર્યકરોએ AAP નેતાઓના પોસ્ટરો પર કાળી શાહી ફેંકી હતી અને સૂત્રોચ્ચાર કર્યા હતા. સંગઠનનું કહેવું છે કે, જો આવા ઉશ્કેરણીજનક કૃત્યો બંધ નહીં થાય તો ઉગ્ર આંદોલન કરવામાં આવશે.

પોલીસ છાવણીમાં ફેરવાયું ગોડાદરા

સભા પૂર્વે સર્જાયેલી આ તંગદિલીને જોતા સુરત પોલીસ તંત્ર સફાળું જાગ્યું છે. કોઈપણ પ્રકારની હિંસક ઘટના ન બને તે માટે સભા સ્થળે અને આસપાસના સંવેદનશીલ વિસ્તારોમાં પોલીસનો મોટો કાફલો તૈનાત કરી દેવામાં આવ્યો છે. ઉચ્ચ પોલીસ અધિકારીઓ જાતે સ્થળ પર મોનિટરિંગ કરી રહ્યા છે.

પોલીસ દ્વારા વિરોધ કરી રહેલા કેટલાક કાર્યકરોની અટકાયત કરવાની પણ શક્યતા છે, જેથી સભા શાંતિપૂર્ણ રીતે પૂર્ણ કરી શકાય. હાલમાં સભા સ્થળની સુરક્ષા લોખંડી બનાવી દેવામાં આવી છે.

રાજકીય પ્રતિક્રિયા અને માહોલ

બીજી તરફ, આમ આદમી પાર્ટીના નેતાઓનું કહેવું છે કે વિરોધ પક્ષો દ્વારા તેમની સભાને નિષ્ફળ બનાવવા માટે આ પ્રકારના પેંતરા રચવામાં આવી રહ્યા છે. AAP દ્વારા સભાની તૈયારીઓ પૂરજોશમાં ચાલુ રાખવામાં આવી છે. રાજકીય વિશ્લેષકોનું માનવું છે કે, સુરતમાં આગામી દિવસોમાં યોજાનારી ચૂંટણીઓને ધ્યાનમાં રાખીને આ પ્રકારનું પોસ્ટર વોર સોશિયલ એન્જિનિયરિંગ અને મતોના ધ્રુવીકરણનો એક ભાગ હોઈ શકે છે.

ગોડાદરામાં સર્જાયેલી આ સ્થિતિ અત્યારે ચર્ચાનો વિષય બની છે. એક તરફ રાજકીય અસ્તિત્વની લડાઈ છે, તો બીજી તરફ ધાર્મિક અસ્મિતાના મુદ્દે જંગ ખેલાઈ રહ્યો છે. હવે જોવાનું એ રહેશે કે પોલીસ બંદોબસ્ત વચ્ચે આ સભા કેવી રીતે સંપન્ન થાય છે અને આ વિવાદ આગામી સમયમાં કેવું સ્વરૂપ ધારણ કરે છે.

લોકશાહીમાં સભાઓ યોજવી એ દરેક પક્ષનો અધિકાર છે, પરંતુ જ્યારે તેમાં ધાર્મિક ચિન્હો અને લખાણોનો પ્રવેશ થાય છે ત્યારે વાતાવરણ ડોહળાય છે. સુરતની આ ઘટના ફરી એકવાર સાબિત કરે છે કે ચૂંટણી નજીક આવતા જ મુદ્દાઓ વિકાસને બદલે ધર્મ અને ઓળખ પર કેન્દ્રિત થઈ જાય છે.