વડોદરામાં બેકાબુ કાર ચાની લારીમાં ઘુસી,3 ઇજાગ્રસ્ત

સંસ્કારી નગરી વડોદરામાં મોડી રાત્રે ફરી એકવાર રફ્તારનો કહેર જોવા મળ્યો હતો. શહેરના સતત ધમધમતા એવા ડેરી ડેન સર્કલ પાસે એક બેકાબુ કાર ચાલકે ગંભીર અકસ્માત સર્જતા અફરાતફરી મચી ગઈ હતી. આ અકસ્માતમાં રસ્તા કિનારે આવેલી ચાની લારી પર બેઠેલા ત્રણ લોકોને કારે જોરદાર ટક્કર મારી હતી, જેમાં ત્રણેય યુવાનોને ગંભીર ઈજાઓ પહોંચી હોવાના અહેવાલ છે.

નિયંત્રણ ગુમાવતા સર્જાયો અકસ્માત : 

ઘટનાની વિગતો મુજબ, મોડી રાત્રિના સમયે એક લક્ઝુરિયસ કાર પૂરપાટ ઝડપે પસાર થઈ રહી હતી. ડેરી ડેન સર્કલ નજીક પહોંચતા જ કાર ચાલકે વાહન પરનું નિયંત્રણ ગુમાવી દીધું હતું. બેકાબુ બનેલી આ કાર રોડની સાઈડમાં આવેલી ચાની લારીમાં ધડાકાભેર ઘુસી ગઈ હતી. તે સમયે લારી પર ચા પીવા અને નાસ્તો કરવા બેઠેલા ગ્રાહકો કંઈ સમજે તે પહેલા જ કારે તેમને અડફેટે લીધા હતા. ટક્કર એટલી પ્રચંડ હતી કે કારના આગળના ભાગનો કુરચો બોલી ગયો હતો અને ચાની લારીને પણ ભારે નુકસાન થયું હતું.

મોટી જાનહાનિ ટળી : 

ડેરી ડેન સર્કલ વિસ્તારમાં મોડી રાત સુધી ખાણી-પીણીની લારીઓ પર લોકોનો ભારે જમાવડો જોવા મળે છે. સદનસીબે જે સમયે આ અકસ્માત સર્જાયો ત્યારે ભીડ પ્રમાણમાં ઓછી હતી, અન્યથા મોટી હોનારત સર્જાઈ શકી હોત તેવું સ્થાનિક પ્રત્યક્ષદર્શીઓએ જણાવ્યું હતું. અકસ્માત બાદ આસપાસના લોકો તાત્કાલિક મદદ માટે દોડી આવ્યા હતા અને ઇજાગ્રસ્તોને લોહીલુહાણ હાલતમાં સારવાર માટે નજીકની હોસ્પિટલમાં ખસેડવામાં આવ્યા હતા.

પોલીસ કાર્યવાહી અને તપાસ : 

અકસ્માતની જાણ થતા જ સયાજીગંજ પોલીસ સ્ટેશનનો કાફલો ઘટનાસ્થળે પહોંચી ગયો હતો. પોલીસે સ્થળ પર પંચનામું કરી અકસ્માત સર્જનાર કારને કબજે લીધી છે. આ મામલે પોલીસે કાર ચાલક વિરુદ્ધ ગુનો નોંધીને વધુ તપાસ હાથ ધરી છે. કાર ચાલક નશાની હાલતમાં હતો કે કેમ અથવા તો વાહનમાં કોઈ યાંત્રિક ખામી સર્જાઈ હતી તે દિશામાં પણ તપાસ કરવામાં આવી રહી છે. હાલમાં ઇજાગ્રસ્તોની હાલત સ્થિર હોવાનું જાણવા મળ્યું છે.